Read dhopadhola Jothum Banja 5 Bible Online

Jothum Banja 5 - dhopadhola bible

Jothum Banja 5

¹Debora kodi Barak jowero i ndelo no ka jowaco:

²K'ogony jotel i Isiraili, ji wegi jomiyere pako Rwoth.

³Winji win, awi kerin, ciki ithi win, awi jodhum, An, alawero ri Rwoth, alawero pak ri Rwoth Were pa Isiraili.

⁴Awi Rwoth, munyo iwok i Edom, munyo iŋanjo wok i thim ma Edom, piny oyengere, polo kodi pondeponde jocwero pi.

⁵Gote jomol wok ruwaŋ Rwoth, got Sinai me wok ruwaŋ Rwoth, Were pa Isiraili.

⁶I ndir pa Samigar, wod pa Anath, i ndir pa Yael, royin jocegere, aka jowoth jotho i royo m'oban.

⁷Ji ma calin jorumo i Isiraili, jorumo, cuka an, Debora, ay paka min jo i Isiraili.

⁸Munyo oyer werin manyen, to lweny obedo i waŋkace, onen kwot kodi abor, i dier gana piero aŋwen i Isiraili?

⁹Anitie gi cunyan ri jomituka ma Isiraili, ma jomiyere i dier ji, pako Rwoth.

¹⁰Luw win kwoŋe, win ma wigweyo punde madhako ma lando, win ma wibedo i law aka wiwotho i royo.

¹¹Wok i lokoro pa joma jopoko gim'onyaga i ka twomo pi, kenyo joluwo kwoŋ tim pa Rwoth m'otire, tim m'otire pa ji pere ma jobedo i calin i Isiraili. Kenyo ji pa Rwoth jokadho piny i waŋkace.

¹²Ay, ay Debora, ay, ay, ituci wer, Ay, ay, Barak, itel jojiera perin, awi wod pa Abinowam.

¹³Kenyo go omiyo go m'odoŋ thumo jotel pa ji Rwoth omiyan dhumo jomeni.

¹⁴Wok i Efrayim, fuc pajo i Amalek, rumacen perin, Benyamin, i dier ji perin, wok i Makir jomituka joŋanjo piny, wok i Zebulun jono ma jotiŋo luth ma dhum.

¹⁵Jodhum ma Isakar jobino gi Debora, kiri Isakar, kodi Barak, oriy go kadho i milelo atiendi. I dier tiakirok ma nono pa Benyamin, oyido nitie paro kweth m'opokere.

¹⁶Raŋo ibedo i dier sidwol, winjo mwoŋo pa mwendi? I dier nonin pa Ruben oyido nitie paro kweth m'opokere.

¹⁷Giliad obedo i thenge ca ma Yordan, kodi Dan, raŋo go odoŋ i mele? Aser obedo i thengi nam, jobedo i kapie pere.

¹⁸Zebulun jobedo ji ma jojala kwo pajo ri tho, Nafital bende kam'oŋawere ma sa.

¹⁹Kerin jobino, jolwenyo, kenyo kerin ma Kanan jolwenyo, i Tanak i thengi pi ma Megido, to jok'otero feza.

²⁰Micalin jolwenyo wok i polo, wok i yo pajo jolwenyo gi Sisera.

²¹Malawa Kison oyweyo woko jo, malawa macene no, malawa Kison. Woth i meni awi adundo paran.

²²Kenyo kayinin jogoyo mayindo, jonyono piny gi tiendi gin.

²³Kwoŋ Meroz, malaika pa Rwoth waco, kwoŋ ji ma jobedo i go, kwoŋbedo jok'okonyo Rwoth, konyo Rwoth kwoŋ jomeni.

²⁴Yael cipa Heber Jakena, labedo jasilwany loyo mondongo, labedo jasilwany loyo mondongo ma jonitie i wema.

²⁵Sisera okwayo pi, to go miyo cak, go okelo rigo mo iy'acero ma welo.

²⁶Go okwanyo luth wema gi cinge, aka cinge maracuc okwanyo nyundu pa jatic, ogoyo gine Sisera to baro wiye, ocwowo to ŋinyo wiye.

²⁷Sisera okule i ŋangi go, opodho piny i tiendi go, aka kama go okule iye no, oriere piny m'otho.

²⁸Min Sisera oleŋo waŋe gi dirisa, aka oywaki yuŋeye ka penjo; Raŋo cawila pere kibin? Raŋo mayindo ma tiendi cawila pere ogalo?

²⁹Mondongo pere ma joriek jodwoko go, adieri, go won dwoko penji pere.

³⁰Kere jokinwaŋ kodi poko gim'onyaga? Nyako kosa nyir ario ri kisi jasirikale, nangin m'owir gi rangi ri Sisera, nangin m'okwoy m'owir gi rangi ma ŋuti jo.

³¹Ameno weyi jokwor perin je joworere, awi Rwoth, to weyi jono ma jomaro go jowocale paka waŋceŋ ka wok i meni mere. Aka piny opie ma oro piero aŋwen.