Read dhopadhola Jothum Banja 13 Bible Online

Jothum Banja 13 - dhopadhola bible

Jothum Banja 13

¹Joisiraili jotimo reco kendo ruwaŋ Rwoth, aka Rwoth omiyo jo i cingi Jofilistia ma oro piero aŋwen.

²Oyido nitie jacwo acel ma wok i Zora, janono pa Dan, nyinge obedo Manowa; aka cege oyido kinywol ongoye gi nyithindho.

³Malaika pa Rwoth omenyere ri dhako no to waco rigo ni, “Neni, ikinywol aka ingoye gi nyithindho, t'ilagamo iyin t'inywolo wodin.

⁴Onyo mondo gwokere, ikir'imadhi vini kosa medho makec, kosa icami gimakoc.

⁵Kole ilagamo iyin t'inywol wodin. To ongoye kamweso geyo wiye, kole jayac labedo Janazir ri Were wok i nywolirok. Go ama lacako botho Isiraili wok i cingi Jofilistia.”

⁶Dhako no obino to waco ri cwore ni, “Jacwo pa Were obino bongan, aka cal pere oyido bwoko jo paka malaika pa Were. Akipenjo go nike owok kune, aka go k'owaco ran nyinge.

⁷To go owaco ran ni, ‘Panen, ilagamo iyin t'inywolo wodin, onyo ikir'imadhi vini kosa medho makec, kosa icami gimakoc, kole jayac labedo Janazir ri Were wok i nywolirok pere tundo tho pere.’ ”

⁸Manowa okwayo Rwoth ka waco ni, “Cwakan Rwoth, to weyi jacwo pa Were m'ioro wobin bongi wan kendo fonjo wan gima waripo timo ri jayac ma lanywole.”

⁹Were owinjo dwondi Manowa, aka malaika pa Were obino kendo bongi dhako munyo go obedo i ndelo; to Manowa oyido ongoye bonge.

¹⁰Dhako oŋweco piyo aka owaco ri cwore ni, “Panen, jacwo m'obino bongan ceŋino oneno ran kendo.”

¹¹Manowa oay malo aka oluwo cege, to bino bongi jacwo no aka openjo go ni, “Iŋat'ibedo jacwo m'oluwo gi dhako paran?” Go odwoko ni, “Ey abedo.”

¹²Manowa openjo ni, “Ka wac perin otundi i kare, kwo pa jayac ripo bedo nedi, aka go latimo aŋo?”

¹³Malaika pa Rwoth odwoko Manowa ni, “Kwoŋ gim'atieko waco ri dhako je, go ripo kuro.

¹⁴Go kiripi camo gimoro je ma wok i yath vini, kosa madho vini, kosa medho makec, kosa camo gimakoc moro je. Go ripo kuro or m'amiyo go je.”

¹⁵Manowa owaco ri malaika pa Rwoth ni, “Mondo weyi idoŋ gi wan, ŋey watedi rin nyathi diel.”

¹⁶Malaika pa Rwoth odwoko Manowa ni, “K'anodoŋ gi win, akilacamo cemo mewin, to ka wimito timo mic awaŋa, miy win ri Rwoth.” Kole Manowa oyido okuya nike go obedo malaika pa Rwoth.

¹⁷Manowa openjo malaika pa Rwoth ni, “Nyingin ŋa, ŋey ka wac perin otundo i kare wanyal miyin dwoŋ?”

¹⁸Malaika pa Rwoth openjo Manowa ni, “Raŋo ipenjo nyingan, ma kiniaŋere?”

¹⁹Ameno Manowa okwanyo nyathi diel kodi mic ma cemo, aka omiyo i wi tele ri Rwoth, gir'aura ma timere; aka Manowa kodi cege joŋiyo.

²⁰Munyo mac liel kadho malo i polo wok i wi migam, malaika pa Rwoth okadho malo i mac ma migam kareno Manowa kodi cege joŋiyo; aka jopodho piny gi nyim jo.

²¹Malaika pa Rwoth k'oneno kendo ri Manowa kodi cege. Kenyo Manowa oniaŋ nike oyido obedo malaika pa Rwoth.

²²Manowa owaco ri cege ni, “Walatho adieri, kole watieko neno Were.”

²³Cege odwoko go ni, “Kabedi Rwoth oyido mito neko wan, dinyo k'ojolo mic awaŋa kodi mic ma cemo wok i cingi wan, kosa dinyo k'onyutho wan gime je, kosa pama miyo wan winjo nger gime.”

²⁴Dhako onywolo wode, aka ocwoko nyinge ni Samson. Jayac odongo, aka Rwoth omiyo go silwany.

²⁵Cuny pa Rwoth ocako miyo go meni i Mahane Dan, i dier Zora kodi Esitayol.