Read dhopadhola 1 Yohana 5 Bible Online

1 Yohana 5 - dhopadhola bible

1 Yohana 5

¹Nyatoro je ma yeyo ni Yesu obedo Kristo meno go obedo nyathi pa Were; aka ŋat'omaro ba nyathi meno ripo maro kiri nyathi bende.

²Me apaka waŋeyo nike wamaro nyithindho pa were: Ka wamaro Were gi winjo or pere.

³Kole me a dwoŋ maro Were; winjo or pere. Aka or pere kitek riwan timo,

⁴rupiri nyathi pa Were je nyalo woko meni pa piny. Me apaka wanyalo loyo meni pa piny: Waloyo gi yeyo mawan.

⁵Ongoye ŋata nyalo loyo meni pa piny, kwanyo woko ŋata yeyo ni Yesu obedo Wod Were.

⁶Yesu Kristo a ŋat'obino gi pi ma batisimo kodi remo pere. Go k'obino gi pi kende, to gi pi kodi remo. Aka Cuny Maleŋ won ridho adieri me, rupiri Cuny Maleŋ obedo adieri.

⁷Nitie jokony adek ma ridho adieri no:

⁸Cuny, pi, kodi remo; aka jadek no je joyere.

⁹K'inen wayeyo wac pa ji ka joridho gine adieri moro, meno waripo yeyo apa Were madwoŋ loyo; aka me a wac ma Were ridho kwoŋ Wode.

¹⁰Nyatoro je ma yeyo Wod Were meno ridho adieri no i cunye; to ŋata kiyey Were, meno oloko go jatwodo, rupiri go k'oyeyo gima Were owaco ma ridho adieri ma mako kwoŋ Wode.

¹¹Aka me a wac ma ridho adieri ni Were otieko miyo wan kwo makirum, aka kwo me nwaŋere i Wode.

¹²Moro je manitie gi Wod Were meno nigi kwo me; aka moro je m'ongoye gi Wod Were meno ongoye gi kwo.

¹³Andiko riwin gime, win ma wiyeyo i nyingi Wod Were, winyal ŋeyo nike winitie gi kwo makirum.

¹⁴Me am'omiyo wanitie gi miseni ruwaŋ were: Waridho nike go bino miyo wan gimoro je ka wakwayo go paka go yenyo.

¹⁵Aka ka waŋeyo ni go winjo wan ka wakwayo go gimoro, meno waŋeyo bende nike go bino miyo wan gima wakwayo je.

¹⁶Ka moro oneno omin timo gimarac ma kikel tho, go ripo kwayo, aka Were bino miyo ŋato kwo. Awaco ameno kwoŋ joreco pajo kikel tho. To nitie gimarac ma kelo tho, aka akiwaci ni wiripo kwayo Were kwoŋ meno mere.

¹⁷Tim je ma k'otire meno gimarac, to nitie reco megi ma kikel tho.

¹⁸Waŋeyo nike nyathi pa Were kimedere timo gimarac, rupiri Wod Were kuro go maber, aka Jaraco kinyal timo go marac.

¹⁹Waŋeyo nike wabedo apa Were aka piny gipi nitie i dhum pa Jaraco.

²⁰Waŋeyo nike Wod Were otieko bino aka omiyo wan niaŋ m'omiyo waŋeyo Ŋat'obedo adieri. Kwo mawan nitie i Ŋat'obedo adieri, cungo kwoŋ Wode Yesu Kristo. Me a Were mar'adieri, won kendo a kwo makirum.

²¹Nyithindho paran, eye win kwoŋ werin ma twodo!