Read dhopadhola Jothum Banja 12 Bible Online

Jothum Banja 12 - dhopadhola bible

Jothum Banja 12

¹Cwo ma Efrayim jocokere kanyacel to joŋado kadho yumalo, aka jopenjo Yefitha ni, “Raŋo iŋado kadho i lweny gi Joamon, aka ikilwoŋo wan kadho kodin? Walawaŋo ot perin gi mac i wiyin.”

²Yefitha odwoko jo ni, “An kodi ji paran wabedo gi dhaw madwoŋ gi Joamon; aka alwoŋo win, to wikibino bothan wok i cingi jo.

³Munyo aneno nike wikinyalo bothan, aketho kwo paran i cingan, aka aŋado lweny gi Joamon; to Rwoth miyo jo i cingan. Raŋo nyo wibino ndelo me lweny kodan?”

⁴Yefitha ocoko cwo je ma Giliad aka jolweny gi Joefrayim. Cwo ma Giliad joneko Joefrayim, kwoŋbedo jowaco ni, “Win Jogiliad, wibedo jom'orwenyo ma Efrayim kodi Manase.”

⁵Jogiliad jomako ger ma Yordan kwoŋ Joefrayim. Kisi ka Jaefrayim kwale to waco ni, “Weyi akadhi koca.” Cwo ma Giliad jopenjo go ni, “Ibedo Jaefrayim?” Aka go odwoko ni be.

⁶Jowaco rigo tuco wac Siboleth, aka go oyido tuco ni Siboleth, kwoŋbedo go oyido kinyal tuco m'otire. Kenyo oyido jomako go to joneko go i ger ma Yordan. Joefrayim 42,000 jotho i hongo no.

⁷Yefitha obedo jathum banja i Isiraili ma oro aucel. Go otho aka oyiki go i tindin madongo ma Giliad.

⁸Rumacen pa Yefitha, Ibizan ma wok i Bethelehem obedo jathum banja i Isiraili.

⁹Go oyido nitie gi wote piero adek kodi nyithindho manyir piero adek m'opoko i nywomirok woko ma nono pere; to bende kelo nyir piero adek woko ma nono pere ri wote. Ibizan othumo banja i Isiraili ma oro abirio.

¹⁰Go otho aka oyiki i Bethelehem.

¹¹Rumacen pa Ibizan, Elon janono pa Zebulun obedo jathum banja i Isiraili ma oro apar.

¹²Elon otho, aka oyiki go i Ayijalon i lowo ma Zebulun.

¹³Rumacen pa Elon, Abidon wod pa Hilal ja Pirathon obedo jathum banja i Isiraili.

¹⁴Go oyido nitie gi wote piero aŋwen, kodi nyikwaye piero adek, m'oyido jogweyo punde piero abirio. Go othumo banja i Isiraili ma oro aboro.

¹⁵Abidon otho, aka oyiki go i Pirathon i lowo pa Efrayim, i piny matendere pa Joamalek.