Read dhopadhola Jothum Banja 16 Bible Online

Jothum Banja 16 - dhopadhola bible

Jothum Banja 16

¹Ndelo moro Samson okidho i Gaza, kama go onen'iye malaya to nindo gine.

²Owaci ri ji ma Gaza ni, “Samson obino ka.” Ameno jothoko tindi madwoŋ to jokuro go wor gipi i waŋkac ma tindi madwoŋ. Joliŋ wor gipi, ka joparo ni, “Weyi wakur piny woyawere; nyaka to waneko go.”

³To Samson onindo kiri sawa aucel ma wor. Kenyo i dier wor go ocew, omidho waŋkac ma tindi madwoŋ gi thigin ario kodi miangin mere, to fudho woko nyweny kodi gimoro je, to ketho i goke, aka otero jo wi kisul matendere manitie yuwaŋ Hebron.

⁴Rumacen ma gime go omitere gi dhako i milelo ma Sorek, ma nyinge ilwoŋo Delila.

⁵Jodhum ma Filistia jokidho bongi dhako no to jowaco rigo ni, “Dwoŋ go, aka irangi tiendi gima miyo meni pere bedo madwoŋ, kodi nger ma wanyalo kikengil'iye go, to wanyalo go; aka walamiyin nusu feza ma romo kilo piero aucel g'abic.”

⁶Delila owaco ri Samson ni, “Mondo wac ran gima miyo meni perin bedo madwoŋ, kodi nger m'inyalo tweyin'iye, ma kikengila in.”

⁷Samson owaco rigo ni, “Ka jotweyan gi dende abirio manumu mafodi k'othwo, nyaka alanyapere, t'abedo paka kisi dhano je.”

⁸Kenyo jodhum ma Filistia jokelo rigo dende abirio manumu mafodi k'othwo, to Delila tweyo gine go.

⁹Kareno jor'apondi oyido jobedo rigo i kisika, Delila owaco rigo ni, “Jofilistia jonitie kwoŋin, Samson!” To Samson yeco dende no, paka uzi ma yath macwer mo ka oŋweyo mac. Ameno nyaliŋliŋ ma meni pere k'oŋeyere.

¹⁰Kenyo Delila owaco ri Samson ni, “Neni, itieko wondan t'iluwo ran twodo; mondo wac ran nger m'oyido inyalo tweyin'iye.”

¹¹Samson owaco rigo ni, “Ka jotweyan gi thondhe manyen ma fodi k'oor, nyaka alanyapere, t'acalo paka dhano man je.”

¹²Ameno Delila okwanyo thondhe manyen to tweyo gine go, to waco rigo ni, “Jofilistia jonitie kwoŋin, Samson!” Jor'apondi oyido jobedo i kisika. To Samson yeco woko thondhe no wok i cinge paka uzi.

¹³Kenyo Delila owaco ri Samson ni, “Kiri pama itieko wondan t'iwaco ran twodo; wac ran nger m'oyido inyalo tweyin'iye.” Samson owaco rigo ni, “K'inokedi lwodo abirio ma wiyan, t'iridho matek gi kikweso, nyaka to meni loyan, t'abedo paka kisi dhano moro je.”

¹⁴Ameno munyo Samson nindo, Delila okwanyo lwodo abirio no ma ye wiye to kedo jo maber, to ridho jo matek gi kikweso. Kenyo to waco rigo ni, “Jofilistia jonitie kwoŋin, Samson!” To cew inindo pere, to gonyo woko kikweso, kodi ye wiye m'okedi.

¹⁵Kenyo Delila owaco rigo ni, “Inyalo waco nedi ni amarin, munyo cunyin ongoye kodan? Itieko wondan didek pama aka fodi ikiwaco ran gima miyo meni perin bedo madwoŋ.”

¹⁶Macowe, munyo Delila otieko kimena go gi wac pere kisi ndelo, to romo go, hongo pere olokere macek ma tho.

¹⁷Ameno owaco rigo adundo pere je, to waco rigo ni, “fodi kamweso k'ogeyo wiyan; rupiri abedo Ŋataleŋ ri Were munyo fodi anitie i iy mama. Bedi liel wiyan, nyaka dimeni paran oweyan; dinyo alokere manyap, t'abedo paka kisi dhano moro je.”

¹⁸Munyo Delila oneno ni go otieko waco rigo adundo pere je, odhiro t'ilwoŋo jodhum pa Jofilistia, ka waco ni, “Waŋin me biye win, go otieko miyan aŋeyo adundo pere je.” Kenyo jodhum pa Jofilistia jobino bonge, to jokelo feza i cingi jo.

¹⁹Delila omiyo Samson nindo i tiende, to lwoŋo jal moro, aka omiyo go lielo lwodo abirio ma ye wiy Samson. Samson ocako nyapirok to meni pere weyo go.

²⁰Kenyo Delila owaco rigo ni, “Jofilistia jonitie kwoŋin, Samson!” Munyo go ocew inindo pere, oparo ni, “Alawok woko paka amaro, t'ateŋere.” To go k'oŋeyo nike Rwoth oyido otieko weyo go.

²¹Filistia jopodho kwoŋe to jogolo woko waŋe. Jotero go i Gaza to jotweyo go gi pingo ma ywel; to bedo jarego i cuma ma jiera.

²²Ye wiye ocako dongo kendo munyo otiek lielo.

²³Jodhum pa Jofilistia jocokere ma miyo cowirok madwoŋ ri were pajo Dagon, kodi kisangala; kole jowaco ni, “Were mawan omiyo Samson jakwor mawan i cingi wan.”

²⁴Munyo ji joneno go, jofoyo were pajo; rupiri jowaco ni, “Were mawan otieko ketho jakwor mawan i cingi wan, go m'othango piny mawan, go m'oneko ji mawan kweth.”

²⁵Aka munyo josiemere, jowaco ni, “Lwoŋ win Samson, aka weyi go wotim riwan tuko.” Ameno olwoŋi Samson wok i jiera, to timo tuko rijo. Jomiyo go cungo i dier sirin;

²⁶to Samson waco ri jayac m'omako cinge ni, “Yeyan amuli sirin ma thielo ot, ŋey anyal thenere kwoŋ jo.”

²⁷Ot oyido opoŋ'iye cwo gi mondongo; jodhum pa Jofilistia oyido jonitie kenyo, aka i wi ot oyido nitie cegin cwo kodi mondongo gana adek, m'oyido joneno paka Samson timo tuko.

²⁸Kenyo Samson olwoŋo Rwoth to waco ni, “Awi Rwoth Were, mondo poyan, aka mondo miyan meni dicel me kende, Awi Were, ŋey gi tim acel me ma culo kwor anyal culo kwoŋ Jofilistia ri waŋan ario.”

²⁹To Samson midho sirin ario ma diere m'oyido thielo ot, to thenere kwoŋe, cinge maracuc kwoŋ acel kodi cinge maracam kwoŋ man.

³⁰Kenyo Samson owaco ni, “Weyi atho gi Jofilistia.” Oyare gi meni pere je; to ot podho kwoŋ jodhum kodi ji je m'oyido jonitie iye. Ameno ji ma go oneko i hongo pere ma tho oyido jothoth loyo ma go oneko munyo go fodi kwo.

³¹Wutmin go kodi jopeco pere je joloro piny to jokwanyo delkwoŋe to jokelo malo, aka joyiko go i dier Zora kodi Esitayol i kaliel pa bamere Manowa. Samson obedo jathum banja i Isiraili ma oro piero ario.