Read dhopadhola Joebulaniya 3 Bible Online

Joebulaniya 3 - dhopadhola bible

Joebulaniya 3

¹Riameno wutmera i Kristo, ma bende Were am'olwoŋo, kethi paro mewin kwoŋ Yesu, m'obedo jamoor kendo jadwoŋ pa jocway ri Were i wi migam, ma konyo yeyo ma watuco ni wanigine.

²Kole go ogenere ri Were, m'oyero go timo tic me, paka Musa bende oyido ogenere i tic pere i Ot pa Were gipi.

³Kucel Yesu ripo gi dwoŋ maloyo apa Musa, paka jager ot dwoŋ loyo ot ma go ogero.

⁴Ato ot je dhano ama gero, to Were ama ogero kisi gimoro.

⁵Aka Musa cango obedo ŋat'ogenere i Ot pa Were paka jatic, aka otuco gigipiny ma Were oyido kidho luwo kwoŋe rumacen.

⁶To Kristo ogenere paka Wod Were ma kuro ri Were ot. Aka kole waŋati wabedo ot pere ka wamedere gi miseni mawan kodi ridho geno ma wapakere gine.

⁷Kole Cuny Maleŋ waco ni, “Ka wiwinjo dwondi Were konon,

⁸wikiri witim wictek paka cango witimo munyo ji mewin jokwedere kwoŋ Were, i hongo ma karatem i dier thim

⁹kama kwarere pajo joteman'iye, kad'oyido jotieko neno tic paran.

¹⁰Gino am'omiyo amako nge gi jono, t'awaco ni, ‘Ndiri je cuny jo kelo rijo rwenyo, aka fodi jokuya royo paran.’

¹¹Am'omiyo amako nge t'akwoŋere ni, ‘Jok'onyal donjo i ywomirok paran!’ ”

¹²Kure win, jowotan, aka moro kwoŋ win wokiri wobedi gi cunye marac ma kiyey ma eye woko kwoŋ Were makwo.

¹³Kucel, wiripo kweyo cuny wadi win kisi ndelo, tekin ilwoŋo ndelo no ni konon, ŋey moro kwoŋ win wokiri wowondi gi gimarac to lokere ŋata wiye tek.

¹⁴Kole wajoje wabedo jowoti Kristo, ka wacwire matek i yeyo tundo i gike.

¹⁵Me a gima ndiko waco: “Ka wiwinjo dwondi Were konon cuny win wokiri wobedi matek paka cango obedo munyo wikwedere kwoŋ Were.”

¹⁶To kere ŋa gin ma cango jowinjo dwondi Were to jokwedere kwoŋ go? Jok'obedo ji je ma Musa owodho wok Misir?

¹⁷Kere jokune ma Were omako gi jo nge cowo oro piero aŋwen? Go k'omako nge gi ji ma jotimo gimarac, omiyo jogore piny to jotho i dier thim?

¹⁸Aka Were okwoŋere gi jokune ni jok'odonji i ywomirok pere makiweno joma jotimo rigo wictek no?

¹⁹Onyo waneno ni jok'onyalo donjo rupiri jok'oyeyo.