Read dhopadhola Jothum Banja 17 Bible Online

Jothum Banja 17 - dhopadhola bible

Jothum Banja 17

¹Obedo jal moro i piny matendere ma Efrayim m'oyido ilwoŋo ni Mika.

²Go owaco ri min ni, “Nusu feza ma romo kilo apar g'adek m'okwal kwoŋin, t'ilamo, aka iluwo kiri m'awinjo, feza no aŋat'akwanyo; nitie bongan.” To min waco ni, “Weyi Rwoth womiy wodan silwany!”

³Kenyo go odwoko nusu feza ma romo kilo apar g'adek ri min; to min waco ni, “Adieri aloko maleŋ feza me ri Rwoth wok i cingan ri wodan, ma timo cal m'ogor kodi cal ma nyweny aka onyo pama adwoko rin.”

⁴Onyo munyo odwoko feza ri min, min okwanyo nusu feza ma romo kilo ario, to miyo jathedhi nyweny, m'otimo gine cal ma nyweny m'ogor; aka obedo i ot pa Mika.

⁵Mika me oyido nitie gi ot pa werin pere, to timo law pa jacway ri Were i wi migam kodi were i cal pa dhano m'ilwoŋo ni terafim, to ketho acel kwoŋ wote, bedo jacway ri were i wi migam.

⁶I hongo no oyido ongoye kere i Isiraili; kisi dhano oyido timo gim'otire i waŋe.

⁷Oyido nitie jayac moro ma wok Bethelehem i Yuda, janono pa Yuda. Go oyido obedo Jalevi aka bedo kenyo.

⁸Go oay i tindi madwoŋ Bethelehem i Yuda, kadho bedo kama go onwaŋ. Go obino i ot pa Mika i piny matendere ma Efrayim, i woth pere.

⁹Mika openjo go ni, “Iwok yukune?” Go odwoko ni, “Abedo Jalevi ma Bethelehem i Yuda, aka awotho rango kamoro je ma bed'iye.”

¹⁰Kenyo Mika owaco rigo ni, “Bedi kodan, aka lokere ran baba kodi jacway ri were i wi migam, aka alamiyin nusu feza apar kisi oro, kodi nangin kodi gima kwo gine.” To Jalevi no kadho.

¹¹Jalevi no oyeyo bedo gi Mika; to jayac no lokere rigo paka acel kwoŋ wote.

¹²Ameno Mika omiyo Jalevi no dwoŋ, to jayac no bedo jacway ri were i wi migam pere, aka obedo i ot pa Mika.

¹³Mika owaco ni, “Pama onyo aŋeyo ni Rwoth latic kodan maber, kole Jalevi otieko bedo jacway ri were i wi migam paran.”