Read dhopadhola Joebulaniya 4 Bible Online

Joebulaniya 4 - dhopadhola bible

Joebulaniya 4

¹Onyo, Were otieko weyo riwan cikirok nike wanyalo donjo i ywomirok pere. Am'omiyo, wagwokere win, aka moro kwoŋ win wokiri wokeŋ donjo i ywomirok no.

²Kole wabende watieko winjo Wac Manyen Maber, paka jo; to wac ma jowinjo k'otimo rijo bero moro, rupiri munyo jowinjo jok'ojolo gi yeyo.

³Am'omiyo wan ma wayeyo, wadonjo i ywomirok no paka Were owaco ni, “Amako nge t'akwoŋere ni, ‘Jokibino donjo i ywomirok paran!’ ” Meno a gima go owaco, kada tic pere oyido orumo wok cuka go cwey piny.

⁴Me a gim'owacere kamoro i Ndiko Maleŋ kwoŋ ndelo mar'abirio: “Were oywomere i ndelo mar'abirio kwoŋ tic pere je.”

⁵Aka kenyo odoko owac'iye ni, “Jokibino donjo i piny ma d'amiy'iye jo ywomirok!”

⁶Joma jopen winjo wac pa Were jok'onyalo nwaŋo ywomirok no; rupiri jok'oyeyo am'omiyo nitie joman m'oyey jo limo kaywomirok me.

⁷Aka Were odoko oketho ndelo man m'ilwoŋo ni, konon, ma cango oluwo kwoŋe rumacen gi i dhok Daudi, i wac m'otiek nyutho ni, “Ka wiwinjo dwondi Were konon, wikiri wicay go.”

⁸Rupiri bedi Yosuwa tieki miyo ji ywomirok, di Were k'oluwo kendo kwoŋ ndelo man.

⁹To paka nitie, fodi odoŋ ri ji pa Were ywomirok ma Sabato.

¹⁰Kole dhano je ma donjo i ywomirok pa Were bende won ywomere kwoŋ tic pere paka Were cango oywomere kwoŋ tic pere.

¹¹Am'omiyo, weyi watem paka wanyalo donjo i ywomirok no. Kiripi moro kwoŋ wan cayo dwondi Were paka jotimo, to wakeŋ donjo.

¹²Kole wac pa Were kwo aka tiyo. Bith loyo abor ma nyalewe ario. Thumo kiri kama paro kodi cuny jorom'iye, gi kama kumbo kodi more joriwer'iye. Niaŋ kwoŋ awanya kodi paro pa ji ma iy'adundo.

¹³Ongoye gima nyalo panere ri Were. Gimoro je i cwec othangere aka oyare i waŋe, go ma wabino tito kwo mawan ruwaŋe.

¹⁴Weyi wacwire matek kwoŋ yeyo ma watuco ni wan gine, paka kere wanitie gi jadwoŋ mapa jocway ri Were i wi migam, m'oasere gi dwoŋ m'obedo Yesu Wod Were won, m'otieko kidho i polo.

¹⁵Jadwoŋ pa jocway ri Were i wi migam, mawan me, k'obedo ŋata kiniaŋ nyapo mawan. Kucel, wanitie gi jadwoŋ pa jocway ri Were i wi migam ma bende olimo karatem i royo je paka walimo, to k'otimo gimarac.

¹⁶Am'omiyo, weyi wabedi miseni, aka wakidhi ro nyim kom pa Were ma dhum, kama nema nitie i iye. Kenyo wabino lim'iye wor to wanwaŋo ŋono manyalo konyo wan i hongo ma wayeny'iye.