Read dhopadhola 2 Petero 3 Bible Online

2 Petero 3 - dhopadhola bible

2 Petero 3

¹Jowotan m'amaro, me onyo balwa mar'ario ma andiko riwin. I balwin ario me, atemo cewo paro mewin ŋey wicaki paro mathuth.

²Amito wipoy wac ma jotuci wac Were cango joluwo kwoŋe, kodi or m'owok bongi Rwoth kendo Jaboth, ma jomoor mewin jomiyo win.

³Marapena, wiripo ŋeyo nike i ndelo macowe me, jonyero jobino fudhirok ma joluwo royo mar'awanya pajo mareco gi nyero ma cay.

⁴Jobino penjo win ni, “Go ociko ni bino, k'ameno be? To ere go nikune? Bacere mawan jotieko tho, to gimoro je fodi romaroma paka oyido nitie wok cuka cwey piny!”

⁵Jotimo atoŋa paŋini jokuya ni cango con Were oluwo aka polo gi piny ocwey, aka piny ocwey wok i pi, aka gi pi.

⁶Kendo mikula pi madwoŋ am'onyiek gine woko piny macon.

⁷To gi wac no won, polo gi piny ma pama nitie okan jo ri mac; ikuro gi jo ndelo ma thumo banja ri ji ma jokilwor Were t'ireyo jo woko.

⁸To jowotan, wiy win wokiri wowili gi gimoro acel! Ri Were pokirok ongoye i dier ndelo acel kodi oro gana acel; rigo gigipiny me romaroma.

⁹Rwoth kigal gi timo gima go otieko ciko paka jomegi joparo. Kucel, go diyo cunye kodi win, rupiri go kimiti nyatoro woreyere woko, to mito dhano je wonyali ŋuto reco pere.

¹⁰To Ndelo pa Rwoth bino tundo paka jakwo. I Ndelo no polo bino leny woko gi derino madwoŋ; gigipiny ma polo bino waŋ, to regere woko, aka piny gi gima nitie iye je bino lokere m'oywere pa mbolera.

¹¹Paka gigipiny me je ibino nyeko woko, onyo wiripo bedo ji ma cal nedi? Kwo mewin ripo bedo maleŋ ma wilworo Were,

¹²munyo wikuro Ndelo pa Were to witemo miyo wobin mayot. I ndelo no polo bino waŋ woko gi mac aka lietho bino nyelo woko gigipiny manitie i iye.

¹³To wakuro gima Were otieko ciko; polo manyen gi piny manyen, kama tiro bino bed'iye pa peco pere.

¹⁴Am'omiyo, jowotan, k'onyo wikuro Ndelo no, tem win paka winyalo bedo ma wilony kendo ma bu raco ruwaŋ Were to wibedo i siem gine.

¹⁵Ŋey win ni kudirok pa Rwodhiwan, nyutho ni omiyo win hongo ma both, paka omin wan Paulo m'amaro ondiko riwin gi rieko ma Were omiyo go.

¹⁶Me a gima go waco i balwin pere je munyo ndiko kwoŋ gino. Nitie gigipiny moro matek niaŋ kwoŋe i balwin pere ma joma kuya kosa joma yengere i yeyo jofonjo kicar, paka jotimo g'adec man i Ndiko Maleŋ. Ameno wegi jokelo kwoŋ gin teko.

¹⁷To win, jowotan, paka witieko ŋeyo gime, onyo gwokere win aka moro wokiri wonyali wondo win gi fonji ma k'ago mapa joma kilwor cik to wipodho wok i kabedo m'oyido wicung'iye maber.

¹⁸To medere win gi dongo i nema kodi i ŋeyo Rwoth kendo Jaboth mawan Yesu Kristo. Dwoŋ wobedi rigo, pama kodi cil gi cil. Ameno.