Read dhopadhola Joebulaniya 2 Bible Online

Joebulaniya 2 - dhopadhola bible

Joebulaniya 2

¹Am'omiyo, waripo cwirok matek kwoŋ adieri ma watieko winjo aka nyaka gimoro k'orweny wan.

²To k'inen mikwenda ma jomalaika cango jomiyo oter paka otire, aka ŋata k'otiyo gine i ndir no omiy gir'acula m'oripo gine,

³onyo wanobothi nedi ka wacayo both madwoŋ me? Rwoth won gipi ama otelo luwo kwoŋ both me, aka nyaka joma jowinjo go joridho riwan ni obedo adieri.

⁴Aka Were bende omedo ridho wac no gi ranyuth, gi meni, gi gir'aura m'opokere opokere, gi mic pa Cuny Maleŋ m'opoko paka won oyenyo.

⁵Kole Were k'oketho jomalaika bedo jodhum i piny ma bino yuwaŋe.

⁶Kucel, owaci kamoro i Ndiko Maleŋ ni, “Dhano bende aŋo, awi Were, ma d'ipar kwoŋe? Dhan'adhana bende aŋo, ma d'idew kwoŋe?

⁷Iloko go nyaka ma hongo macek bedo ma piny loyo jomalaika, t'imiyo go dwoŋ gi wor,

⁸aka iketho gimoro je i par tiende ni wodhum.” “Iketho gimoro je i par tiende, me nyutho ni go dhumo gimoro je. To pama fodi wakinen paka dhano dhumo gimoro je.

⁹To kole waneno Yesu, ma i hongo macek oloki go ma piny loyo jomalaika, paka orwaki rigo sangaria madwoŋ gi wor rupiri ocandere i tho, ni ŋey kwoŋ nema pa Were go wonyali tho ri ji je.

¹⁰Onwaŋo otire ri Were, m'ocweyo aka kuro gimoro je, miyo Yesu ma telo ji i both, cowo tic no gi candirok, ŋey wote mathoth jowolimi dwoŋ.”

¹¹Ato ŋata loko ji maleŋ kodi joma iloko jo maleŋ, je jonigi Ba gin acel. Am'omiyo Yesu ongoye giwickwot lwoŋo jo ni wutmin go.

¹²Go owaco ni, “Were, abino luwo kwoŋin ri wutmera. Abino pakin i cokirok pajo.”

¹³Go odoko owaco ni, “Abino ketho geno paran i Were.” Aka owaco kendo ni, “E anika gi nyithindho ma Were omiyan.”

¹⁴Paka nyithindho obedo ma del gi remo, Yesu bende olokere paka jo i del, aka nyaka i tho pere worey woko jwogi, manitie gi meni kwoŋ tho,

¹⁵ŋey wogonyi ji m'oyido jobedo ŋecin ro lworo tho.

¹⁶Kole gime neno kamaler ni ki jomalaika ama go konyo, to paka Ndiko waco, “Go konyo nyikway Abraham.”

¹⁷Riameno, onwaŋo yenyere go wolokere paka wutmin i royo je, ŋey go wobedi jadwoŋ pa jocway ri Were i wi migam man gi wor kendo ma genere i tic pere ri Were, aka nyaka wogeŋ keme pa Were ri reco pa ji ŋey wocwaki jo.

¹⁸Aka go onyo pama nyalo konyo joma jolimo karatem, rupiri go won bende olimo karatem aka ocandere.