Read dhopadhola 1 Timothe 4 Bible Online

1 Timothe 4 - dhopadhola bible

1 Timothe 4

¹Cuny waco kamaler ni ji megi jobino weyo yeyo i ndir ma bino, jobino winjo cuny ma jotwodo to joluwo fonji pa jwogi.

²Fonji no wok i twodo pa ji ma jorendere, ma paro ma cuny jo otho aka orere woko pa gima nyweny malieth owaŋo.

³Joma pameno jofonjo ni nywom rac, aka jocero ji camo cemo moro. To Were ocweyo cemo me acama, ma jom'oyeyo aka joŋeyo adieri jooro munyo jofoyo Were.

⁴Gimoro je ma Were ocweyo ber, ongoye gima wocayi, to wojol je gi kwayo munyo ifoyo Were.

⁵Ato wac pa Were kodi kwayo miyo Were ketho silwany i gino.

⁶K'ifonjo jom'oyeyo wac me, ibino bedo jatic maber mapa Kristo Yesu, m'odongo gi wac ma yeyo kodi fonji ma go otieko mako.

⁷To weyi woko kigana ma Were ongoy'iye, ma kiripi awaca. Bedi munyo ifonjere kwo ma sangala Were.

⁸Kada fonjo del wobedi m'ocwiny nitie gi kony moro, to bedo gi kwo ma sangala Were ama nitie gi kony i royo je, rupiri nitie i iye cikirok ma kwo ma pama kodi ma bino.

⁹Me wac m'otire ma ripo ajola kicutho.

¹⁰Meno am'omiyo watekere aka watiyo gi tekirok, rupiri waketho geno mawan i Were makwo m'obedo Jaboth pa ji je, to tektek mere apa jom'oyeyo.

¹¹Wodhi or aka fonji gigipiny me.

¹²Ikir'iyey moro wocayin ro thino perin, to bedi ranen ri jom'oyeyo, i luwo, i kula, i mar, i yeyo kodi i lonyo ma cuny jo.

¹³Or hongo perin i kisoma ri ji Ndiko Maleŋ, kodi fonji cuka anobin.

¹⁴Ikir'ijala mic ma cuny ma inigine, m'omiyin munyo jotuci wac Were joluwo kwoŋe i ndir ma jodongo pa jom'oyeyo joketh'iye cingi gin kwoŋin.

¹⁵Kethi tic no je i tim munyo imiyere rijo, ŋey ji je jowoneni paka tic perin kadho malo.

¹⁶In won kaŋasa kwo perin, aka kaŋasa fonji perin bende. Medere gi timo tic no, rupiri k'itimo ameno ibino bothere kiri gi joma jowinjin bende.