Read dhopadhola Menyirok ri Yohana 18 Bible Online

Menyirok ri Yohana 18 - dhopadhola bible

Menyirok ri Yohana 18

¹Rumacen aneno malaika man munyo loro piny wok i polo. Go oyido nitie gi meni ma dhum madwoŋ swa, aka lero pere omenyo piny gipi.

²Go okoko gi dwonde ma malo ni, “Go otieko podho. Babilon madwoŋ otieko podho! Go onyo otieko lokirok kabedo pa jwogi, kodi gunda ma cuny m'ocido joywomere i iye, winyin makoc ma nger je ma kicam jobed'iye.

³Kole go opoko ji je vini pere ma kidakana to jomadho. Kerin ma piny jotimo gine cot, aka jomitan ma piny joŋaŋ kwoŋ kwo pere ma mito gigipiny ma welo.”

⁴Gikenyo awinjo dwondi ŋatiman i polo, m'owaco ni, “Woki win kwoŋ dheno ji paran! Ŋey wikiri widonji i reco pere. Ŋey wibende wikiri wilimi giracula m'ikidho miyo go!

⁵Ato reco pere odhure pa kidho geyo polo. Aka Were opoyo reco pere.

⁶Dwoki rigo gima rom kodi ma bende otieko poko; cul go dirio gima go otieko timo je. Poŋi agwata pere no won gi medho mager kadirio.

⁷Miy go candirok kodi rem, marom gi dwoŋ kodi yodirok ma go oyido omiyere. Ato go kwot ka waco gi i cunye ni, ‘An abedo paka kere madhako; akibedo citho, odoko ak'owinji rem moro je!’

⁸Am'omiyo thoyamo je ma latundo rigo, jobino umo go kiromo i ndelo acel. Two nundu, rem, kodi kec, aka ibino waŋo go gi mac, rupiri Rwoth Were ma thumo rigo banja jameni swa.”

⁹Kerere ma piny m'oyido joŋiyo timo gine kidakana, kodi yodirok i kwo pere ma welo, jobino winjo gi rem to joywako go kareno joneno yiro ma wok i waŋ pere.

¹⁰Jobino cungo gi bor swa, kareno jolworo candirok pere, to jowaco ni: “Awi candi, awi candi otundo rin, tindi madwoŋ ma Babilon ma dimeni! Rerok perin obino nyaka i hongo ma sawa acel won!”

¹¹Jomitan ma piny bende jobino rem to joywako go, rupiri ongoye ŋata onyo nyewo gigipiny pajo kenyo kendo.

¹²Ongoye ŋata nyewo zahabu, feza, telin kodi ge ma welo, nangin mafoth, kodi ma rangi ariŋo, kodi mar'aliri kodi m'obokere, kiti mbawin ma welo maŋwe kur, kodi gigipiny m'opokere opokere m'otimi gi laki liec, mbawin ma welo, nyweny bangir, nyweny matheth kodi tele mafoth ma minyin.

¹³Sinamon, yen m'oregi ma moko maŋwe kur i cemo, buban, mo maŋwe kur, nger buban man; vini kodi mo, moko m'onuŋere kodi ŋano, dhok kodi rombo, kayina kodi cawila, ŋecin kiri gi ji makwo.

¹⁴Jomitan jowaco rigo ni, “Gigipiny je ma cunyin owanya bedo gine jotieko leny woko, aka ŋaŋo perin je gi noro perin joware woko kwoŋin, aka idoko ikibino nwaŋo jo kendo!”

¹⁵Jomitan ma jolimo ŋaŋo wok kwoŋ go, jobino cungo gi bor rupiri jolworo candirok pere. Jobino ywak gi rem

¹⁶to jowaco ni, “Awi candi, candirok obedo ri tindi madwoŋ me! Go yado ruko nangin mafoth kodi manyarangi ariŋo kodi m'obokere, to jaŋ gi gigipiny ma zahabu, telin ma welo, kodi ge ma welo!

¹⁷To i hongo ma sawa acel won go onyo otieko rwenyo woko ŋaŋo no je!” Jotel je ma mel kodi joma ni mel, jocewi mel kodi joman je ma jolimo gima kuro kwo pajo i nam, jobino cungo gi bor,

¹⁸to joywak kareno joneno yiro ma wok i waŋ pere ka jowaco ni, “Tindi mene man m'onwaŋo nyalo rom gi tindi madwoŋ me?”

¹⁹Jobino ywoyo fukefuke i wiy gin, ka joywak gi rem ni, “Awi candi, candirok madwoŋ otundo ri tindi m'ombo me! Go onwaŋo a tindi ma ji je ma jonigi mel i nam jolim'iye ŋaŋo wok kwoŋ ŋaŋo pere! Aka i hongo ma sawa acel won go onyo otieko kiri rere woko!”

²⁰Sangala ro podho pere, a polo! Sangala win, ji maleŋ pa Were kodi jomoor kodi jotuci wac Were pere! Kole Were otieko thumo banja rigo ro gima go oyido timo riwin!

²¹Gikenyo malaika ma jameni okwanyo tele marom kodi kidi m'irego gine, to bolo i nam munyo waco ni, “Me apaka tindi madwoŋ ma Babilon ibino rwadho piny gi derino, aka kilanenere kendo.

²²Wer pa jotongol kodi jower, jokudhi madundo kodi gwarin, k'owinji perin kendo! Ongoye jatic kosa jandijo moro je m'odoko bino nwaŋere perin kendo. Ongoye kidi kad'acel m'ibino winjo ka rego moko yu perin kendo.

²³Aka lero ma tala k'odoko oliel perin kendo. Odoko dwondi jamweha gi mweha pere k'odoko owinjere perin kendo. Jomitan perin oyido jobedo jomadongo loyo i piny gipi, aka thieth perin am'oyido iwondo gine ji je ma piny!”

²⁴Ato kwoŋ go ama remo pa jotuci wac Were kodi apa ji maleŋ kodi apa ji je m'oneki i piny onwaŋer'iye.