Read dhopadhola Jothum Banja 8 Bible Online

Jothum Banja 8 - dhopadhola bible

Jothum Banja 8

¹Cwo ma Efrayim jowaco ri Gideon ni, “Me aŋo m'itimo riwan, ma ikilwoŋo wan munyo ikadho lweny gi Jomidian?” Jodhaw gi go gi gero.

²Gideon odwoko jo ni, “Onyo aŋo m'atieko timo paka win? Fono nyingi vini ma Efrayim kiber loyo ma Abieza?

³Were otieko miyo i cingi win jotel jolweny ario ma Midian, Oreb kodi Zebi; onyo aŋo manyalo timo ma pimere gi win?” Kenyo nge pajo kwoŋ go ojukere munyo go owaco gime.

⁴Gideon obino Yordan to ŋado, aka go kodi cwo 300 m'oyido jonitie bonge oyido jool kareno joriemo Jomidian.

⁵Go owaco ri ji ma Sukoth ni, “Mondo miy win ji ma joluwan mugat; kole jool aka ariemo Zeba kodi Zalmuna kerin pa Jomidian.”

⁶To jodhum ma Sukoth jodwoko ni, “Itieko mako Zeba kodi Zalmuna i cingin ma nyo ripo wamiy jolweny perin mugat?”

⁷Gideon owaco ni, “Meno ber, ka Rwoth otieko miyo Zeba kodi Zalmuna i cingan, alanyono delkwoŋ win i kudhin kodi okure ma thim.”

⁸Wok kenyo Gideon okadho malo i Penuel to miyo jo kwac acel no. To cwo ma Penuel jodwoko go i nger acel paka cwo ma Sukoth.

⁹Gideon owaco ri cwo ma Penuel ni, “K'anodwoki i siem, alaturo piny acurcur me.”

¹⁰Onyo Zeba kodi Zalmuna oyido jonitie i Karkor gi jolweny pajo, ma romo cwo 15,000 m'oyido jodoŋ joje jolweny pa ji ma yuwok ceŋ. Kole cwo 120,000 ma jolweny oyido jotho.

¹¹Gideon okadho malo gi royo ma thengi thim yuwok ceŋ ma Noba kodi Jogbeha, aka omonjo jolweny abwap.

¹²Zeba kodi Zalmuna joringo, to Gideon oriemo jo aka omako jo to miyo jolweny pa Jomidian kirin.

¹³Gideon odwoko wok i lweny gi royo ma Heres.

¹⁴Go omako jayac, acel kwoŋ ji ma Sukoth to penjo penji, aka jayac no ondiki rigo nyingi jodhum kodi jotel ma Sukoth, cwo piero abirio g'abirio.

¹⁵Gideon obino bongi cwo ma Sukoth to waco rijo ni, “Panen, ee Zeba kodi Zalmuna, ma wiŋalan gi jo ka wiwaco ni, ‘Itieko mako Zeba kodi Zalmuna i cingin, ma wanomiy jolweny perin ma jool mugat?’ ”

¹⁶Gideon okwanyo jodongo ma tindi madwoŋ to kwanyo kudhin ma thim kodi okure to nyono gine ji ma Sukoth.

¹⁷Go bende oturo piny acurcur ma Penuel, to neko cwo ma tindi madwoŋ.

¹⁸Gideon openjo Zeba kodi Zalmuna ni, “Nger cwo aŋo ma wineko i Tabor?” Jodwoko ni, “Cwo ma jocalin, joje oyido jocale wot kere.”

¹⁹Gideon owaco rijo ni, “Jo oyido jobedo wutmin an, wot mama; paka Rwoth kwo, kabedi oyido wiwey jowokwo, dinyo akineko win.”

²⁰Gideon owaco ri okayo pere ni, “Ay ineki jo.” To jayac no obwok, kwoŋbedo go oyido fodi soye.

²¹Kenyo Zeba kodi Zalmuna jowaco ni, “In won ay ineki wan; kole paka jacwo nitie, apaka meni pere bende.” Ameno Gideon oay to neko Zeba kodi Zalmuna, to kwanyo thiwino m'oyido nitie i ŋuti ŋamin pajo.

²²Joisiraili jowaco ri Gideon ni, “Dhum wan, in, wodin, kodi wod wodin bende; kole itieko botho wan wok i cingi Jomidian.”

²³Gideon odwoko jo ni, “An akiladhumo win, aka wodan kiladhumo win; Rwoth ama ladhumo win.”

²⁴Gideon omedo waco rijo ni, “Weyi atim kwac paran riwin, kisi dhano womiyan milom pere m'okwanyo.” Kole oyido jonitie gi milomin ma zahabu, kwoŋbedo oyido jobedo jonono pa Isimayil.

²⁵Ji jodwoko ni, “Walamiyin adieri.” Ameno jopedho law, aka kisi dhano obol'iye milom pere m'okwanyo.

²⁶Peko ma milomin ma zahabu ma Gideon okwanyo oromo kilo piero ario medo wi thiwino ma zahabu kodi law manyarangi ariŋo m'oyido kerin ma Midian joruko kodi thiwino m'oyido nitie i ŋuti ŋamin pajo.

²⁷Gideon otimo cal gi zahabu no aka oketho i tindi pere, i Ofira; aka Joisiraili je jotimere paka malayin gine, to lokere ri Gideon kodi peco pere bwo.

²⁸Ameno Joisiraili jokengila Jomidian, aka jok'otiŋo wiy gin malo kendo. Lowo obedo m'okwe ma oro piero aŋwen i hongo pa Gideon.

²⁹Gideon wod pa Yowas okadho to bedo i peco pere won.

³⁰Gideon oyido nitie gi wote piero abirio ma remo pere won, kwoŋbedo go oyido nitie gi mon kweth.

³¹Dhako ma thenge pere m'oyido nitie i Sekem onywolo rigo wode, aka ocwoki nyinge ni Abimelek.

³²Gideon wod pa Yowas otho i oro maber ma tegino, aka oyiki go i kaliel pa Yowas, bamere, i Ofira pa jonono pa Abieza.

³³Munyo Gideon otieko tho, Joisiraili jogik kendo cako lamo Bal, to joketho Bal Berith were pajo.

³⁴Joisiraili jok'opoyo nike Rwoth Were pajo, m'oyido obotho jo wok i cingi jokwor pajo thoko jo.

³⁵Jok'onyutho kiri dwoŋ ri peco pa Gideon paka foc ri bero je ma go otimo ri Isiraili.