Read dhopadhola Joebulaniya 6 Bible Online

Joebulaniya 6 - dhopadhola bible

Joebulaniya 6

¹Am'omiyo, weyi wamedere gi fonji m'otegino wawey woko fonji ma cako ma mako kwoŋ Kristo, aka wakiri wagiki kendo i fonji ma cako: Kole wiŋeyo paka wiripo ŋuto kwoŋ tic m'othotho to wimedere gi yeyo Were.

²Watieko fonjo win kwoŋ batisimo kodi ketho cingi jo kwoŋ ji; kwoŋ cerino pa jom'otho kodi thumo banja ma cil gi cil.

³Weyi wakidhi yumalo. Aka meno a gima wabino timo ka Were oyeyo.

⁴Aka tek swa dwoko jom'opodho miyo jo ŋuto kendo, rupiri yado onwaŋo jonitie i lero pa Were, aka jobilo kiri mic ma polo to jolimo pok pajo ma Cuny Maleŋ.

⁵Jotieko bilo bero ma Wac pa Were kodi meni ma bino bedo i hongo ma bino yuwaŋe.

⁶To ka jopodho, dwoko jo kendo i ŋuto bedo gimatek, rupiri joguro Wod Were kwoŋ musalaba kendo aka jothango go kamaler ri wickwot i waŋ ji.

⁷Lowo ma madho koth ma cwe noknok aka dongo gima twi ma konyo joma jopidho ama Were miyo silwany.

⁸To lowo ma kelo kudhin kodi doy meno bukony: Odamba ri kwoŋ, aka rumacen ibino waŋo woko.

⁹To kada waluwo ama, merin mawan ma swa, wageno riwin gigipiny mabeyo ma both kelo.

¹⁰Were k'obedo ŋata cunye k'otire. Wiye k'owil kodi tic ma witieko timo, kosa mar ma witieko nyutho go i kony ma wimiyo i konyo ji pere aka fodi wimedere konyo jokristo jowoti win.

¹¹Wamito ni kisi dhano kwoŋ win wonyuthi kinen no kiri i gike, aka nyaka gigipiny ma wigeno bino bedo adieri.

¹²Wakimiti nike wilokere manyap, to bedi win paka joma joyeyo ma jodiyo cuny jo cuka jolimo gima Were otieko ciko.

¹³Munyo Were otimo cikirok kodi Abraham, okwoŋere munyo oro nyinge won paka oyido ongoye nyatoro maloyo go gi dwoŋ.

¹⁴Go ociko ni, “Abino miyin silwany ma limo nyikwayin mathoth.”

¹⁵Aka munyo Abraham okudere to kuro, go olimo gima Were ociko.

¹⁶Kole dhano ka kwoŋere oro nyingi nyatoro maloyo go gi dwoŋ, aka kiti kwoŋirok no cowo piem je i dier ji.

¹⁷Onyo Were bende omito nyutho jom'oyido jokidho limo gima go ociko, maber m'oloyo, nike go kilawiro atoŋa pere, am'omiyo go omedo ridho cikirok no kodi kwoŋirok.

¹⁸Were ooro gigipiny ario me (cikirok kodi kwoŋirok) ma kinyal wire, odoko ma go kinyal twodo kwoŋe, ma nyutho gino. Am'omiyo wan ma watieko limo kagoŋirok bonge wanyalo nwaŋo miseni madwoŋ ma cwirok matek kwoŋ geno m'oketh ruwaŋ wan.

¹⁹Wanitie gi geno me paka loc ma juko ye mol, ri cuny wan, m'ogur piny to moko matek, aka donjo to kalo woko nanga m'olier ma Ot pa Were ma polo kiri denge i kisika maleŋ ma iye.

²⁰Yesu otieko telo donj'iye riwan ka waŋ wan, paka jadwoŋ pa jocway ri Were i wi migam cil gi cil i cal pa Melikizedek.