Read dhopadhola Jothum Banja 14 Bible Online

Jothum Banja 14 - dhopadhola bible

Jothum Banja 14

¹Dicel Samson oloro piny i Timina, aka i Timina kenyo go oneno dhako ma nya Jafilistia.

²Kenyo go okadho malo, to waco ri bamere kodi min ni, “Atieko neno dhako i Timina m'obedo nya Jafilistia; onyo omi ran win go paka dhako paran.”

³To bamere kodi min jopenjo go ni, “Ongoye dhako i dier wade perin, kosa i dier ji paran je, m'iripo kidho kwanyo dhako wok kwoŋ Jofilistia ma jok'othumere?” Samson odwoko bamere ni, “Miyan go, rupiri go osangala waŋan.”

⁴Bamere kodi min oyido jokuya nike gime owok bongi Rwoth; kole go oyido rango silwany ma timo gimoro kwoŋ Jofilistia. I hongo no Jofilistia am'oyido jodhumo i Isiraili.

⁵Kenyo Samson oloro piny gi bamere kodi min i Timina. Aka munyo jobino i ndelo vini pa Timina, panen, to nyathi simbwor uja kwoŋ go.

⁶Cuny pa Rwoth okwakere kwoŋe, to go yeco simbwor kadirio gi cinge nono paka nyatoro nyalo yeco nyathi diel. To go k'owaco ri bamere kosa min gima go oyido otimo.

⁷Kenyo Samson oloro piny to luwo gi dhako no, aka dheno osangala waŋe.

⁸Munyo hongo moro okadho, Samson ogik nywomo go, to wire neno kama dicokin simbwor, aka panen, oyido nitie tome kic i cokin pa simbwor, kodi mo kic.

⁹Go ocodho gi cinge, to medere, kareno camo malo. Munyo otundo bongi bamere gi min, omiyo jo moro, to jocamo; to go k'owaco rijo ni oyido okwanyo mo kic wok i cokin pa simbwor.

¹⁰Bamere oloro piny bongi dheno, to Samson timo kalima kenyo paka yac di jotimi.

¹¹Munyo ji joneno go, jokelo rigo ji piero adek ma jobedo gi go.

¹²Samson owaco rijo ni, “Mondo weyi agoy riwin sikoiyiko. Ka winonyali tito dwoŋ mere i ndelo abirio ma kalima, nyaka alamiyo win nangin mafoth piero adek kodi nangin ma kalima piero adek.”

¹³“To ka wik'onyal tito dwoŋ mere, kenyo wilamiyan nangin mafoth piero adek kodi nangin ma kalima piero adek.” To jowaco rigo ni, “Penji sikoiyiko perin; weyi wawinji.”

¹⁴To waco rijo ni, “Wok kwoŋ jacami owok gir'acama, aka wok kwoŋ jameni owok gima mit.” To ma ndelo adek jok'onyalo tito dwoŋ ma sikoiyiko.

¹⁵Aka i ndelo mar'abirio jowaco ri cipa Samson ni, “Dwoŋ riwan cworin wonyali tito riwan sikoiyiko, kosa walawaŋin kodi ot pa benin gi mac. Ilwoŋo wan ka ma loko wan jocandi, k'ameno?”

¹⁶Cipa Samson oywaki rigo, ka waco ni, “Idakan; ikimaran adieri. Ikwayo ji paran sikoiyiko, to fodi ikitito ran.” To Samson dwoko go ni, “Neni, fodi ikiwaco ri baba kosa mama. Raŋo awaci rin?”

¹⁷To go oywaki ri Samson ma ndelo abirio ma kalima pajo ocowo; aka rupiri omena go, i ndelo mar'abirio Samson owaco rigo. Kenyo to dheno tito sikoiyiko ri ji pere.

¹⁸Cwo ma tindi madwoŋ jowaco rigo i ndelo mar'abirio mafodi waŋceŋ k'opodho ni, “Aŋo mamit pa mo kic? Aŋo matek loyo simbwor?” To Samson dwoko jo ni, “Bedi fodi wikifuro gi roya paran, di wikinwaŋo dwoŋ ma sikoiyiko paran.”

¹⁹Kenyo cuny pa Rwoth okwakere kwoŋe, to loro yu Asikelon. Oneko kwoŋ jo cwo piero adek, to kwanyo gima jonyaga, to miyo nangin ma kalima ri jono ma jotito sikoiyiko. I nge malieth go ogik i ot pa bamere.

²⁰Kenyo opok cipa Samson ri jawodhe, m'oyido ocungo rigo i kalima ma nywomirok.