Read dhopadhola 2 Petero 2 Bible Online

2 Petero 2 - dhopadhola bible

2 Petero 2

¹Jotuci wac ma twodo cango jobedo i dier ji pa Were, paka bende jolabino i dier win. Jobino rwako fonji ma kelo rerok, aka jobino kwedere kwoŋ Rwoth jadhum m'onyewo jo, to jokelo tho kwoŋ gin abwap.

²Jomathoth jobino mako royo pajo ma wickwot; aka ro tim pajo, jobino luwo marac kwoŋ Royo Mar'adieri.

³I woro pajo, jofonji ma twodo me jobino cemo kwoŋ win gi kigana ma wegi jocwogo. Banja pajo otiek yiko thumo wok con, aka rerok pajo bende ki nibor to nicegin.

⁴K'inen Were k'oworo jomalaika ma cango jotimo gimarac to obolo jo i mac makitho kam'otwey'iye jo i mudho, ka jokuro ndelo ma thumo banja.

⁵Odoko Were k'oworo piny macon, to okelo mikula madwoŋ ri joreco, to gwoko nyaka Nowa m'ofonjo tiro, kodi ji man abirio kende.

⁶Kole Were othumo banja ri tindi ma Sodom kodi Gomora, munyo waŋo woko jo gi mac, aka oloko jo ranen ri gima bino timere ri joreco je;

⁷kole go obotho Loti, ŋataber, ma cunye oramo swa kwoŋ kidakana pa ji m'oyido jokidew cik.

⁸(Ato jal maber no obedo i dier jo, aka kisi piny m'oyawere olimo litho i cunye munyo oneno to winjo tim pajo mareco no).

⁹Am'omiyo, kere Rwoth oŋeyo nger ma botho ji mabeyo ma jolworo Were i candirok ma temo jo, kodi weyo joreco i gir'acula pajo cuka ndelo ma thumo banja,

¹⁰kodhi joma cwire i kiti jo m'otop ma kidakana aka jocayo meni pa Were. Jofonji ma twodo me jonitie gi miseni kodi mikanyo, aka joluwere kicar kwoŋ cwec manitie i hongo malo;

¹¹ma to kiri jomalaika ma jotek aka jomeni loyo jokikel wac marac kwoŋ cwec no ruwaŋ Rwoth.

¹²To jome joluwere kicar kwoŋ gima jokuya odoco. Jocale g'ogwaŋe madudi ma jongoye gi paro, m'imako t'ineko jo, ilareyo jo woko paka ogwaŋe madudi;

¹³ilaculo jo candirok ro candirok ma jotieko kelo ri joman. Kisangala pajo obedo medho odieceŋ ma siemo delkwoŋ gin. Bedo giwickwot kendo gimarac ka jobedo dhower gi win, kareno josangala i royo pajo mareco!

¹⁴Gi waŋ gin ma neno gimoro gi cot, jogomba kisi dhako ma joneno. Awanya pajo ma timo gimarac kikwe; jodwoŋo joma nyap, aka joŋiyo timo woro. Jobedo ji m'otiek kwoŋo!

¹⁵Joweyo royo m'otire to jorwenyo munyo jomako royo ma Balam wod pa Beyor oluwo, m'onwaŋo omaro pesa ma go olimo i timo reco,

¹⁶to punda pere oay kwoŋe ro reco pere. Gino oluwo gi dwondi dhano to juko tim pa jatuci wac ma janeko no.

¹⁷Jome jocale waŋ pi m'odwono kodi pondeponde ma koyo waro; Were oyiko rijo kama dimudho tektek maloyo kaman je.

¹⁸Joluwo wac ma miŋo gi pakirok, aka jooro awanya ma delkwoŋ gin ma ciko joma nyaka joeye kwoŋ joma nitie i royo ma kelo rwenyo.

¹⁹Jociko jo siem ma to wegi jobedo ŋecin pa kite mareco; ato dhano bedo ŋeca pa gima dhumo go.

²⁰Kole k'inen oyido jotieko budhirok kwoŋ meni ma piny ma kelo tho, to joŋeyo Rwodhiwan kendo Jaboth mawan Yesu Kristo, aka odoko jomoko kendo i meni no to nyalo jo, meno kere nyutho ni jonitie marac rumacen loyo kacako.

²¹D'ober rijo ka jobedo ma jokuya royo ma tiro loyo ŋeyo royo no to odoko joweyo cik maleŋ m'omiy jo.

²²Gim'otimere gi jo nyutho ni ageca me otire ni, “Gwok odoko gik naŋo ŋok pere kendo aka mbiji m'otiek lwoko odoko gik ŋindirok i cwodho kendo.”