Read dhopadhola Joebulaniya 11 Bible Online

Joebulaniya 11 - dhopadhola bible

Joebulaniya 11

¹Onyo bedo gi yeyo meno ŋeyo adieri nike wabino limo gigipiny ma wageno, bedo gi ridho ni wabino limo gigipiny ma wakinen.

²Yeyo pajo am'omiyo ji ma hongo m'okadho jolimo pak bongi Were.

³Yeyo ama miyo waniaŋ nike Were am'ocweyo polo gi piny munyo wodho or, m'omiyo gima nenere ocwey wok kwoŋ gima kinenere.

⁴Yeyo am'omiyo Abel ocwayo ri Were cowirok maber loyo apa Kayin. Yeyo omiyo go onwaŋo pak bongi Were paka dhano m'otire munyo Were ofoyo mic pere. Aka yeyo ama miyo Abel fodi luwo kad'otieko rigo tho.

⁵Yeyo am'ogeŋo Enoka tho. Kucel, oter go malo bongi Were, aka moro k'onyalo nwaŋo go, rupiri Were oyido otieko kadho gine. Ndiko waco ni mafodi k'oteri Enoka malo, go oyido otieko kisangala Were.

⁶Ongoye ŋata nyalo kisangala Were ma buyeyo. Kole ŋata bino bongi Were ripo bedo gi yeyo nike Were nitie aka miyo joma rango go kemba.

⁷Yeyo am'omiyo Nowa owinjo wac pa Were kwoŋ gigipiny ma go oyido fodi k'oneno. Go owinjo Were, to geto ye ma go gi peco pere joboth'iye. Ro yeyo pere go okwero reco m'oyido timere i piny, aka olimo bongi Were tiro ma wok i yeyo.

⁸Yeyo am'omiyo Abraham winjo munyo Were olwoŋo go, to kidho i piny ma Were ociko miyo go. Oweyo piny pere munyo kiŋey ni kidho yukune.

⁹Ro yeyo pere, go obedo i piny ma Were ociko go paŋini jawiloka. Go obedo i wema paka Isaka kodi Yakobo jotimo, ma bende jolimo cikirok bongi Were.

¹⁰Kole Abraham oyido kuro tindi ma Were ama oyiko gi gero; tindi ma tiendi geto mere yindira.

¹¹Yeyo am'omiyo Abraham olokere bajo kada go oyido oti aka Sara oyido kinyal limo nyithindho. Go ogeno Were ni bino kuro cikirok pere.

¹²Kada go oyido cale p'otho, wok kwoŋ ŋat'acel me nyithindho onywole mathoth paka micalin ma polo, mathoth paka nyingi kwoyo ma dho nam.

¹³Ji me je cango jotho i yeyo. Jok'olimo gima Were ociko, to joneno gigipiny me gi bor to jojolo, aka joyeyo kamaler nike jo oyido jobedo jowiloka ma cale pa jom'obwok koth i piny.

¹⁴Ji ma jowaco gigipiny me jonyutho kamaler nike jorango piny pajo wegi.

¹⁵Jok'oparo piny ma joweyo; bedi jotimi ameno di jolimo hongo ma gik.

¹⁶Kucel, oyido jomiyo piny maber loyo, m'obedo piny manyapolo. Am'omiyo Were wiye kikwoti lwoŋirok ni Were pajo, rupiri otieko yiko rijo tindi.

¹⁷Yeyo am'omiyo Abraham, munyo Were otemo go, ocwayo wode Isaka paka cowirok. Abraham, ma Were oyido otieko kiri timo gine cikirok, oyeyo miyo wode paka cowirok.

¹⁸Were oyido otieko kiri ciko go ni, “Ibino limo nyikwayin kwoŋ Isaka.”

¹⁹Abraham oparo nike Were nyalo cerino dhano kwoŋ jom'otho. Am'omiyo i kite ma luwo, cal pa Abraham ojolo Isaka munyo wok bongi jom'otho.

²⁰Yeyo am'omiyo Isaka omiyo Yakobo gi Esau silwany i kwo pajo ma yuwaŋe.

²¹Yeyo am'omiyo Yakobo omiyo nyithindho pa Yozefu silwany mafodi go k'otho; othenere kwoŋ luth pere to lamo Were.

²²Yeyo omiyo Yozefu munyo cegin tho, oluwo kwoŋ eye pa Joisiraili i piny Misir, to weyo wac kwoŋ gima joripo timo gi delkwoŋe.

²³Yeyo am'omiyo jonywol pa Musa jokano go dwe adek munyo otiek nywolo go, rupiri oyido joneno nike go nyathi maŋon, aka jok'olworo cayo or pa kere.

²⁴Yeyo am'omiyo Musa, munyo odongo, okwero nike wokiri wolwoŋi go ni wod pa nyapa Farawo.

²⁵Go ofoyo candirok gi ji pa Were loyo bedo i siem ma gimarac cowo nyaka hongo macek.

²⁶Go oparo ni candirok yet ri Kristo onwaŋo ber loyo ŋaŋo ma Misir; rupiri go oyido oketho waŋe kwoŋ kemba ma bino.

²⁷Yeyo am'omiyo Musa oweyo Misir ma k'olworo nge pa kere; go ociro rupiri oyido neno Were ma kinenere.

²⁸Yeyo am'omiyo go oketho cik ma kalima ma Kadho, gi wodho or ni wokiri remo kwoŋ thigin, aka nyaka malaika ma tho wokiri woneki nyithindho pa Joisiraili makayo.

²⁹Yeyo omiyo Joisiraili jokalo Malawa M'obokere paŋini wi lowo m'othwo; munyo Jomisir jotemo timo ameno, pi omwonyo jo woko.

³⁰Yeyo omiyo kor cel ma Yeriko ogore piny munyo Joisiraili jothoko cel no cowo ndelo abirio.

³¹Yeyo omiyo Rahab m'oyido tana delkwoŋe i timo giwickwot, obothi aneka gi joma jokwero winjo Were, rupiri go ojolo jopendo maber.

³²Onyo anomedere kendo waco aŋo? Hongo kirom ran ma luwo kwoŋ Gideon, Balak, Samson, Yefitha, Daudi, Samwiri, kodi jotuci wac.

³³Yeyo omiyo jolwenyo gi piny pa jowiloka m'omore to joloyo lweny. Jotimo gim'otire to jolimo gima Were ociko jo; joculo kiri dhok simbwor,

³⁴joneko woko mac mager, to joboth aneka g'abor. Jo oyido jonyap to jolokere jomeni. Jolokere matek i lweny to jonyalo woko Lwak jolweny pa jowiloka.

³⁵Yeyo omiyo ocerino ri mon ji pajo m'onwaŋo jotho. Joman ocandi jo to jokwero woko kiri siem, to jotho i litho ŋey wocerino jo i kwo maber loyo.

³⁶Joman oyeti jo t'icwado jo, aka joman otwey jo gi lijegere t'ibolo jo i jiera.

³⁷Ogoy jo gi telin; obar jo diere to jopokere ario, oneki jo kodi abor. Jothoko piny i pien rombo gi diegi munyo jonitie i candi, olweny gi jo, t'itimo jo marac.

³⁸Piny oyido kiber rijo odoco! Jolera i dier thim kodi wi gote, munyo jobedo i ŋungu kodi i buce piny.

³⁹Jome je Were ofoyo jo ro yeyo pajo, to kad'ameno je jok'olimo gima Were ociko,

⁴⁰rupiri Were oyido oridho riwan can maber loyo. Atoŋa pere oyido obedo nike jono bende woloki jo m'olony kicutho kiromo gi wan.