Read dhopadhola Menyirok ri Yohana 17 Bible Online

Menyirok ri Yohana 17 - dhopadhola bible

Menyirok ri Yohana 17

¹Gikenyo acel kwoŋ jomalaika abirio ma jonigi atewe abirio obino bongan to waco ni, “Biye, alanyuthin gir'acula ma jatim giwickwot madwoŋ m'oger dho thengi jwombe madit no kidho limo.

²Kerere madongo ma piny jotimo cot gi jatim giwickwot madwoŋ no, aka ji ma piny jomer gi vini ma kidakana pere.”

³Gikenyo to malaika no tiŋan i Cuny Maleŋ to teran yuthim, t'aneno dhako m'obedo wi ogwaŋ m'obokere. Kwoŋ ogwaŋ no gipi oyido ondiki nyinge ma luwo gima k'otire kwoŋ Were aka oyido gi wic abirio kodi tunge apar.

⁴Dheno oyido oruko nangin ma rangi ariŋo kodi m'obokere, aka kwoŋe oyido pilin gi zahabu, ge kodi telin ma welo. I cinge, go oyido otiŋo agwata ma zahabu m'opoŋ gi gigipiny ma timo cot kodi makoc, gima wok i kidakana pere.

⁵I nyime ondiki nyinge madwoŋ mere omuŋere ni: “Babilon madwoŋ, min mon ma jotana delkwoŋ jo i timo giwickwot je kodi joma duwo piny.”

⁶Aka aneno ni dhako no oyido omer gi remo pa ji maleŋ pa Were, kodi remo pa jom'onek rupiri jocwire kwoŋ Yesu. Munyo aneno go, adhier swa.

⁷Gikenyo malaika no openjan ni, “Idhier raŋo?” Abino tuco rin dwoŋ nyaliŋliŋ ma mako kwoŋ dhako no kodi ogwaŋ m'otiŋo go, ma nyawic abirio gi tunge apar no.

⁸Ogwaŋ m'ineno no oyido con kwo, to pama kikwo. Go cegin wok i bur mwombe ma bu gike aka bino tundo kama ilarey'iye go woko. Ji ma piny ma nyingi jo fodi k'ondiki i kitawo ma kwo wok i cakirok pa piny jobino dhier ka joneno ogwaŋ no, rupiri con oyido kwo, t'onyo pama kikwo, aka bino nenirok kendo.

⁹“Gime yenyo rieko kodi niaŋ. Wic abirio no obedo tendere abirio ma dheno bedo wiye, kendo jobedo kerin abirio bende.

¹⁰Kwoŋ jo, kerin abic jotieko podho, acel fodi dhumo, aka man fodi k'obino. Ka go obino go ripo cowo nyaka hongo macek.

¹¹Aka ogwaŋ macon oyido kwo, t'onyo pama kikwo no, meno obedo kere mar'aboro manitie i kweth pa jabirio marapena aka bino tundo kam'ilarey'iye go woko.”

¹²“Tunge apar m'ineno no, meno kerin apar ma fodi jok'ocako dhumo, t'ibino miyo jo meni ma dhum paka kerin cowo hongo ma sawa acel, kanyacel kodi ogwaŋ.

¹³Japar me je jonitie g'atoŋa marom, aka jobino miyo ogwaŋ meni pajo gi nyalo ma dhum.

¹⁴Jobino lwenyo gi Nyathi rombo, to Nyathi rombo bino loyo jo, rupiri go obedo Rwoth kodi Kere pa kerin, aka joma ni bonge jobedo jom'olwoŋ kendo m'oyer aka jogenere.”

¹⁵Malaika no bende owaco ran kendo ni, “Pi m'ineno, ma jatim giwickwot obed'iye no, meno ji, kodi Lwak ji, gi nonin gi dhodhok.

¹⁶Ogwaŋ kodi tunge apar m'ineno no, jobino dak jatim giwickwot no. Jobino timo go kicar to joweyo go kinyoro, jobino camo delkwoŋe to joreyo woko go gi mac.

¹⁷Ato Were oketho i cuny jono awanya ma tiyo g'atoŋa pere, munyo jotiyo gi paro acel to jomiyo ogwaŋ meni pajo ma dhum, cuka wac pa Were otimere.”

¹⁸“Dhako m'ineno no meno tindi m'ombo ma dhumo kerin ma piny.”