Read dhopadhola Menyirok ri Yohana 14 Bible Online

Menyirok ri Yohana 14 - dhopadhola bible

Menyirok ri Yohana 14

¹Gikenyo aŋiyo, t'aneno Nyathi rombo ruwaŋan, munyo ocungo wi got Zayon. Bonge, oyido nitie ji gana miya acel piero aŋwen g'aŋwen (144,000) ma nyinge kodi nyingi Bamere ondiki ruwaŋ jo.

²Aka awinjo derino ma cale pi ma mol piyo piyo, kendo pa lithkoth ma mor. Derino no ocale pa wer ma jotongol jogoyo i tongol pajo.

³Oyido jowero wer manyen, ruwaŋ kom pa Were ma dhum no kodi cwec aŋwen no kodi jodongo no, aka jowero wer manyen ma ŋatiman je k'onyalo fonjirok kwanyo woko ji gana miya acel piero aŋwen g'aŋwen (144,000) m'onyew jo gi remo pa Yesu wok i piny.

⁴Meno ji ma jokure maber ma jok'otimo cot gi mon. Joluwo Nyathi rombo kama go kidh'iye je; ogony jo wok kwoŋ ji je m'odoŋ aka jobedo pa kodhi m'onyak marapena m'omiy Were kodi Nyathi rombo.

⁵Twodo k'onwaŋere i dhok jo; jongoye gi reco ma di kwan rijo.

⁶Gikenyo aneno malaika man munyo ringo i koyo, gi mikwenda ma cil gi cil ma Wac Manyen Maber ma wotiti ri ji ma jonitie i piny, ri piny je, nonin, dhodhok kodi ji je!

⁷Go owaco gi dwonde ma malo ni, “Lwor win Were, aka paki win dwoŋ pere! Kole ndir otundo rigo ma thumo banja ri ji. Am'omiyo, lami win Were m'ocweyo polo, piny, nam, kodi waŋ pi!”

⁸Malaika mar'ario bende oluwo marapena, ka waco ni, “Go otieko podho, Babilon madwoŋ otieko podho! Go otieko miyo nonin je madho vini ma keme ma kidakana pere!”

⁹Malaika mar'adek oluwo jario no ka waco gi dwonde ma malo ni, “Nyatoro je m'olam ogwaŋ no kodi cal pere, to limo ranyuth i nyime kosa i cinge,

¹⁰won bende bino madho vini ma keme pa Were, ma go okonjo gi meni pere m'otiek konjo gi meni iy'agwata ma keme pere! Ji je ma jotimi gime ibino cando jo gi mac ma buru salufa m'obedo kidhur tongi kibiriti, ruwaŋ jomalaika maleŋ kodi Nyathi rombo.

¹¹Aka yiro ma mac ma bino cando jo duny malo cil gi cil. Ongoye ywomirok, wor g'odieceŋ, ri joma lamo ogwaŋ no kodi cal pere, kodi ri nyatoro je m'olim ranyuth ma nyinge.”

¹²Meno am'omiyo ji pa Were joripo bedo gi ciro, paka joma winjo or pa Were aka jonitie gi genirok bongi Yesu.

¹³Gikenyo awinjo dwondi nyatoro m'owok i polo munyo waco ni, “Ndiki gime: Josilwany a joma wok pama kadho yumalo jolatho i tic pa Rwoth.” “Ey,” Cuny waco, “Jobino ywomirok kwoŋ tic pajo matek, rupiri tim pajo luwo jo.”

¹⁴Gikenyo t'aneno ruwaŋan oyido nitie pondeponde matar, aka wi pondeponde no onwaŋo nitie nyatoro m'obedo piny m'ocalo gi Wod Dhano, gi sangaria ma zahabu i wiye kodi pala nyangoda mabith i cinge.

¹⁵Gikenyo malaika man owok i Ot pa Were to koko gi dwonde ma malo ri ŋat'oyido obedo wi pondeponde ni, “Or nyangoda perin ikeci, kwoŋbedo ndir mere otieko tundo, piny ociek akeca!”

¹⁶Gikenyo ŋat'obedo wi pondeponde no owito nyangoda pere wi piny to keco gima ni piny.

¹⁷Gikenyo aneno malaika man munyo wok i Ot pa Were i polo, go bende oyido nigi nyangoda mabith.

¹⁸Gikenyo malaika man ma kuro mac, owok kwoŋ migam. Okoko gi dwonde ma malo ri malaika m'oyido nitie gi nyangoda mabith ni, “Or nyangoda perin ifoni gine gima nyak i ndelo vini ma piny, rupiri vini m'onyak otieko cek!”

¹⁹Gikenyo malaika no owito nyangoda pere wi piny, otoŋo vini m'onyak, to bolo i bur madwoŋ ma biyo vini ma keme pa Were.

²⁰Obiy vini m'onyak no i bur ma biyo vini ma tindi, aka remo omol wok i k'abiyo vini pa mikula ma boro mere oromo mayiro miya ario, aka thutho mere obedo macegin tundo i congi kayina (fut abic).