Read dhopadhola Menyirok ri Yohana 10 Bible Online

Menyirok ri Yohana 10 - dhopadhola bible

Menyirok ri Yohana 10

¹Gikenyo aneno malaika man ma jamwamba munyo loro piny wok i polo. Go oyido otwodere gi pondeponde, aka lifudo othoko wiye. Waŋe oyido cale waŋceŋ aka tiende oyido cale kasik mac m'okur.

²Go oyido nitie gi kitawo mathin m'oyawere i cinge. Go oketho tiende maracuc wi nam, to ketho maracam wi lowo,

³aka okoko gi dwonde ma malo m'owinjere paka kihola pa simbwor. Munyo go otieko koko ameno, lithkoth abirio jodwoko wac no gi mor.

⁴Tekin joluwo, onwaŋo acegin ndiko, t'awinjo dwondi nyatoro m'oluwo i polo ni, “Liŋi kodi gima lithkoth abirio jowaco; ikir'indiki!”

⁵Gikenyo malaika m'aneno munyo ocungo wi nam kodi wi lowo otiŋo cinge maracuc malo,

⁶to kwoŋere i nyingi Were, ma bedo cil gi cil, m'ocweyo polo kodi gigipiny je manitie i iye, piny kodi gimoro je manitie i iye, kodi nam gi kisi gima nitie i iye. Malaika no owaco ni, “Galo odoko ongoye,

⁷to i hongo ma malaika mar'abirio lakudh'iye gwara pere, gikenyo Were bino cowo can pere manyaliŋliŋ, paka cango onyutho jotic pere, jotuci wac Were.”

⁸Gikenyo dwondi ŋata nende awinjo ka luwo i polo oluwo kodan kendo munyo waco ni, “Kidhi ikwany kitawo m'oyaw manitie i cingi malaika m'ocungo wi nam kodi wi lowo no.”

⁹Gikenyo akidho bongi malaika no t'akwayo go ni womiyan kitawo mathin no. Go owaco ran ni, “Kwany icami, bino daŋo iyin, to i dhokin bino bedo mamit pa mo kic.”

¹⁰Akwanyo papila no t'acamo to bedo mamit i dhokan pa mo kic, to munyo acowo mwonyo, odaŋo iyan.

¹¹Gikenyo owaco ran ni, “Iripo tuco mikwenda pa Were kendo ri ji mathoth kodi nonin, ri dhodhok kodi ri kerin je.”