Read dhopadhola 1 Petero 2 Bible Online

1 Petero 2 - dhopadhola bible

1 Petero 2

¹Am'omiyo, weyi win miyo jowoti win litho, kodi twodo je, kosa rendirok, kosa nyeko, kosa nyeko nyingi wadi win!

²Bedi win paka nyithindho maŋic ma nyaka onywol jo, ma wiwinjo riyo ma cak m'olony ma cuny, aka ka wimadho wibino dongo i both mewin.

³Kole ndiko waco ni, “Witieko bilo bero pa Rwoth.”

⁴Biye win bongi Rwoth, tele makwo ma ji jokwero nike bukony, to Were oyero paka dikony rigo.

⁵Ato wibende wibedo telin makwo, m'onyo igero gine Ot pa Were ma cuny, kama wibino tiy'iye paka jocway ri Were i wi migam ma joleŋ, kareno wicwayo cowirok manyacuny ma Were jolo luwo kwoŋ Yesu Kristo.

⁶Ato ndiko waco ni, “Neni, pama onyo aketho tele ma tielo ot i Zayon, tele m'oyer ma diwelo; aka nyatoro je m'oyey go wiye kilakwot.”

⁷Tele me obedo ma welo madwoŋ riwin ma wiyeyo; to ri joma kiyey obedo: “Tele ma jogeto jokwero ni bukony am'olokere tele ma mako kindi ot won gipi.”

⁸Kendo ni, “Me a tele ma miyo ji jocer, Kidi ma miyo jo podho.” Jocer rupiri jokiyey Wac ca, paka ocan ni jowotimi.

⁹To wibedo ji m'oyer, jocway ri Kere wi migam, nono maleŋ, ji pa Were won, ŋey winyal pako tim pa Were ma urere, go m'olwoŋo win wok i mudho donjo i lero pere maŋon ma kiwacere.

¹⁰I hongo m'okadho oyido wikibedo ji m'oyer, to pama onyo wibedo ji pa Were; i hongo m'okadho oyido wikijolo wor pa Were, to pama onyo wijolo wor pere.

¹¹Agoyo koko riwin jowotan, paka jowiloka i piny me, ni ŋuti win kwoŋ awanya mareco, ma ndir je lwenyo gi cuny win.

¹²Kula mewin i dier joma bu Were wobedi maber ma ka jotemi kelo kwoŋ win wac ni wireco, jobino neno tim mewin mabeyo, to jopako Were i Ndelo ma bino pere.

¹³R'atoŋa pa Rwoth, winji win jodhum je ma piny; kad'obedo kere madwoŋ ma dhumo joman je,

¹⁴kosa gavana, ma go oro ma miyo jotimi reco gir'acula, gi foyo joma timo gima beyo.

¹⁵Kole Were yenyo ni tim mewin mabeyo woum luwo masisiri mapa jomamiŋ.

¹⁶Kwo mewin wobedi paka apa joma ni siem; to wikiri wiloki siem mewin ma umo reco moro je; kucel kwo mewin wobedi paka apa jotic pa Were.

¹⁷Wor win ji je: Mar win jowoti win ma joyeyo, lwor win Were, aka wiwor kere ma piny.

¹⁸Ŋecin, winji win rwodhe mewin, aka nyuthi win jo wor m'opoŋ, ki nyaka joma timo riwin maber aka joparo kwoŋ win kende, to kiri joma ger bende.

¹⁹Kole nitie kony moro ka dhano ociro litho ma candirok rupiri dwoko paro pere kwoŋ Were.

²⁰To bero aŋo ma wilimo ka wiciro goco ma ripo kodi win ka witimo reco? Kucel ka wiciro candirok kada witieko timo bero, meno ama Were miyo silwany.

²¹Were olwoŋo win ri gime, rupiri Kristo bende ocandere riwin aka oweyo riwin ranen, nike winyal luwo bathe.

²²Ndiko waco ni, “Go k'otimo gimarac moro, aka ongoye twodo m'owok i dhoke.”

²³Munyo oyeti go, k'oculo kwor; munyo ocandere, go k'opiro nyatoro, t'oketho geno pere i Were ma Jathum banja i tiro.

²⁴Go won otiŋo reco mawan i delkwoŋe wi musalaba, ŋey wabedi jom'otho ri gimarac to wakwo ri tiro; cungo kwoŋ adholin pere, witieko cango.

²⁵Ato oyido wicalo rombo m'orwenyo; t'onyo pama widwoko bongi Jakwath kendo Jakur ma cuny win.