Read dhopadhola Jothum Banja 4 Bible Online

Jothum Banja 4 - dhopadhola bible

Jothum Banja 4

¹Joisiraili kendo jotimo reco ruwaŋ Rwoth munyo Ehud otieko tho.

²Rwoth otana jo i cingi Yakin kere ma Kanan, m'oyido dhumo i Hazor, aka jamituka jolweny pere oyido obedo Sisera m'oyido bedo i Haroseth Hagoyim.

³Joisiraili joywak ri Rwoth, kole Yakin oyido nitie gi cawilin ma nyweny 900 aka odiyo Joisiraili ma oro piero ario.

⁴I hongo no Debora, cipa Lapidoth, aka jatuci wac Were madhako oyido jathum banja pa Joisiraili.

⁵Debora oyido bedo i tiendi yath thith, i dier Rama kodi Bethel i piny matendere ma Efrayim; aka Joisiraili oyido jokadho malo bongi go thumo rijo banja.

⁶Debora ooro wolwoŋi Barak wod pa Abinowam wok i Kedes Nafital, aka owaco rigo ni, “Rwoth, Were pa Isiraili miyin or, kadhi yu Got Tabor, gi cwo 10,000 wok i nono pa Nafital kodi nono pa Zebulun.

⁷Alacoro bongin, i milelo ma Kison, Sisera jamituka pa jolweny pa Yabin, gi cawilin pere kodi jolweny pere, aka alamiyo go i cingin.”

⁸Barak odwoko Debora ni, “K'ilakadho kodan, alakadho, to k'ikilakadho kodan, akilakadho.”

⁹Debora owaco ri Barak ni, “Alakadho kodin adieri, kareno royo m'ikadh'iye kilakelo rin dwoŋ, kole Rwoth lakitana Sisera i cingi dhako.” Kenyo Debora oay to jokadho gi Barak i Kedes.

¹⁰Barak olwoŋo nono pa Nafital kodi nono pa Zebulun, to cwo 10,000 joluwo go. Debora okadho malo gi go.

¹¹Onyo Heber Jakena oyido opok go kwoŋ nyikway Hobab or Musa, aka go oyido okecere bor gi Jokena to geto wema pere i yath madwoŋ i Zananim, manitie cegin gi Kedes.

¹²Onyo owaci ri Sisera nike Barak wod pa Abinowam oyido okadho i Got Tabor.

¹³Sisera ocoko cawilin pere ma nyweny 900 kodi ji je m'oyido jonitie gi go i Haroseth Hagoyim to jokadho i malawa Kison.

¹⁴Debora owaco ri Barak ni, “Ay, konon me Rwoth miyo Sisera i cingin. Rwoth adieri telo yuwiyin.” Ameno Barak oloro piny wok wi Got Tabor, gi cwo 10,000 ma joluwo go.

¹⁵Rwoth obolo Sisera gi cawilin pere je kodi jolweny pere i nywowirok ruwaŋ Barak; aka Sisera oloro wok i cawila pere to ringo atiendi.

¹⁶Barak oriemo cawilin kodi jolweny tundo kiri Haroseth Hagoyim. Jolweny je pa Sisera oneki jo g'abor m'ongoye jacwo m'obothi.

¹⁷Sisera oringo atiendi kiri i wema pa Yael cipa Heber Jakena; kole siem oyido nitie i dier Kere Yabin ma Hazor kodi Heber Jakena.

¹⁸Yael owok romo gi Sisera, aka owaco ri Sisera ni, “Wire githenge, wire githenge bongan, rwoth paran, Ikir'ilwor.” Sisera owire to donjo i wema, aka oumo go gi kutu.

¹⁹Sisera owaco ri Yael ni, “Mondo miye pi nyaka mathin amadhi, riyo nekan.” Yael oyawo cupa cak to miyo go madho, to umo go.

²⁰Sisera kendo owaco ri Yael ni, “Cungi i dhiot ma wema, aka ka jacwo moro obino to penjin ni, ‘Nitie dhano kenyo?’ Idwoki ni, ‘Ongoye.’”

²¹To Yael cipa Heber okwanyo luth ma wema kodi nyundu i cinge, aka oliwere to goyo i wic Sisera matek i lowo. Kole Sisera oyido ool swa ma nindo okwalo piyo. Ameno to go tho.

²²Barak obino munyo riemo Sisera, aka Yael owok romo gi go, to waco ni, “Biye, alanyuthin jacwo m'irango.” Munyo Barak obino bonge, neni Sisera oyido oriere piny i lowo m'otho gi luth ma wema i wic mere.

²³I ndelo no Rwoth okengila Yabin kere ma Kanan ruwaŋ Joisiraili.

²⁴Cingi Joisiraili olokere matek swa kwoŋ kere Yabin ma Kanan cuka joreyo woko go.