Read dhopadhola Joebulaniya 5 Bible Online

Joebulaniya 5 - dhopadhola bible

Joebulaniya 5

¹Kisi jadwoŋ pa jocway ri Were i wi migam je iyero wok kwoŋ ji aka imiyo go tic ma tiyo ri Were kapa jono. Go cwayo ri Were mic kodi cowirok ri reco pa ji.

²Paka go won bende nyap i royo m'omore, go nyalo tiyo gi mwolo ri joma nyap ma jonyalo rwenyo.

³Aka paka go won nyap, go cowere ki nyaka ri reco pa joman kende, to ri reco pere bende.

⁴Aka ongoye ŋata won yero dwoŋ ma bedo jadwoŋ pa jocway ri Were i wi migam; bedo ri lwoŋo pa Were won, paka cango olwoŋi Aron.

⁵Meno apaka Kristo won bende k'omiyere dwoŋ ma bedo jadwoŋ pa jocway ri Were i wi migam. Kucel, Were ama owaco rigo ni, “In i Wodan; konon alokere Benin.”

⁶Go owaco kendo kaman ni, “Ibedo jacway ri Were i wi migam cil gi cil, i cal pa Melikizedek.”

⁷I kwo pere i piny ka, Yesu odhiro kwayo kodi ywakirok pere gi pigi waŋe munyo koko malo ri Were, ma d'onyalo botho go kwoŋ tho. Aka Were owinjo go, rupiri go oyido ŋata mwol ma winjo Were.

⁸Kada go oyido obedo Wod Were, go ofonjere winjo Bamere i candirok pere.

⁹Aka munyo otiek lonyo go kicutho, go olokere jakeli kwo makirum ri ji je ma jomako wac pere;

¹⁰aka Were oketho go bedo jadwoŋ pa jocway ri Were i wi migam i cal pa Melikizedek.

¹¹Nitie wac kweth ma wanyalo waco kwoŋ gime, to tek tito riwin, rupiri wibolbol i niaŋ gim'ifonjo win.

¹²Kabedo ma di wibedi jofonji, odoko fodi yenyere moro wofonji win ayino adieri pa Were m'icako gine! Kama di wicam'iye cemo pa jom'otegino, fodi wiyenyo cak amadha ayino!

¹³Ŋata madho cak, meno fodi nyathi ma kuya poko gim'otire kodi gima k'otire.

¹⁴To cemo manwaŋ, obedo apa jom'otegino ma jotieko ŋeyo poko gima beyo gi reco.