Read dhopadhola Menyirok ri Yohana 15 Bible Online

Menyirok ri Yohana 15 - dhopadhola bible

Menyirok ri Yohana 15

¹Gikenyo aneno ranyuth man madwoŋ ma kelo bwok i polo: Jomalaika abirio kodi thoyamo abirio. Me am'obedo thoyamo macowe, rupiri jobedo gigipiny ma nyutho keme pa Were macowe.

²Gikenyo aneno gim'ocale pa nam ma ndewiro, m'oruwere gi mac. Aneno bende joma joloyo ogwaŋ kodi cal pere, kodi nyinge m'oketh i kwan. Jono onwaŋo jocungo dho nam ma ndewiro munyo jotiŋo tongol ma Were omiyo jo.

³Onwaŋo jowero wer pa Musa, jatic pa Were kendo apa Nyathi rombo ni, “Tic perin dongo aka obedo gir'aura, Rwoth Were Majameni je! Royo perin otire aka obedo mar'adieri, Kere pa nonin je!

⁴Rwoth, ŋata kilalworin, kosa kilamiyo nyingin dwoŋ? Kole in kendin am'ileŋ. Nonin je jolabino ruwaŋin to jolamin. Kole tim perin m'otire otieko nenere.”

⁵Rumacen aneno munyo Ot wema ma Were bed'iye oyaw i polo.

⁶Jomalaika abirio ma jonigi thoyamo abirio macowe jowok i Ot pa Were no, jorukere i nangin matar ma pilin, kodi del ma zahabu m'otwey i kor gin.

⁷Gikenyo acel kwoŋ cwec makwo aŋwen ca omiyo jomalaika abirio no atewe ma zahabu abirio m'opoŋ gi keme pa Were makwo cil gi cil.

⁸Ot pa Were oyido opoŋ yiro m'owok i dwoŋ kodi i meni pere, aka moro ongoye m'oyido nyalo donjo i Ot pa Were cuka i gik thoyamo abirio ma jomalaika abirio no di jokelo.