Read dhopadhola 1 Yohana 1 Bible Online

1 Yohana 1 - dhopadhola bible

1 Yohana 1

¹Wandiko riwin kwoŋ wac ma kwo, m'otieko bedo wok i cakirok, ma watieko winjo odoko watieko neno gi waŋ wan, watieko kikaŋasa, aka cingi wan otieko geyo.

²Kwo no obino ma nenere; waneno am'omiyo waluwo kwoŋe, aka watito riwin kwoŋ kwo makirum m'onwaŋo nitie gi Bawan aka onenere riwan.

³Gima watieko neno gi winjo ama watito riwin bende, ŋey wibende wibedi kanyacel gi wan i riwirok ma wan gine gi Bawan kodi Wode Yesu Kristo.

⁴Wandiko gime ŋey kisangala mawan wobedi m'opoŋ.

⁵Onyo me a mikwenda ma watieko winjo bongi wod Were munyo watito riwin: Were obedo lero aka ongoye mudho i go kada mathin.

⁶Am'omiyo ka wawaco ni wanitie i riwirok gine, ma to kwo mawan nitie i mudho, meno kareno watwodo aka tim mawan ongoy'iye adieri.

⁷To ka kwo mawan nitie i lero paka go won nitie i lero, meno wanitie i riwirok gi jowoti wan, aka remo pa Yesu, Wod Were, loko wan m'olony kwoŋ reco je.

⁸Ka wawaco ni wangoye gi reco, meno wawondere aka adieri ongoye i wan.

⁹To ka watuco reco mawan ri Were, go genere kendo otire aka bino cwako reco mawan, to lonyo wan kwoŋ tim mawan mareco je.

¹⁰Ka wawaco ni fodi wakitimo gimarac meno waloko Were jatwodo, aka wac pere ongoye i kwo mawan.