Read dhopadhola Menyirok ri Yohana 16 Bible Online

Menyirok ri Yohana 16 - dhopadhola bible

Menyirok ri Yohana 16

¹Gikenyo awinjo dwondi jo ma luwo malo munyo waco i Ot pa Were ri jomalaika abirio ni, “Kidhi wiol atewe abirio ma keme pa Were piny wi lowo!”

²Malaika marapena okidho to olo atawo pere wi lowo, to adholin mareco kendo malith tula kwoŋ jom'oyido jonitie gi ranyuth p'ogwaŋ ca, ma jolamo cal pere.

³Gikenyo malaika mar'ario oolo atawo pere i nam, to pi lokere m'obokere pa remo dhano m'otho, to gima kwo i nam je jotho.

⁴Gikenyo malaika mar'adek oolo atawo pere i jwombe kodi i waŋ pi, to jolokere remo.

⁵Awinjo malaika ma kuro pi waco ni, “Banja me ithumo m'otire, a Ŋataleŋ, manitie pama kendo m'otieko bedo wok con.

⁶Rupiri jooyo remo pa ji maleŋ kodi apa jotuci wac Were, imiyo jo madho remo, meno ripo gi jo!”

⁷Gikenyo awinjo dwondi moro wok kwoŋ migam munyo waco ni, “Rwoth, Were Majameni je! Thumo banja perin otire odoko obedo mar'adieri!”

⁸Gikenyo malaika mar'aŋwen oolo atawo pere kwoŋ waŋceŋ, t'iyeyo waŋceŋ rewo piny gi lietho mere pa mac.

⁹Ji jowaŋ gi lietho mager no, to jokwoŋo nyingi Were manitie gi meni kwoŋ thoyamo me je, to jokwero ŋuto kwoŋ reco pajo kosa miyo Were dwoŋ.

¹⁰Gikenyo malaika mar'abic oolo atawo pere wi kom p'ogwaŋ ma dhum, to mudho umo ker pere, ji jokayo lew jo ro litho,

¹¹to jokwoŋo Were ma polo ro litho kodi adholin pajo, to jok'oŋuto tim pajo mareco.

¹²Gikenyo malaika mar'aucel oolo atawo pere i jwom madwoŋ m'ilwoŋo ni Yufrete, to jwom no dwono ma yawo royo ri kerin ma jowok yuwok ceŋ.

¹³Gikenyo aneno cuny m'ocido jadek ma jocale g'ogwal munyo jowok i dhok bulir, i dhok ogwaŋ, kodi i dhok jatuci wac Were ma twodo ca.

¹⁴Jobedo cuny ma nyajwogi ma jotimo gir'aura. Cuny adek me jowok kareno jokidho pa kerin i piny gipi, coko jo kanyacel ma lweny i ndelo madwoŋ mapa Were Majameni je.

¹⁵“Neni, Alabino nyaliŋliŋ pa jakwo! Jasilwany a ŋata bedo waŋe to gwoko ruk pere, ŋey wokiri wowothi kinyoro to kelo rigo wickwot!”

¹⁶Gikenyo cuny no jokelo kerin kanyacel kam'ilwoŋo i Dhoyuda ni Amagedon.

¹⁷Gikenyo malaika mar'abirio oolo atawo pere i hongo, to dwondi nyatoro ma luwo malo wok i kom ma dhum i Ot pa Were munyo waco ni, “Otieko timere!”

¹⁸Kenyo pilin, derino, mwoc pa lithkoth, kodi yengirok pa piny m'oasere otimere ma fodi yado onwaŋo k'otimere ye ameno wok cuka cwey dhano. Me obedo yengirok pa piny marac m'oasere!

¹⁹Tindi m'ombo ca okedhere didek, aka tindin ma piny je oŋinyere woko. Were opoyo Babilon madwoŋ no, to miyo go medho iy'agwata m'opoŋ gi vini ma keme pere je.

²⁰Kigodin ma nam je jokedhere woko, aka kiri gote je jok'onwaŋere kendo.

²¹Pe madongo pa telin, ma kisi acel ywayo cegin latir miya acel, jopodho kwoŋ ji wok malo. Ji jokwoŋo Were ro thoyamo ma pe, rupiri obedo marac tektek.