Read dhopadhola 2 Timothe 4 Bible Online

2 Timothe 4 - dhopadhola bible

2 Timothe 4

¹I waŋ Were kodi Yesu Kristo ma bino thumo banja ri ji je, jomakwo kodi jom'otho, odoko ro wac dwoko pere kodi bino pa Ker pere, aorin gi meni m'oasere ni:

²Titi wac pa Were, kada ndir mere otundo kosa be, miy ji niaŋ, pusa jo, medi jo miseni, aka fonji munyo idiyo cunyin.

³Kole ndir bino tundo ma ji jok'owinj'iye fonji mar'adieri, to jobino tiyo g'awanya pajo wegi, odoko jobino coko jofonji ma wegi joyenyo, jowofonji jo gima ithi jo yilo jo winjo.

⁴Jobino weyo winjo adieri to joketho paro pajo kwoŋ kigana makicar.

⁵To in, hongo je iripo bedo milengela, ciro candirok, timo tic pa jatiti Wac Manyen Maber ri joma fodi jok'oyeyo, aka tim tic perin je paka jatic pa Were.

⁶To an, onyo hongo otundo ran ma bedo cowirok; hongo paran ma kadho otieko tundo.

⁷Atieko lwenyo lweny maber, atieko cowo ŋwec paran, atieko kuro yeyo.

⁸Aka pama onyo otiek yiko ran sangaria ma tiro, ma Rwoth, Jathum banja m'otire, bino miyan i Ndelo no, aka ki an kendan, to go bino miyo ji je ma jokuro go wonenere.

⁹Tem paka inyalo bino bongan mayot.

¹⁰Kole Dema omako mere gi piny ma pama aka onyo oweyan okadho yu Thesalonika. Kuresike okadho Galasia aka Tito okadho Dalmatia.

¹¹Luka kende ama nikodan. Nwaŋ Mariko ibin gine, rupiri go nyalo konyan maber.

¹²Aoro Tikiko yu Efeso.

¹³K'ibino, keli ran kot paran m'aweyo Tirowa gi Karupo; keli kitawin bende, tektek mere kitawo m'otimi akwoya.

¹⁴Alekizanda jathieth otimo ran marac swa, Rwoth bino miyo go kemba ro gima go otimo.

¹⁵Ibende gwokere kwoŋe, rupiri go opiemo swa kodi mikwenda mawan.

¹⁶I kacako munyo alwenyo gi thielo wac paran i kiosa, ongoye ŋat'ocungo kabutan, ji je joweyan. Akwayo ni Were wokiri wokwan kwoŋ jo reco no!

¹⁷To Rwoth obedo kodan aka omiyan meni, am'omiyo anyalo tuco mikwenda je ri Jopath jowowinji. Aka obothan i laki Simbwor.

¹⁸Rwoth bino konyan i raco je, to bothan ri Ker ma polo. Dwoŋ wobedi rigo cil gi cil. Ameno.

¹⁹Adhiro moth ri Prisila kodi Akwila, kodi ri peco pa Onesiforo.

²⁰Erasto odoŋ Korintho, aka aweyo Trofimo i Milato, rupiri go oyido two.

²¹Tem paka inyalo bino mafodi hongo ma piny ŋic'iye k'otundo. Yubulo, Puden, Lino kodi Klaudia jodhiro rin moth pajo, odoko jom'oyeyo je bende jodhiro moth pajo.

²²Rwoth wobedi kodi cunyin. Nema pa Were wobedi kodin.