Read dhopadhola Jothum Banja 15 Bible Online

Jothum Banja 15 - dhopadhola bible

Jothum Banja 15

¹Munyo hongo moro okadho, i hongo ma keco ŋano, Samson okidho limo cege, gi nyathi diel. Go owaco ni, “Weyi adonji i kisika pa dhako paran.” To ba nyako k'onyalo yeyo go donjo.

²Ba nyako owaco rigo ni, “Oyido aparo adieri, nike idaki go; ameno apoko go ri mere perin. Nyamin go mathin kiŋon loyo go? Raŋo ikiter go ayin?”

³Samson odwoko jo ni, “Rume alangoye g'apuse k'anotim gimarac ri Jofilistia.”

⁴Ameno Samson okadho to mako kibwe 300 to kwanyo mac; go otweyo yiw ario kanyacel, to ketho mac i dier yiw jo.

⁵Aka munyo go otieko cwinyo mac, odhiro kibwe donjo i ŋano pa Jofilistia m'oyido ocungo, to waŋo woko wic kodhi m'oyido ocungo, kanyacel gi ndelo vini kodi yen oliv.

⁶Kenyo Jofilistia jopenjo ni, “Ŋa m'otimo gime?” To jodwoko ni, “Samson, or Jotimina, rupiri go opoko cege ri nyawote.” Ameno Jofilistia joay, to jowaŋo dheno kodi bamere gi mac.

⁷Samson owaco rijo ni, “K'inen me a nger gima witimo, akwoŋere ak'owey cuka atieko culo kwor kwoŋin.”

⁸Samson orwadho jo piny pier gi emi jo gi kikengila madwoŋ aka go oloro piny to bedo i ŋungu tele ma Etam.

⁹Jofilistia jokadho malo to joketho kambi pajo i Yuda, to joywore i Lehi.

¹⁰Cwo ma Yuda jopenjo jo ni, “Raŋo wikwinyo wan?” Jodwoko ni, “Wabino malo ka tweyo Samson, timo rigo paka otimo riwan.”

¹¹Kenyo cwo gana adek ma Yuda joloro piny i ŋungu tele ma Etam, to jopenjo Samson ni, “Ikuya nike Jofilistia jodhumo wan? Onyo aŋo m'itimo riwan?” Go odwoko ni, “Paka jotimo ran, ameno apaka atimo rijo.”

¹²Jowaco rigo ni, “Waloro piny tweyin, ŋey wanyal kethin i cingi Jofilistia.” Samson owaco rijo ni, “Kwoŋere ran win ni wiwegi wik'omonjan.”

¹³Jowaco rigo ni, “Be, walatweyin nyaka kende to wakethin i cingi jo; wak'onekin.” Ameno jotweyo go gi thondhe ario manyen, to jokelo go malo wok i tele.

¹⁴Munyo Samson obino i Lehi, Jofilistia jobino gi woy ma romo gine; to cuny pa Rwoth kwakere kwoŋe, aka thondhe m'oyido nitie i bade jolokere paka yath macwer mo m'omako mac, to gim'otwey gine leny woko i cinge.

¹⁵Samson onwaŋo coko manumu ma lak punda ma pom, otelo cinge to kwanyo, to oro ma neko gine cwo gana acel.

¹⁶Samson owaco ni, “Gi lak punda ma pom, punda pa punde, gi lak punda ma pom, atieko neko cwo gana acel.”

¹⁷Tekin go otieko luwo, obolo woko lak punda wok i cinge; to go lwoŋo kenyo ni Ramath Lehi.[2]

¹⁸I hongo no riyo oyido neko go swa, to lwoŋo Rwoth, ka waco ni, “Iŋat'imiyo kikengila madwoŋ me gi cingi ŋeca perin. Onyo pama atho riyo, t'apodho i cingi ji ma jok'othumere?”

¹⁹Ameno Were obaro milelo m'oŋamere manitie i Lehi, to pi wok'iye. Munyo omadho, cunye odwoko, to both. Riameno olwoŋi nyinge ni, Enhakore[3] manitie Lehi kiri konon.

²⁰Samson obedo jathum banja i Isiraili i hongo pa Jofilistia ma oro piero ario.