Read dhopadhola Menyirok ri Yohana 1 Bible Online

Menyirok ri Yohana 1 - dhopadhola bible

Menyirok ri Yohana 1

¹Me a wac m'omenyere ma Were omiyo Yesu Kristo, ŋey wonyuthi jotic pa Were gima ripo timere mayot. Kristo omiyo gigipiny me oŋeyere ri jatic pere Yohana munyo ooro malaika pere bonge.

²Yohana oridho wac pa Were kodi gima mako kwoŋ adieri pa Kristo, gi gimoro je m'oneno.

³Ŋata soma wac atuca me jasilwany, aka joma ciko ithi jo ri wac me gi ketho i cuny jo jonigi silwany, rupiri ndir cegin tundo ma gigipiny me bino timer'iye.

⁴Ndiko m'owok bongi Yohana ri jom'oyeyo ma kitipin abirio ma iy'adec ma Asia. Nema gi siem wobedi riwin wok bongi Were, manitie pama, m'obedo con, odoko ma fodi bino bedo, kodi ma wok bongi cuny m'omakere abirio ma ruwaŋ kom pere ma dhum,

⁵kodi ma wok bongi Yesu Kristo, jakony ma genere, Wode makayo m'otel cerino go kwoŋ jom'otho, aka obedo jadhum pa kerin je ma piny! Go omaro wan, aka gi remo pere ogonyo wan woko kwoŋ reco mawan,

⁶ to loko wan bedo ker, kendo joma cwayo wi migam pa Were kendo Bamere. Dwoŋ kodi meni wobedi rigo cil gi cil. Ameno.

⁷Panen, go eno bino gi pondeponde! Aka kisi waŋ dhano bino neno go, kiri joma jocwowo go je. Ji je ma piny jobino ywak kwoŋbedo go. Apaka bino bedo! Ameno.

⁸“An a marapena kendo macowe,” Rwoth Were Majameni je waco; go manitie pama, m'obedo con, kendo bino bedo.

⁹An Yohana, omin win manitie gi win i Yesu i candirok, kodi i Ker pere, kodi iciro teko. An onwaŋo obolan i kigoda ma pi othoko ma Patimos ro fonjo wac pa Were kodi bedo jakony ri adieri pa Yesu.

¹⁰Hongo no oyido obedo ndelo pa Rwoth, aka Cuny Maleŋ onwaŋo nikodan, t'awinjo dwondi nyatoro yuŋeyan ka koko pa gwara ni,

¹¹“Ndiki gim'ineno je i kitawo, aka idhiri ri kitipin abirio mapa jom'oyeyo ma Efeso, Simirina, Perigamo, Thiatira, Saridi, Filadelifia kodi Lawodisia.”

¹²Awiro waŋan cen munyo ayenyo neno ŋat'oluwo kodan; to munyo awire, aneno raŋaw talin m'otimi ma zahabu abirio,

¹³aka i dier gigipiny no, aneno ŋati m'ocalo Wod Dhano, m'oruko kanzu mabor to karo i kore del ma zahabu.

¹⁴Wiye kodi ye wiye oyido tar pa yer rombo matar, waŋe oyido cale mac maliel,

¹⁵tiende oyido pilin pa nyweny m'onyel i kendo malieth, aka dwonde oyido cale derino ma gorok pa pi i nam.

¹⁶I cinge maracuc, go oyido otiŋo micalin abirio, aka abor mabith ma nyalewe ario owok i dhoke, aka nyime onwaŋo cale waŋceŋ maliel gi meni mere je.

¹⁷Munyo aneno go, apodho dho i tiende pa ŋat'otho, to go ogeyan gi cinge maracuc to waco ni, “Ikir'ilwor gimoro, me an, an marapena kendo macowe odoko akwo;

¹⁸onwaŋo atho, to neni, onyo akwo cil gi cil. Anitie gi meni kwoŋ tho kodi piny pa jom'otho je.

¹⁹Am'omiyo, ndiki gim'ineno, ma pama kodi ma bino timere rumacen.

²⁰Me a dwoŋ nyaliŋliŋ kwoŋ micalin abirio m'ineno i cingan maracuc no, kodi raŋaw talin ma zahabu, micalin abirio no obedo jomalaika ma kitipin abirio mapa jom'oyeyo, aka raŋaw talin abirio meno kitipin abirio mapa jom'oyeyo no.”