Read dhopadhola Yakobo 3 Bible Online

Yakobo 3 - dhopadhola bible

Yakobo 3

¹Jomathoth kwoŋ win kiri jowolokere jofonji, wutmera gi nyimin, rupiri wiŋeyo ni wan ma wafonjo ibino thumo riwan banja m'onuŋ loyo joman.

²Wajoje ndir madit wapodho. Dhano ma kipodhi i luwo pere meno dhano m'otire kicutho, manyalo dhumo kwo pere gipi.

³Ka wariwo yath moro i dhok kayina ma miyo jowowinji wan, wanyalo miyo jokidho kama wayenyo je.

⁴Kosa neni kwoŋ mel i wakawaka; kada dwoŋ ameno aka koyo mathoth ama tero go, to nyaka gimathin moro ama leko go, aka kidho kama jatero mito ni wokidh'iye.

⁵Me bende apaka nitie gi lew jo: Kada thin rigo ameno, to nyalo luwo wac ma yumirok madongo swa. Pari paka nyaka mac m'ondhilo nyalo waŋo lul m'ombo!

⁶Lew jo bende cale mac. Obedo dak reco manitie gi kabedo i delkwoŋ wan aka nyayo reco i kwo mawan gipi; go moko mac i kwo mawan gipi, aka go won bino waŋ i mac makitho.

⁷Dhano otieko nyalo dhumo ogwaŋe ma nger je, winyin, gima mol gi kore, gi rec ma pi je, to loko jo mamwol.

⁸To ongoye moro manyalo dhumo lewe maber. Lew jo obedo gimarac ma kikudere, aka thoth gi kwir.

⁹Waoro lew wan ma pako Rwoth gi Bawan odoko waoro lew wan acel no won ma kwoŋo dhano m'ocwey i cal pa Were.

¹⁰Wac ma pako kodi ma kwoŋo nyatoro je wok i dhok dhano acel no won. Wutmera, gime oyido kiripi timirok ameno.

¹¹Wiparo ni waŋ pi acel nyalo wodho pi mamit kiri gi makec bende?

¹²Wutmera, makuyu nyalo nyak gima nyak pa vini, kosa yath vini nyalo nyak nyandere pa makuyu? Riameno waŋ pi ma cumbi kinyal wodho pi mamit.

¹³Ŋa kwoŋ win kenyo mariek kendo ma niaŋ? Ere wonyuthi rieko no gi kwo pere m'otire, gi tim pere ma nyutho bwonirok kodi rieko.

¹⁴To ka wipoŋ gi nyeko kodi mito ici, wikiri wipakere gine odoko wikiri wikwer adieri.

¹⁵Rieko ma cal ameno kiwoki i polo; t'obedo ma piny ka, ki ma cuny, to apa jwogi ayino.

¹⁶Kole kama di nyeko kodi mito ici, kenyo ruwirok bende niye kodi nger reco je.

¹⁷To rieko ma wok i polo olony kutho marapena; odoko kelo siem, aka nitie iye mwolo; dewo kwoŋ ji, oasere gi wor aka nywolo tim mabeyo; ongoy'iye thumo banja m'okom kosa rendirok.

¹⁸Aka joma kelo siem jokeco tiro m'opidhi i siem.