Read dhopadhola Filimon 1 Bible Online

Filimon 1 - dhopadhola bible

Filimon 1

¹Balwa m'owok bongi Paulo, jatwec kwoŋbedo Kristo Yesu, kodi omin wan Timothe. Ri mere mawan kodi jatic nyawoti wan Filimon, kodi kitipa pa jom'oyeyo Kristo ma romo i ot perin,

²kodi nyamin wan Afiya, kodi jalweny nyawoti wan Arikipo.

³Weyi Were Bawan kodi Rwoth Yesu Kristo jowomiy win nema gi siem.

⁴I hongo je k'apoyin i kwayo paran, omin an Filimon, afoyo Were

⁵rupiri awinjo kwoŋ mar perin ri ji pa Were je gi yeyo m'initie gine i Rwoth Yesu.

⁶Akwayo Were ni, riwirok mawan kodin paka jom'oyeyo bino miyo wamedo niaŋ kwoŋ gima beyo je ma wanyalo timo ri Kristo.

⁷Mar perin, omin an ma kacunyan, okelo ran kisangala madwoŋ swa gi miseni m'oasere! Kole ikelo kisangala i cuny ji pa Were je.

⁸Ro wac me, kad'oyido anyalo bedo gi miseni paka omin in i Kristo, m'aorin timo gima ripo itimi,

⁹t'akwayin ayino ro marok mawan kodin. An Paulo, jamikwenda pa Kristo Yesu aka onyo pama jatwec bende rigo,

¹⁰akwayin ri wodan Onesimo, m'alokere bamere i Kristo munyo anitie i twec.

¹¹Con mere go oyido ongoye gi kony rin, to pama go onyo nigi kony rin kodi ran bende.

¹²Onyo adwoko go rin, aka kadho kiri gi cunyan.

¹³Onwaŋo d'ayenyo kuro go bothan ka, wonyali konyan kaperin munyo anitie i twec kwoŋbedo Wac Manyen Maber.

¹⁴To akimito timo ameno ma in won ikiyeyo, ŋey gimaber m'itimo wokiri wobedi gi mbaka, to wobedi gi paro perin won.

¹⁵Kono miti oyido ber ni Onesimo wokutho woeye bongin nyaka hongo macek ŋey rumacen wodwoki bongin kicutho.

¹⁶Kole go k'obedo nyaka ŋeca, to loyo ŋeca swa: Go obedo omin in ma kacunyin i Kristo. Go nitie gi kony ran swa! Aka go bino bedo gi kony rin swa loyo, paka ŋeca kodi omin in i Kristo!

¹⁷Am'omiyo k'iparo kwoŋan paka jatic nyawotin, joli go i dwoko pere paka d'ijolan.

¹⁸K'inen go oyido otieko timo rin gimoro marac, kosa nitie gi giperin moro, onyo kwan kwoŋan.

¹⁹An, Paulo, andiko gime gi cingan won: An Paulo, abino culin. (D'akipoyin, ato, nike d'onyo iripo culan i kwo perin bende.)

²⁰Am'omiyo, omin an, mondo tim ran wor me, i Rwoth. Sangala cunyan, paka omin an i Kristo!

²¹Aridho adieri, munyo andiko gime, nike ibino timo gim'akwayin, odoko ma kalo kiri m'akwayin.

²²Medo kwoŋ meno, yik reye kanindo, rupiri, ageno nike Were bino jolo kwayo mewin to dwokan riwin.

²³Epafra, manitie i twec kodan ro tic pa Kristo Yesu, dhiro rin moth,

²⁴kodi jotic jowotan Mariko, Aristariko, Dema, kodi Luka.

²⁵Weyi nema pa Rwoth Yesu Kristo wobedi kodi win.