Read dhopadhola Jothum Banja 20 Bible Online

Jothum Banja 20 - dhopadhola bible

Jothum Banja 20

¹Kenyo Joisiraili je jowok woko, wok Dan tundo Berseba, kiri gi piny ma Giliad, aka kweth no jocokere iy'acel ruwaŋ Rwoth i Mizipa.

²Rwodhe pa ji je, apa nonin ma Isiraili je, jonyuthere i kacokirok pa ji pa Were, jolweny 400,000 ma jowotho atiendi ma jotiŋo gilweny.

³(Onyo jo Benyamin jowinjo ni Joisiraili oyido jokadho malo kiri i Mizipa.) To Joisiraili jowaco ni, “Waci win riwan, tim ma kidakana me obino nedi?”

⁴Jalevi, cwor dhako m'oneki, odwoko ni, “Abino i Gibeya m'obedo apa Benyamin, an gi malaya paran, nindo.

⁵Jodhum ma Gibeya joay kwoŋan, to jothoko ot wor. Oyido jomito nekan, to jomako malaya paran to jonindo gine cuka otho.

⁶Kenyo t'apodho kwoŋ malaya paran t'athumo mathindho thindho, t'adhiro go iy'adec ma Isiraili je paka rom; kwoŋbedo jotieko timo gikidakana ma wickwot i Isiraili.

⁷Onyo pama, wi Joisiraili, wijoje, miyere win rieko kodi nwaŋo gir'atima.”

⁸Ji je joay malo iy'acel, ka jowaco ni, “Kada ŋat'acel kwoŋ wan k'okidhi i wema, aka kada ŋatimoro kwoŋ wan k'okidhi i ot pere.

⁹To onyo pama, me a gima walatimo ri Gibeya: Walabolo kwir kwoŋ Gibeya.

¹⁰Walakwanyo cwo kwoŋ 100 kwoŋ nonin je ma Isiraili, aka 100 kwoŋ gana, aka gana kwoŋ gana apar, ma nwaŋo gimoro ri ji ma jolatimo ri bino pajo i Gibeya ma Benyamin ri giwickwot ma miŋo cungo kwoŋ gimoro je ma go otieko timo i Isiraili.”

¹¹To cwo ma Isiraili je jocokere kwoŋ tindi madwoŋ, munyo jomakere iy'acel.

¹²Nonin ma Isiraili jodhiro cwo i nono pa Benyamin paka rom, ka jowaco, “Me gimarac aŋo m'otiek timo i dier win?

¹³Onyo pama, kethi win cwo ma jongoye kony no i Gibeya, ŋey wanyal neko jo, ŋey wacidi woko reco no i Isiraili.” To jo Benyamin jok'owinjo dwondi wutmin jo, Joisiraili.

¹⁴Jo Benyamin jocokere kanyacel wok i tindin madongo ma kidho i Gibeya, kadho lweny gi Joisiraili.

¹⁵I ndelo no jo Benyamin jocoko cwo 26,000 wok i tindin pajo madongo ma jotiŋo gilweny, ketho meno gicen, jopiny ma Gibeya oyido joromo welo ma cwo 700 m'oyer.

¹⁶Kwoŋ cwo 700 m'oyer me, oyido jor'acam, kisi dhano oyido dwiro asumulu ma tele i koyo, aka k'ibedi ma k'ogoyo gimoro.

¹⁷Joisiraili, ka ikwanyo woko jo Benyamin, oyido joromo cwo 400,000 joje oyido jobedo jolweny.

¹⁸Joisiraili joay malo to jokidho i Bethel to jopenjo Were, aka jowaco ni, “Ŋa kwoŋ Joisiraili wotel kidho riwan malo lweny gi ji pa Benyamin?” Rwoth odwoko ni, “Yuda ama wotel kidho malo.”

¹⁹Kenyo Joisiraili joay malo odikin, to joketho kambi pajo gi thengi Gibeya.

²⁰Joisiraili jowok woko lweny gi jonono pa Benyamin; to jocero bol ma lweny kwoŋ jo i Gibeya.

²¹Jonono pa Benyamin jowok woko ma Gibeya, to joreyo woko i ndelo no Joisiraili 22,000.

²²Ji jomiyere miseni to cwo ma Isiraili jotimo kendo can ma lweny i kabedo ma jocan'iye kenyo i ndelo marapena.

²³Joisiraili jokadho malo to joywak ruwaŋ Rwoth cuka tundo othieno ka jopenjo Rwoth ni, “Wanocore cegin kendo ri lweny gi jo Benyamin wutmin wan?” Rwoth odwoko ni, “Kadhi malo ilweny.”

²⁴Joisiraili jocore cegin gi jonono pa Benyamin i ndelo mar'ario.

²⁵Benyamin owok woko romo gi jo wok i Gibeya i ndelo mar'ario, to reyo woko i dier Joisiraili kendo cwo 18,000 jome je oyido jotiŋo gilweny.

