Read dhopadhola Menyirok ri Yohana 11 Bible Online

Menyirok ri Yohana 11 - dhopadhola bible

Menyirok ri Yohana 11

¹Gikenyo omiyan midole ma kipima, ma cale bol toŋ, t'iwaco ran ni, “Ay malo ipima Ot pa Were kodi migam, t'ikwano joma lamo Were i iye.

²To weyi woko diedipo ma Ot pa Were. Ikir'ipima rupiri meno otiek miyo Jopath, ma jobino nyono Tindi Maleŋ tieko dwe piero aŋwen g'ario.

³Aka abino miyo jomikwenda paran ario, meni ma tuco mikwenda paran i hongo ma ndelo gana acel miya ario gi piero aucel, kareno joruko kutiyin.”

⁴Jomikwenda ario me, a yen vini ario kodi talin ario ma cungo ruwaŋ Rwoth ma piny.

⁵Ka nyatoro otemi kwinyo jo, mac bino wok i dhok jo to reyo woko jokwor pajo. Me apaka nyatoro je m'otemi kwinyo jo ibino neko.

⁶Jonitie gi meni ma cego pondeponde to koth ngoye i hongo ma jotuc'iye mikwenda pa Were. Jonitie bende gi meni kwoŋ waŋ pi, ma loko jo remo, odoko jonitie gi meni ma kelo two ndir m'omore paka joyenyo.

⁷Ka jotieko tuco mikwenda pajo, ogwaŋ ma lawok i mwombe bino lwenyo gi jo, to loyo jo gi meni to neko jo.

⁸Aka delkwoŋ jo bino m'oyerere i royo ma tindi madwoŋ, kama Rwoth pajo ogur'iye kwoŋ musalaba, ma nyinge iy'ageca ilwoŋo ni Sodom kosa Misir.

⁹Ji ma nonin je, gi dhodhok je jobino neno delkwoŋ jono tieko ndelo adek g'adec, aka jok'oyey woyiki jo.

¹⁰Ji ma piny jobino kisangala gi tho pa jario me. Jobino rweyere to jomiyere mic, rupiri jotuci wac Were ario no onwaŋo jokelo litho madit ri ji ma piny.

¹¹Rumacen munyo ndelo adek g'adec no orumo, luya ma kelo kwo owok i dhok Were to donjo kwoŋ jo, to joay malo; lworo madwoŋ omako ji je ma ceŋino joneko jono.

¹²Gikenyo jotuci wac ario no jowinjo dwondi nyatoro m'oluwo malo i polo ka waco rijo ni, “Biye win ka!” Jono joidho polo gi pondeponde ruwaŋ jokwor pajo.

¹³I hongo no won, yengirok madwoŋ ma piny otimere. Acel kwoŋ apar ma tindi oŋinyere woko, aka ji ma romo gana abirio jotho i yengirok ma piny no. Ji m'odoŋ jobwok to jopako dwoŋ pa Were ma polo.

¹⁴Candirok mar'ario orumo; to neni, candirok mar'adek cegin tundo!

¹⁵Gikenyo malaika mar'abirio okudho gwara pere, to dwondi nyatoro ma koko malo wok i polo, ka waco ni, “Meni Ma dhumo piny pama obedo apa Rwoth kodi Kristo pere, aka go bino dhumo cil gi cil!”

¹⁶Gikenyo jodongo piero ario g'aŋwen m'oyido jobedo wi kombere pajo ruwaŋ Were no jokulo wiy jo piny to jolamo Were

¹⁷munyo jowaco ni, “Rwoth Were Majameni je, ma kwo pama aka wok con go nitie! Wafoyin ni ioro meni perin m'oasere t'icako dhum!

¹⁸Keme opoŋ i cuny nonin; kole onyo ndir otundo, ma nyutho keme perin, gi thumo banja ri jom'otho. Ndiri ma miyo jotic perin, ma jotuci wac, kemba pajo, kodi ji perin maleŋ je, jomadongo kodi jomathindho je ma jolworin. Ndiri otundo ma reyo woko joma nyeko piny!”

¹⁹Ot pa Were ma polo oyido oyaw to sanduku ma cikirok nener'iye. Gikenyo pilin pa lithkoth, derino, mwoc pa koth, yengirok pa piny, kodi pe m'oasere otimere.