Read dhopadhola Joebulaniya 8 Bible Online

Joebulaniya 8 - dhopadhola bible

Joebulaniya 8

¹Me a gimadwoŋ kwoŋ gima wawaco: Wanitie gi jadwoŋ pa jocway ri Were i wi migam, ma kiti dwoŋ pere omiyo go bedo yuracuc ma kom ma dhum pa Were Madwoŋ Ma urere i polo.

²Aka go tiyo paka jadwoŋ pa jocway ri Were i wi migam i Kabedo Maleŋ M'oasere, m'obedo wema mar'adieri ma Rwoth ama ogero, makiweno dhano.

³Kisi jadwoŋ pa jocway ri Were i wi migam je okethi ni wocwayi mic kodi le paka cowirok ri Were: Am'omiyo jadwoŋ pa jocway ri Were i wi migam me bende oyido ripo bedo kodi gi mic m'amiyo.

⁴Bedi go nitie i piny ka, dikibedi jacway ri Were i wi migam, rupiri nitie joman ma jocwayo mic i Cik pa Joyuda.

⁵Jono jocwayo i kalamo pa Joyuda m'obedo nyaka cal kodi tipo pa gima nitie i polo. Meno am'omiyo ocik Musa munyo go oyido cegin gero wema pa Were ni, “Neni nike itimo gimoro je i cal m'onyuthin wi got.”

⁶To, paka nitie, omiy Kristo tic ma bedo jadwoŋ pa jocway ri Were i wi migam madwoŋ swa loyo apajo, paka cikirok ma go otimo i dier ji kodi Were bende ber loyo macon, kwoŋbedo ocungo kwoŋ cikirok ma gigipiny mabeyo loyo.

⁷Bedi raco moro oyido ongoye i cikirok marapena, di mar'ario k'oyenyere.

⁸To Were onwaŋo raco kwoŋe am'omiyo owaco ama: Rwoth waco ni hongo bino, m'abino tim'iye cikirok manyen gi Joisiraili kodi jonono pa Yuda.

⁹Cikirok no kilabedo paka m'atimo gi kwarere pajo munyo amako cingi jo t'awodho jo woko i piny Misir, rupiri jok'obedo gi genirok kwoŋ cikirok m'atimo gi jo, am'omiyo aeye kwoŋ jo.

¹⁰Onyo me a cikirok m'abino timo gi ji ma Isiraili ka ndelo no okadho, abino ketho cik paran i paro pajo, odoko abino ndiko cik no i cuny jo to abedo Were pajo, aka jobino bedo ji paran.

¹¹Ongoye moro kwoŋ jo ma bino fonjo nyawote kendo kosa waco ri nyawote ni, “Ŋey Rwoth.” Me kwoŋbedo joje jobino ŋeyan, wok kwoŋ ŋatathin loyo, tundo kwoŋ ŋatadwoŋ loyo.

¹²Abino cwako reco pajo, akibino poyo reco pajo kendo.

¹³Munyo oluwo kwoŋ cikirok manyen me, Were oloko marapena ca gima orumo tic; aka gimoro je m'orumo tic aka otieko ti, bino rere woko.