Read dhopadhola Menyirok ri Yohana 13 Bible Online

Menyirok ri Yohana 13 - dhopadhola bible

Menyirok ri Yohana 13

¹Gikenyo aneno ogwaŋ moro munyo wok i nam. Go onwaŋo nitie gi tunge apar kodi wic abirio, gi sangaria wi tunge apar no je, gi nyinge ma luwo gima k'otire kwoŋ Were m'ondiki i kisi wic mere.

²Ogwaŋ m'aneno no ocale kwac, tiende ocale tiendi arara, aka dhoke ocale dhok simbwor. Bulir omiyo ogwaŋ no meni pere won, gi kom pere ma dhum, kodi meni m'oasere ma dhum.

³Acel kwoŋ wic ogwaŋ no ocale pa nigi adhola ma d'oneko go, to adhola no ocango. Piny gipi obedo gi dhier to luwo ŋey ogwaŋ no.

⁴Ji je jolamo bulir kwoŋbedo go oyido omiyo ogwaŋ no meni ma dhum. Jolamo ogwaŋ no bende ka jowaco ni, “Ŋa marom g'ogwaŋ me? Ŋa manyalo lwenyo gine?”

⁵Omiy ogwaŋ no dhoke ma waco gigipiny ma kwoto gi luwo gima k'otire kwoŋ Were; odoko omiy go meni ma dhum cowo hongo ma dwe piero aŋwen g'ario.

⁶Gino oŋamo dhoke to cako kwoŋo Were, gi luwo giman k'otire kwoŋ Were kodi kama go bed'iye, riwo kiri gi joma bedo i polo je.

⁷Omiy gino meni ma lweny gi ji maleŋ pa Were gi nyalo jo, aka omiy go meni kwoŋ nonin je kodi ji, dhodhok je kodi piny je.

⁸Ji je ma jobedo i piny jobino lamo ogwaŋ no. Dwoŋ mere ni dhano je ma nyinge k'ondiki i kitawo pa jomakwo m'obedo apa Nyathi rombo m'oneki wok i cwec pa piny.

⁹Am'omiyo ŋata nigi ithe wowinji!

¹⁰Ka nyatoro yenyere womaki, ibino mako go t'itweyo; ka nyatoro yenyere woneki kodi abor, iripo neko go kodi abor. Me nyutho ni ji maleŋ pa Were joripo ciro teko kodi genirok.

¹¹Gikenyo aneno ogwaŋ man munyo wok i lowo; go oyido nigi tunge ario paka tungi Nyathi rombo, to oluwo paka bulir.

¹²Gino ooro meni p'ogwaŋ marapena ma dhumo ka waŋe. Go oromo piny kodi joma bed'iye jowolami ogwaŋ marapena, ma adhola ma d'oneko go oyido ocango ca.

¹³Ogwaŋ mar'ario me, otimo ranyuth gi gir'aura madongo, omiyo mac owok i polo to loro piny i waŋ ji je.

¹⁴Aka gino omiyo go owondo ji je ma piny munyo timo gir'aura m'oyey go timo ka waŋ ogwaŋ marapena. Ogwaŋ no ooro ji je ma piny cweyo cal ma kelo dwoŋ ri ogwaŋ m'oyido ocwow g'abor, to odoko kwo.

¹⁵Ogwaŋ mar'ario me, omiy go meni ma kudho kwo i cal p'ogwaŋ marapena, ŋey cal no wonyali luwo aka womiy woneki woko ji je ma jokwero lamo cal m'ocwey no.

¹⁶Ogwaŋ no bende oromo ji je, jomathindho kodi madongo, joŋaŋo kodi jocandi, ŋecin kodi joma ni siem, ni wokethi ranyuth i cingi jo maracuc kodi ruwaŋ jo.

¹⁷Ongoye ŋata d'onyiewere kosa otana kwanyo woko ka go nitie gi ranyuth me, m'obedo nyingi ogwaŋ no, kosa kwan ma nyutho nyinge.

¹⁸Gime yenyo rieko. Nyatoro je ma niaŋ nyalo menyo dwoŋ kwan p'ogwaŋ no, kwoŋbedo kwan no nyutho nyingi dhano. Kwan mere obedo, miya aucel piero aucel g'aucel (666).