Read dhopadhola Yakobo 1 Bible Online

Yakobo 1 - dhopadhola bible

Yakobo 1

¹Balwa m'owok bongi Yakobo, jatic pa Were kodi apa Rwoth Yesu Kristo. Ri nonin apar g'ario, ma jotiakere i piny gipi: Amotho win!

²Jowotan, ter win paka silwany ka wiromo gi teko m'omore omore,

³rupiri wiŋeyo ni ka yeyo mewin otemi aka wok'iye meni ma ciro gimoro.

⁴Ciro ripo cowo tic pere i kwo mewin aka ŋey winyal tegino i yeyo ma wicowere, munyo wikicandi gimoro.

⁵To ka moro kwoŋ win cando rieko, go ripo kwayo Were, m'amiyo dhano je gimoro ma k'obuyo kendo ma k'oŋunyaŋunya, aka bino miyin.

⁶To ŋato ripo kwayo gi yeyo, ma k'oganagana, rupiri ŋata ganagana cale pi ma tula i nam ma koyo kwadho aka wito koro.

⁷Ŋata pameno wokiri wopar nike bino limo gimoro bongi Rwoth,

⁸kwoŋbedo go nigi paro ario, aka kiridhi paro i gimoro je ma go timo.

⁹Omin ma jacandi wosangala gi kabedo m'omiy go ma malo i yeyo,

¹⁰aka omin ma jaŋaŋo bende wosangala gi kabedo pere ma piny. Kole jom'oŋaŋ jobino leny woko paka ŋono pa thiw dudi.

¹¹Ato ceŋ wok gi lietho mathoth to waŋo woko dudi; thiwe oy woko, to ŋono mere nyekere woko. Meno bende apaka ibino reyo woko jaŋaŋo munyo go yindin gi tic pere.

¹²Jasilwany a dhano ma cwire i yeyo i ndir ma tem, rupiri ka go onyalo loyo tem, bino limo sangaria ma kwo, kemba ma Were otieko ciko jom'omaro go.

¹³Ka dhano olimo karatem i tem ma cale ameno, wokiri wowaci ni, “Ratem no wok bongi Were.” Rupiri reco kinyal kelo ri Were karatem, odoko Were won kikel ri nyatoro karatem.

¹⁴To dhano je nwaŋo karatem k'awanya pere marac won ywayo cunye to tero go i karatem.

¹⁵Aka awanya no medere nywolo gimarac; aka ka gimarac ocowo tegino, to nywolo tho.

¹⁶Kiri wowondi win, wutmera.

¹⁷Mic maber kodi maŋon je wok i polo; wok bongi Were Baba, jacwey lero ma polo, aka go kiwire korin gi korin pa tipo yath.

¹⁸I mito pere won, go onywolo wan manyen gi wac pere mar'adieri, ŋey wabedi paka olemo pere m'onyak marapena kwoŋ cwec pere je.

¹⁹Maki win wac me, wutmera. Dhano je ripo bedo mayil i winjo, ma kikwakere gi luwo, aka kimaki nge piyo.

²⁰Kole nge pa dhano kikony go limo kwo m'otire ma Were yenyo.

²¹Am'omiyo, bol win woko kite makoc kodi reco ma wimore gine. Aka wijoli gi mwolo wac ma go pidho i cuny win, manyalo botho win.

²²Bedi win joma ketho wac i tim, makiweno joma wondere gi nyaka winjo awinja wac won kende.

²³Kole ŋata winjo wac to kikethi i tim cale dhano ma ŋiyere i ndewiro to nenere paka go cale,

²⁴to ka otieko nenere, kadho to piyo piyo wiye wil gi cal pere.

²⁵To ŋata kaŋasa cik m'otire ma ketho ji i siem, aka medo ketho paro pere kwoŋe, ma kiciki ithe kende to wiye wil, to go ketho wac i tim, ŋato Were bino miyo silwany i gima go timo.

²⁶Ka nyatoro paro ni go ŋat'oyeyo, to kucel kikur lewe meno yeyo pere ongoye kony aka go won wondere.

²⁷Yeyo ma Were Bawan tero paka yeyo m'otire m'ongoye rendirok a me: Kuro nyithindho kic kodi mon ma cwogi jo otho i candirok pajo, gi kurok kwoŋ reco ma piny.