Read dhopadhola Jothum Banja 19 Bible Online

Jothum Banja 19 - dhopadhola bible

Jothum Banja 19

¹Obedo i hongo no, munyo kere oyido ongoye i Isiraili, aka obedo jal moro ma Jalevi, m'oyido lera iy'adec ma kakende ma piny matendere Efrayim, onywomo malaya ma wok i Bethelehem i Yuda.

²To malaya pere omako gine, to weyo go kadho i ot pa bamere i Bethelehem i Yuda, to bedo kenyo ma dwe aŋwen.

³Kenyo cwore oay malo to kidho cako rango go, ma luwo gi cunye ma dwoko go. Oyido go nitie gi ŋeca pere kodi punde kweth. Dheno okelo go i ot pa bamere, bamere oneno go to bino gi kisangala romo gi go.

⁴Ore, ba cege, odiyo go, to miyo go bedo gine ma ndelo adek; ameno jocemo to jomedho, jok'obilo nindo.

⁵I ndelo mar'aŋwen joay odikin maŋic, to joyikere ma kadho; to ba nyako waco ri ore ni, “Yom cuny gi cemo nyaka mathi, aka k'itieko nyaka t'ikadho.”

⁶Ameno cwo ario no jobedo piny, jocemo to jomedho kanyacel; to ba nyako waco ri jalo ni, “Mondo raŋo ikinindi to cunyin yodere?”

⁷Munyo jalo oay ma kadho, to ba cege medo ywakere rigo cuka onindo kenyo kendo.

⁸I ndelo mar'abic go ocew odikin maŋic kadho, to ba nyaka waco ni, “Mondo siem cunyin.” Ameno to jokuro cuka piny oyutho, to joje jocemo.

⁹Munyo jalo gi malaya pere kodi ŋeca pere joay kadho, ore, ba nyako, owaco rigo ni, “Mondo neni, piny oyutho ma lokirok othieno. Mondo nindi. Neni, piny oyutho. Nindi ka aka weyi cunyin wosangala. Dikin inyalo cew odikin maŋic t'imako yo perin, t'ikadho peco perin.”

¹⁰To jalo k'omito nindo kenyo kendo; oay to kadho, to tundo kam'oŋiyere gi Yebus (meno, Yerusalem.) Go oyido nitie gi punde ario m'igweyo, aka malaya pere oyido nitie gi go.

¹¹Munyo oyido jocegin tundo Yebus, sawa oyido okadho, to ŋeca waco ri jadwoŋ pere ni, “Mondo biye, weyi wawire yuthengi tindi madwoŋ pa Joyebus me, to wanind'iye.”

¹²To jadwoŋ pere waco rigo ni, “Wak'owire yuthengi tindi madwoŋ pa jokicar, ma jok'obedo Joisiraili; to walamedere kiri Gibeya.”

¹³Kenyo go owaco ri ŋeca pere ni, “Biye, weyi watem tundo iy'acel kwoŋ kabedo me, to wanindo i Gibeya kosa i Rama.”

¹⁴Ameno jomedere to jokadho i yo pajo; to waŋceŋ podho rijo cegin i Gibeya, m'obedo apa Benyamin.

¹⁵Jowire gi thenge kenyo, ma donjo kodi nindo i Gibeya. Go odonjo to bedo i kam'othangere ma tindi madwoŋ, to ongoye ŋat'otero jo nindo.

¹⁶Gikenyo won othieno obedo jal moro m'oti m'oyido dwoko wok i tic pere i ndelo. Jalo oyido wok i piny matendere ma Efrayim, aka go oyido bedo i Gibeya. (Cwo ma kenyo oyido jobedo wot Benyamin.)

¹⁷Munyo jalo otiŋo waŋe malo to neno ŋata wotho i kam'othangere ma tindi madwoŋ, jal m'oti no openjo go ni, “Ikidho kune aka iwok kune?”

¹⁸Jalevi odwoko go ni, “Waluwo wok i Yerusalem i Yuda iy'adec mabor loyo ma piny matendere ma Yuda, kam'awok'iye. Awok i Bethelehem i Yuda; aka onyo akadho i Ot pa Rwoth. Ongoye jal m'ojolan i ot pere.

¹⁹Wan ŋecin perin wanitie gi kanja gi lum m'othwo ri punde mawan, gi cemo kodi vini ri an kodi ri ŋeca perin madhako kodi ri jayac manitie gi wan. Wakimiti gimoro kendo.”

²⁰Jal m'oti no owaco ni, “Siem wobedi kodin. Alamiyin gimoro je m'imito; nyaka ikir'inindi kam'othangere.”

²¹Ameno go okelo jo i ot pere, to pidho punde; jolwoko tiendi jo, aka jocemo to jomedho.

²²Munyo oyido fodi josiemere, cwo ma tindi madwoŋ, wot ji ma bukony, jothoko ot, to jocako goyo thigo gi derino. Jowaco ri jalo, jadwoŋ ma ot ni, “Wodhi woko jal m'obino i ot perin, ŋey wanyal nindo gi go.”

²³To jalo, jadwoŋ ma ot, wok woko bongi jo to waco rijo ni, “Be, wutmera, mondo wikiri witim gikidakana. Paka jame obedo wendo paran, wikiri witim giwickwot ma miŋo me.

²⁴E nyaran mambula gi malaya pere; mondo weyi awodhi jo woko. Nindi win gi jo to witimo gi jo gima wimito; to ri jal me wikiri witim giwickwot me.”

²⁵To cwo no jok'onyalo winjo go. Ameno jalo opodho kwoŋ malaya pere, to wodho go woko rijo. Jonindo gine m'ongoye wor gipi cuka otundo odikin. Aka munyo ŋamba oriedo, to joweyo go kadho.

²⁶Munyo piny oyawere, dheno obino podho i dhiot ma ot kama jadwoŋ pere oyido nitie iye, cuka piny olokere maler.

²⁷Odikin jadwoŋ pere ay to yawo thigin ma ot, aka munyo owok kadho i yo pere, malaya pere oyido nitie onindo i dhiot ma ot, gi cinge kwoŋ thigo.

²⁸Owaco rigo ni, “Ay malo wakadhi.” To radwok ngoye. Kenyo jalo oketho go i wi punda; to jalo ay kadho peco pere.

²⁹Munyo go otundo peco pere, okwanyo apala to podho kwoŋ malaya pere to ŋundo go mathindho thindho muma apar g'ario, tundo i coko, to dhiro go woko iy'adec je ma Isiraili.

³⁰Kisi dhano je m'oneno go onyalo waco ni, “Oyido fodi nger gime k'otimere, oyido nger gime fodi k'onenere wok i ndelo ma Joisiraili jowey'iye Misir cuka tundo ndelo me! Waripo timo gimoro kwoŋe. Warangi rieko, to wawodho.”