Read dhopadhola Joebulaniya 7 Bible Online

Joebulaniya 7 - dhopadhola bible

Joebulaniya 7

¹Melikizedek me oyido obedo kere ma Salem kodi jacway ri Were Madwoŋ Maloyo. Munyo Abraham oyido dwoko i lweny ma go onek'iye kerin moro kenyo Melikizedek oromo gine to miyo go silwany.

²Gikenyo, Abraham omiyo go acel wiy apar ma gimoro je m'oyido go nitie gine. (Dwoŋ nyingi Melikizedek marapena obedo, “Kere ma Tiro.” Aka go oyido odoko obedo kere ma Salem, madwoŋ mere nyutho ni, “Kere ma Siem.”)

³K'otuci ba Melikizedek kosa yokimere, kosa moro kwoŋ kwarere pere; k'otuci nywolirok pere kosa tho pere. Go cale Wod Were m'obedo jacway ri Were cil gi cil wi migam.

⁴Wineno paka go onwaŋo dwoŋ? Kiri Abraham m'obedo kwari nono je omiyo go acel kwoŋ apar ma gimoro je ma go onyaga i lweny.

⁵Kole Cik yeyo nyikway Levi ma jobedo jocway ri Were i wi migam coko acel wiy apar ma gigipiny kwoŋ ji ma Isiraili. Meno nyutho ni jocoko kwoŋ ji pajo wegi, kada bende jobedo nyikway Abraham.

⁶Melikizedek me k'onywol i nono pa Jolevi, to ocoko acel wiy apar kwoŋ Abraham aka omiyo go silwany paka ŋat'oyido nigi cikirok pa Were.

⁷M'ongoye kiganagana, ŋata miyo silwany dwoŋ loyo ŋata limo silwany pere.

⁸To ma mako kwoŋ jacway ri Were i wi migam, waneno ni Jolevi ma cango jocoko acel wiy apar ma lim jobedo joma tho, to ma mako kwoŋ Melikizedek, ŋata kwo paka ndiko waco ama coko.

⁹Wanyalo waco ni munyo Abraham oculo acel wiy apar, nyutho ni Levi (ma nyikwaye jocoko acel wiy apar) bende oculo gino luwo i cingi Abraham,

¹⁰rupiri Levi oyido fodi k'onywol paka go oyido fodi nitie kwoŋ kwari mere Abraham munyo Melikizedek oromo kodi Abraham.

¹¹Cungo kwoŋ tic pa Jolevi ma cwayo ri Were i wi migam ama owodh'iye Cik ri ji ma Isiraili. Onyo ka tic pa Jolevi oyido ber, raŋo odoko jacway ri Were i wi migam man oyenyere ma cale gi Melikizedek, makiweno kodi Aron?

¹²Kole ka owir cik ma yero jocway ri Were i wi migam, meno wirok ripo bedo i Cik pa Musa bende.

¹³Aka Rwodhiwan m'iluwo kwoŋe gigipiny me, oyido janono m'opokere; aka ongoye janono pere moro je m'oyido otieko ye tic paka jacway ri Were i wi migam.

¹⁴Kole oŋeyere maber paka Rwodhiwan onywole i nono pa Yuda; aka Musa k'otuco nono me munyo luwo kwoŋ jocway ri Were i wi migam.

¹⁵Wac no omedo nyuthirok kamaler rupiri jacway ri Were i wi migam man onenere, ma cale Melikizedek.

¹⁶K'okethi go bedo jacway ri Were i wi migam i cik ma mako kwoŋ bol ma nywolirok pa ji; go olokere jacway ri Were i wi migam i meni pa ŋata nigi kwo m'ongoye gike.

¹⁷Ato ndiko waco ni, “Ibino bedo jacway ri Were cil gi cil wi migam, i cal pa Melikizedek.”

¹⁸Am'omiyo, cik macon okethi gicen, rupiri oyido nyap aka ongoye kony.

¹⁹Kole Cik pa Musa di k'onyalo loko gimoro m'olony kicutho, to pama otiek kelo geno maber ma miyo wan tundo bongi Were.

²⁰Aka gino k'otimere m'ongoye kwoŋirok mere bende. Joman je oloki jo jocway ri Were i wi migam m'ongoye kwoŋirok moro.

²¹To Yesu olokere jacway ri Were i wi migam i royo ma kwoŋirok, munyo Were owaco rigo ni, “Rwoth okwoŋere aka k'owir paro pere: ‘Ibedo jacway ri Were i wi migam cil gi cil.’ ”

²²Am'omiyo, kwoŋirok no loko Yesu paka raridh ma ridho cikirok maber maloyo macon.

²³Nitie kendo pokirok man: Joman ma jocwayo ri Were i wi migam no, oyido jomore rupiri oyido jotho ma jok'onyalo medirok gi tic pajo.

²⁴To paka Yesu kwo cil gi cil, tic pere paka jacway ri Were i wi migam odoko kikodi ri ŋatiman.

²⁵Am'omiyo, go nyalo botho kicutho joma kidho bongi Were kodi bonge, rupiri go kwo cil gi cil ma pido gi Were rijo ndelo je.

²⁶Jadwoŋ pa jocway ri Were i wi migam, ma kite no, ama nyalo konyo wan i gima wayenyo. Ato go leŋ, ongoye kodi kibenga kosa gimarac moro, olony, m'opok kwoŋ joreco, aka otiŋ go malo kalo polo.

²⁷Go kicale jodongo pa jocway ri Were i wi migam man; go kiyenyere cowirok wi migam ndelo je: Ni kutho ri reco pere won, aka nyaka wocowere ri reco pa joman bende. Go ocowere wi migam dicel kende to makicutho, munyo go won omiyere paka cowirok.

²⁸Cik pa Musa ketho dhano m'obedo gima nyap bedo jadwoŋ pa jocway ri Were i wi migam; to wac ma kwoŋirok pa Were, m'obino rumacen yuŋey Cik, oketho Wod Were won m'otiek loko m'olony kicutho cil gi cil.