Read dhopadhola Jothum Banja 7 Bible Online

Jothum Banja 7 - dhopadhola bible

Jothum Banja 7

¹Yerubal (meno Gideon) kodi ji m'oyido jonitie gi go joay con to joketho kambi i thengi waŋ pi ma Harod. Kambi pa Jomidian oyido nitie yumalo pajo, gi tendere ma More, i milelo.

²Rwoth owaco ri Gideon ni, “Ji ma jonitie kodin jothoth swa ran miyo Jomidian i cingi jo. Joisiraili jonyalo pakirok ka jowaco nike cingi jo am'obotho jo.

³Onyo riameno tuci i ithi ji k'iwaco ni, ‘Ŋata nitie gi bwok aka jalworo, weyi go wodoki, aka wokadhi con wok i got Giliad.’ ” Aka ji 22,000 jodok, to doŋ ji 10,000.

⁴Rwoth owaco ri Gideon kendo ni, “Ji fodi jothoth swa. Keli jo piny i pi aka alapoko jo rin kenyo. Ŋat'anowaci rin nike lakadho kodin ama lakadho kodin, to ŋat'anowaci rin nike kilakadho kodin, wokiri wokadhi.”

⁵Ameno Gideon okelo ji piny i pi. Rwoth owaco ri Gideon ni, “Ŋat'omadhi pi gi lewe paka gwok, ikethi go gicen kwoŋ ŋat'ogur conge piny madho pi.”

⁶Jono ma jotwomo pi i cingi jo to jomadho gi lew jo paka gwok obedo cwo 300; to joman je joguro congi jo piny madho pi.

⁷Rwoth owaco ri Gideon ni, “Gi cwo 300 ma jomadho pi paka gwok alabotho win; alamiyo Jomidian i cingin. Weyi joman je jodok i kabedo pajo.”

⁸Ameno Gideon okwanyo agwatin kodi gwarin pajo i cingi jo, to oro Joisiraili ma jodoŋ je i wemin pajo, to go doŋ gi cwo 300. Kambi pa Jomidian oyido nitie piny pere i milelo.

⁹Wor no won Rwoth owaco ri Gideon ni, “Ay malo, kadhi piny i kambi pa Jomidian; kole atieko miyo i cingin.

¹⁰To k'inen ilworo kadho piny i kambi, kadhi gi ŋeca perin Pura.

¹¹Iwinji gima jowaco, aka rumacen cingin labedo matek kadho piny monjo kambi.” Kenyo Gideon okadho piny gi ŋeca pere Pura i thengi cwo ma jotiŋo gilweny i kambi.

¹²Jomidian kodi Joamalek kodi ji ma yuwok ceŋ jobedo i milelo m'opoto paka bonyo. Ŋamin pajo oyido kikwanere paka kwoyo ma thengi nam.

¹³Munyo Gideon jobino i kambi, panen, oyido nitie jacwo ma waco ri nyawote lek. Jacwo no owaco ni, “Aleko ni mugat ma bale oloro i kambi pa Jomidian, obino i wema to turo piny, aka wema oriewere piny.”

¹⁴Nyawote odwoko ni, “Me k'obedo giman kwanyowoko abor pa Gideon wod pa Yowas, jacwo pa Isiraili. Were otieko miyo Jomidian kodi jolweny je i cinge.”

¹⁵Munyo Gideon owinjo lek wacere kodi dwoŋ mere, go olamo Rwoth. Gideon ogik i kambi pa Joisiraili to waco rijo ni, “Ay win, kole Rwoth otieko miyo jolweny pa Jomidian i cingi win.”

¹⁶Gideon opoko cwo 300 no i kitipin adek, aka oketho i cingi joje agwatin ma ninono manitie tala iye.

¹⁷Gideon owaco rijo ni, “Ŋiyan win, aka witim paka atimo. Neni, k'abino i thengi kambi, tim win gim'anotim.

¹⁸Ka akudho gwara, an kodi jono je ma jonitie bongan, kudhi win bende gwarin i thenge je ma kambi, aka wikoki ni, ‘Ri Rwoth kodi ri Gideon.’ ”

¹⁹Ameno Gideon kodi cwo m'oyido jonitie bonge jobino i thengi kambi i cakirok ma kur ma dier wor, munyo nyaka jokur jocako kuro; jokudho gwarin to joturo agwatin m'oyido jotiŋo i cingi jo.

²⁰Ameno kitipin adek je jokudho gwarin, to joturo agwatin m'oyido jotiŋo i cingi jo. Jotiŋo tala i cingi jo maracam, aka i cingi jo maracuc gwarin ma jokudho; to joywak ni, “Abor ri Rwoth kodi ri Gideon.”

²¹Kisi jacwo ocungo i kabedo pere thoko kambi pa Jomidian, aka jolweny pa Jomidian je joringo; joywak to joringo woko.

²²Munyo jokudho gwarin 300 je, Ruth omiyo kisi jalweny pa Jomidian monjo nyawote g'abor pere; aka joringo bor kiri Bethsita yu Zerera, bor kiri i kew gi Abelmehola yu Tabath.

²³Olwoŋi cwo ma Isiraili wok i nono pa Nafital kodi wok i nono pa Aser kodi Manase je, to joriemo Jomidian.

²⁴Gideon ooro jomikwenda i piny matendere je ma Efrayim ka waco ni, “Lori win wilweny gi Jomidian, wimaki kwoŋ jo pi tundo kiri Bethbara, kodi Yordan bende.” Ameno olwoŋi cwo je ma Efrayim to jomako pi bor kiri Bethbara kodi Yordan bende.

²⁵Jomako jotel pa jolweny ma Midian ario, Oreb kodi Zebi. Joneko Oreb i tele Oreb, to joneko Zebi i kadhiŋo vini ma Zebi, munyo joriemo Jomidian. Jokelo wic Oreb kodi wic Zebi ri Gideon kalo Yordan.