Read dhopadhola 1 Yohana 4 Bible Online

1 Yohana 4 - dhopadhola bible

1 Yohana 4

¹Jowotan ma kacunyan, wikiri wiyere gi kisi dhano ma kethere ni go nitie gi Cuny pa Were. Tem win jo ŋey winiaŋ k'adieri jowok bongi Were, rupiri jotuci wac ma twodo mathoth jotieko ywore i piny je.

²Me apaka winonyali ŋeyo ŋata nitie gi Cuny pa Were: Moro je ma waco ni Yesu Kristo olokere dhano meno ma wok bongi Were.

³To moro je ma kwero gima kwoŋ Yesu meno cuny ma kiwoki bongi Were. Meno obedo cuny pa jakwor pa Kristo ma wiwinjo nike labino, aka pama otieko kiri tundo i piny.

⁴To win wibedo apa Were, nyithindho paran, aka witieko nyalo woko jotuci wac ma twodo, rupiri Ŋata nitie i win dwoŋ loyo ŋata nitie i piny.

⁵Jo jobedo apa piny, am'omiyo joluwo paka piny yenyo aka piny ciko ithe rijo.

⁶To wan wabedo apa Were, aka moro je m'oŋeyo Were ciko ithe riwan. To moro je ma k'obedo apa Were kiwinji wan. Me a royo ma wanyalo poko gine Cuny mar'adieri kodi cuny ma twodo.

⁷Jowotan, weyi wamare win, rupiri mar wok bongi Were. Moro je man gi mar obedo nyathi pa Were aka oŋeyo Were.

⁸Ŋat'ongoye gi mar meno kuya Were, rupiri Were obedo mar.

⁹Me apaka Were onyutho mar pere riwan: Go ooro Wode acel g'acel i piny ŋey walimi kwo luwo kwoŋe.

¹⁰Me a mar: Ki kwoŋbedo ni onwaŋo wamaro Were, to ni go ama omaro wan to dhiro Wode bedo cowirok ma kwanyo woko reco mawan.

¹¹Jowotan m'amaro, k'inen me a paka Were omaro wan, meno wabende waripo marok.

¹²Ongoye ŋata fodi oneno Were, to ka wamare, meno Were bedo i wan aka mar pere bino roci maber i wan.

¹³Me apaka waridho maber ni wanitie i Were aka go bende nitie i wan; go otieko miyo wan Cuny Maleŋ pere won.

¹⁴Aka wawegi waneno aka onyo wawaco ri joman nike Bawan odhiro Wode bedo Jaboth ri piny.

¹⁵Ŋata tuco ni Yesu obedo Wod Were, Were bedo i go aka go bende bedo i Were.

¹⁶Am'omiyo wawegi waŋeyo aka wayeyo mar ma Were nitie gine riwan. Were obedo mar, aka ŋata bedo i mar meno bedo i Were aka Were bende bedo i go.

¹⁷Ameno, mar bedo m'otire i dier wan, aka ŋey bedi gi miseni madwoŋ i ndelo ma thumo banja, rupiri kwo mawan i piny ka cale kodi apa Kristo.

¹⁸Lworo ongoye i mar, to mar m'otire kwanyo woko lworo je, rupiri lworo wotho gi gir'acula, aka ŋata lwor meno fodi mar k'oroc i cunye.

¹⁹Wabedo gi mar rupiri Were ama otelo maro wan.

²⁰Ka nyatoro waco ni, omaro Were ma to go fodi odak omin, meno go jatwodo, kwoŋbedo go kinyal maro Were mafodi go k'oneno, to kwero maro omin ma go otieko neno.

²¹Am'omiyo, me a or ma Kristo omiyo wan: Ni ŋat'omaro Were ripo maro omin bende.