²⁶Kenyo Joisiraili je, gi ji je jokidho i Bethel to joywak, jobedo piny ruwaŋ Rwoth, joriyo kec ndelo no cuka tundo othieno. Kenyo to jomiyo mic awaŋa kodi cowirok ma siem ruwaŋ Rwoth.

²⁷To Joisiraili jopenjo Rwoth rupiri Kakan ma Cikirok pa Were oyido nitie kenyo i hongo no,

²⁸aka Finehas wod pa Eliazar, wod pa Aron, oyido cungo ruwaŋe i hongo no ka penjo ni, “Wanokidhi kendo lweny gi jonono pa Benyamin wutmin wan, kosa wanowey?” Rwoth odwoko ni, “Kadhi malo, rupiri dikin alaketho jo i cingi win.”

²⁹Joisiraili joketho jor'apondi thoko Gibeya.

³⁰Kenyo Joisiraili jokidho malo ri jonono pa Benyamin i ndelo mar'adek, joketho jolweny pajo ŋiyo Gibeya, paka con mere.

³¹Munyo jonono pa Benyamin jowok woko romo gi jolweny, oyway jo wok i tindi madwoŋ. To jocako rwadho ji megi piny gi litho ma kiwacere, i royin madongo, ma acel kwoŋ jo kidho i Bethel gi man ma kidho i Gibeya, kiri kam'othangere, aka joneko cegin cwo ma Isiraili piero adek.

³²Jonono pa Benyamin jowaco ni, “Wafodo jo piny, paka con mere.” To Joisiraili jowaco ni, “Weyi waringi to waywayo jo gicen wok i tindi madwoŋ kadho yu royin.”

³³To cwo ma Joisiraili je joay wok i kabedo pajo to jocokere kendo i Bal Tamar, kareno Joisiraili m'oyido jotimo apondi jorure wok i kabedo pajo wok i kam'othangere m'obipere ma Geba.

³⁴To jobino ruwaŋ Gibeya cwo 10,000 m'oyer wok kwoŋ Isiraili je, to lweny bedo mapek. Jonono pa Benyamin jok'oŋeyo nike litho oyido bino rijo.

³⁵Rwoth orwadho piny Benyamin ruwaŋ Isiraili; aka Joisiraili joreyo woko cwo 25,100 apa Benyamin i ndelo no, joje oyido jotiŋo gilweny.

³⁶Kenyo jonono pa Benyamin joneno ni otiek cwado jo. Joisiraili jomiyo jonono pa Benyamin kabedo, kwoŋbedo joketho geno i jolweny ma jor'apondi ma joketho i Gibeya.

³⁷Jor'apondi jorure piyo i Gibeya. Jor'apondi joywore i tindi madwoŋ to joneko ji je g'abor.

³⁸Oyido nitie ranyuth m'oyik ri cwo ma Isiraili gi jor'apondi ni ka yiro madwoŋ oduny malo wok i tindi madwoŋ

³⁹cwo ma Isiraili joripo gik i lweny. To Benyamin oyido ocako cwado ji gi litho madwoŋ i dier Joisiraili, oneko cegin cwo ma romo piero adek; ameno to jowaco ni, “Adieri okengila jo ruwaŋ wan, paka i lweny marapena.”

⁴⁰To munyo pondeponde, siro ma yiro, ocako duny wok i tindi madwoŋ, jo Benyamin joŋiyo yuŋey jo aka oyido nitie tindi madwoŋ gibe kadho malo yupolo.

⁴¹Kenyo cwo ma Isiraili jowire, to cwo pa Benyamin jobwok, kwoŋbedo joneno gimarac cegin gi jo.

⁴²Riameno jowire woko ruwaŋ Joisiraili yu royo ma thim; to lweny yombo jo, aka jono ma jowok i tindi madwoŋ oyido joreyo woko jo i diere.

⁴³Jothoko jo Benyamin, to joriemo jo wok kaywomirok to jotega jo piny bor kiri yuwok ceŋ ma Gibeya.

⁴⁴Jo Benyamin 18,000 jopodho, aka jome je oyido jobedo jolweny ma jomeni.

⁴⁵Munyo jowire to jodwire i thim i tele ma Rimon, 5,000 kwoŋ jo othum jo piny i royin madongo, t'iriemo bor kiri Gidom, aka oneki cwo 2,000 kwoŋ jo.

⁴⁶Ameno jono je ma jopodho i ndelo no ma jowok kwoŋ Benyamin obedo cwo 5,000 ma jotiŋo gilweny, aka jome je oyido jobedo cwo ma jomeni.

⁴⁷To cwo 600 jowire to jodwire i thim i tele ma Rimon, to jodoŋ i tele ma Rimon ma dwe aŋwen.

⁴⁸To cwo ma Isiraili jowire rijo Benyamin to joneko jo gi lew abor wok i tindi madwoŋ, ogwaŋe, ji je m'onwaŋ kodi gimoro je m'odoŋ. Tindin madongo je ma jodoŋ m'onwaŋ, owaŋ gi mac.