Read dhopadhola Jothum Banja 21 Bible Online

Jothum Banja 21 - dhopadhola bible

Jothum Banja 21

¹Cwo ma Isiraili oyido jotieko kwoŋere i Mizipa ni, “Ongoye jacwo kwoŋ wan ma lamiyo nyare ri jonono pa Benyamin paka dhako.”

²Aka ji jobino i Bethel, to jobedo kenyo tundo othieno ruwaŋ Were, to jotiŋo dwondi gin malo to joywak tektek.

³Jowaco ni, “Awi Rwoth, Were pa Isiraili, Raŋo gime otimere i Isiraili ni luth acel ma nyweny ma dhum worem i ndelo ma konon wok kwoŋ Isiraili?”

⁴I ndelo ma luwo, ji jocewi con, to jogeto kenyo migam, to jomiyo mic awaŋa gi mic ma siem.

⁵Kenyo Joisiraili jopenjo ni, “Mene kwoŋ nonin je ma Isiraili ma k'obino malo i kacokirok bongi Rwoth?” Kole kwoŋirok madwoŋ oyido otiek timo ma mako kwoŋ ŋatimoro je ma k'obino malo bongi Rwoth i Mizipa, ka waco ni, “Ŋato iripo neko.”

⁶To Joisiraili jomako wor gi Benyamin omin jo, to jowaco ni, “Omor woko nono acel kwoŋ Isiraili i ndelo me.

⁷Wanotim aŋo ri mon pa jono ma jodoŋ, paka watieko kwoŋere gi Rwoth ni wak'omiy jo kad'acel kwoŋ nyir mawan paka mon?”

⁸Kenyo jopenjo ni, “Nitie nyatoro ma wok i nonin ma Isiraili ma k'obino malo bongi Rwoth i Mizipa?” Kenyo to nwaŋere ni ongoye ŋatimoro ma wok i Yabes Giliad m'obino i kambi, i kacokirok.

⁹Kole munyo okwan ji onwaŋere ni jopiny ma Yabes Giliad oyido jongoye kenyo.

¹⁰Ameno cokirok no odhiro cwo ma jomeni 12,000 kenyo to jomiyo jo or ni, “Kadhi win, wineki jopiny ma Yabes Giliad, mondongo kodi nyithindho.”

¹¹“Me a gima wilatimo; kisi jacwo kodi kisi dhako m'otieko nindo gi jacwo wiripo reyo woko kicutho.”

¹²To jonwaŋo i dier jopiny ma Yabes Giliad nyir mambula 400 to jokelo jo i kambi i Silo, manitie i piny ma Kanan.

¹³Kenyo cokirok gibe joluwo kodi jonono pa Benyamin m'oyido jonitie i tele ma Rimon, to jotito rijo siem.

¹⁴Benyamin odwoko i hongo no; to jomiyo jo mondongo ma jok'oneko kwoŋ mondongo ma Yabes Giliad; to nwaŋere ni jok'obedo m'oromo rijo.

¹⁵Ji jomako wor gi jonono pa Benyamin kwoŋbedo Rwoth oyido oturo woko riwirok pa nonin ma Isiraili.

¹⁶Ameno jotel ma cokirok jowaco ni, “Wanotim aŋo ri mon pa jono ma jodoŋ, kwoŋbedo ongoye mondongo ma jodoŋ wok kwoŋ Benyamin?”

¹⁷To jowaco ni, “Musikin joripo bedo ri ji pa Benyamin ma joboth, ŋey wongoye nono ma worere woko wok kwoŋ Isiraili.

¹⁸Kucel wakinyali miyo jo nyar wan moro je paka dhako.” Kole Joisiraili oyido jotieko kwoŋere ni, “Lam ri ŋatimoro je m'omiy dhako ri janono pa Benyamin.”

¹⁹Ameno jowaco ni, “Neni, kalima pa Rwoth ma kisi oro timere i Silo, manitie yumalo ma Bethel, yuwok ceŋ ma royo ma kadho malo wok i Bethel kidho i Sekem, kodi yupiny ma Lebona.”

²⁰Jowodho or ri jonono pa Benyamin ni, “Kadhi win wipodhi piny wikuri i ndelin vini,

²¹aka wibedi waŋwin; ka nyir ma Silo jowok woko miel i miele, nyaka to wifudhere wok i ndelin ma vini to kisi dhano kwoŋ win yudho dhako rigo won wok kwoŋ nyir ma Silo, to wikadho i lowo pa Benyamin.

²²Kenyo ka bacere pajo kosa wutmin jo jobino to jogeŋisa riwan, walawaco rijo ni, ‘Bedi win gi wor aka wiyey wan bedo gi jo; rupiri wak'imako dhako i lweny ri kisi jacwo. To wikibedo jobanja ro miyo nyir mewin rijo.’ ”

²³Jo Benyamin jotimo ameno; joyudho mondongo ri kisi dhano kwoŋ jo wok kwoŋ jomiel ma jopodho kwoŋ jo. Kenyo jogik iy'adec pajo, to jogeto tindin madongo kendo, to jobed'iye.

²⁴Ameno Joisiraili joweyo kenyo i hongo no cungo kwoŋ nono gi pecin, to jowok kenyo kadho iy'adec pajo wegi.

²⁵I hongo no oyido ongoye kere i Isiraili; kisi jacwo otimo gim'otire i waŋe.