Read dhopadhola Menyirok ri Yohana 12 Bible Online

Menyirok ri Yohana 12 - dhopadhola bible

Menyirok ri Yohana 12

¹Gikenyo ranyuth madwoŋ onenere i polo: Obedo dhako moro m'oruko waŋceŋ, aka dwe onwaŋo nitie i tiende piny, kodi sangaria ma micalin apar g'ario i wiye.

²Go oyido cegin nywol, to litho kodi candirok miyo go ywak.

³Ranyuth man onenere i polo ma bulir m'ombo m'obokere gi wic abirio kodi tunge apar, kodi sangaria i wiye abirio je.

⁴Go owaro woko gi yiwe acel wiy adek ma micalin ma i hongo to rwadho jo piny i lowo. Go ocungo ruwaŋ dhako m'oyido cegin nywol no, ni womwonyi nyathi pere tekin podho.

⁵Gikenyo dhako no onywolo wode, ma bino dhumo nonin je gi luth ma nyweny. To, oyudhi nyathi no t'itero bongi Were kama di kom pere ma dhum.

⁶Gikenyo dhako no oringo i thim; Were oyido oyiko rigo kabedo kenyo, kam'ibino kur'iye go cowo hongo ma ndelo gana acel miya ario gi piero aucel.

⁷Gikenyo lweny oere i polo! Mikaili kodi jomalaika pere jolwenyo gi bulir, ma bende olwenyo kodi jomalaika pere.

⁸To oloy bulir, t'iriemo go woko kodi jomalaika pere i polo.

⁹Bulir m'ombo no owit woko! Go a thwol macon ca, m'ilwoŋo ni Jwogi, kosa Sitan, m'owondo piny gipi. Owit go piny wi lowo gi jomalaika pere je.

¹⁰Gikenyo awinjo dwondi nyatoro m'okoko malo i polo ka waco ni, “Pama both gi meni ma dhum kodi Ker pa Were mawan kodi adhum pa Kristo je otieko tundo! Kole jamisegey ma osa wutmin wan bongi Were, wor g'odieceŋ, otiek wito piny.

¹¹To, jokengila go kodi remo pa Nyathi rombo, kodi wac ma joridho gine adieri; aka oyido joyikere kijala kwo pajo tundo tho.

¹²Am'omiyo, polo sangala win, kodi wijoje ma win'iye! To candirok kidho bedo ri piny kodi nam! Kole Jwogi oloro riwin, aka opoŋ gi keme, rupiri go oŋeyo nike odoŋ gi nyaka hongo macek.”

¹³Munyo bulir oŋeyo nike otiek wito go piny wi lowo, ocako riemo dhako m'onywolo nyathi ma nyicwo ca.

¹⁴Dhako no omiy bwombe ario mapa ango madongo ŋey woay wokidhi i kabedo m'oyik rigo i thim kam'ibino kur'iye go cowo oro adek g'adec, ma thwol no kinyal monj'iye go.

¹⁵Gikenyo thwol no oŋulo pi gi dhoke pa jwom yuŋey dhako no, nike wonyali mol gi dhako no.

¹⁶To, lowo okonyo dheno; oŋamo dhoke to mwonyo woko mikula ma jwom m'owok i dhok bulir no.

¹⁷Gikenyo bulir nge omako gi dheno, to kidho cako lweny gi nyikwaye m'odoŋ, ji je ma jowinjo or pa Were aka jonigi genirok iy'adieri pa Yesu.

¹⁸Aka bulir ocungo dho thengi nam.