Read dhopadhola Menyirok ri Yohana 19 Bible Online

Menyirok ri Yohana 19 - dhopadhola bible

Menyirok ri Yohana 19

¹Rumacen awinjo gim'owinjere malo pa dwondi lwak ji madwoŋ ma polo munyo waco ni, “Paki Were! Both, dwoŋ kodi meni je apa Were mawan!

²Thumo banja pere otire kendo obedo mar'adieri! Kole go otieko thumo banja ri jatim giwickwot madwoŋ m'onwaŋo topo piny gi kidakana pere. Were omiyo go gir'acula rupiri go oneko jotic pere”

³To odoko okoko ni, “Paki Were! Yiro ma wok i waŋ pere kidho malo cil gi cil.”

⁴Gikenyo, jodongo piero ario g'aŋwen no kodi cwec aŋwen no, je jogore piny to jolamo Were m'onwaŋo obedo wi kom pere ma dhum no, ka jowaco ni, “Ameno! Paki Were!”

⁵Gikenyo dwondi nyatoro owok i kom ma dhum ma waco ni, “Paki win Were mawan, win jotic pere je, gi ji je, jomadongo gi mathindho ma jolworo go!”

⁶Gikenyo awinjo gim'ocale dwondi Lwak madwoŋ, ma derino mere omor pa pi ma mol gi meni, kendo pa mwoc pa lithkoth madwoŋ. Awinjo ka jowaco ni, “Paki Were! Kole Rwoth Were mawan Majameni je dhumo!

⁷Weyi wayodere wasangala; weyi wapaki dwoŋ pere m'oasere! Kole ndir otundo ma nywomirok maleŋ mapa Nyathi rombo, aka mweha pere otieko yikirok.

⁸Omiy go ruko nanga mayom matar ma minyin.” (Nanga matar no meno tim m'otire mapa ji pa Were.)

⁹Gikenyo malaika owaco ran ni, “Ndiki gime: Josilwany a jom'olwoŋ i kalima ma nywomirok pa Nyathi rombo.” Malaika no omedo waco ni, “Me obedo wac mar'adieri mapa Were.”

¹⁰Gikenyo agore piny dho tiende ni alam go, to go owaco ran ni, “Ikir'itim ameno! A jatic nyawotin, acel kwoŋ wutmin in ma joridho adieri pa Yesu. Lami Were ayino! Kole adieri pa Yesu ama gudo cuny jatuci wac Were.”

¹¹Gikenyo aneno polo munyo yawere, to kayina matar nenere ruwaŋan. Ŋata riemo kayina no ilwoŋo ni M'ogenere kendo Jar'adieri; go thumo banja aka lwenyo i tiro.

¹²Waŋe oyido cale mac maliel, aka oruko sangaria kweth i wiye. Go nigi nyinge m'ondiki kwoŋe, m'ongoye moro m'oŋeyo kwanyo woko go won kende.

¹³Nanga ma go oruko oyido orwaki i remo. Nyinge m'ilwoŋo gine obedo, “Wac pa Were.”

¹⁴Lwak jolweny ma polo oyido joluwo go, munyo jonitie wi kayina matar aka joruko nangin mayom, matar, m'olony kicutho.

¹⁵Abor mabith owok i dhoke, ma go bino toŋo woko gine nonin. Go bino dhumo jo kodi luth ma nyweny, aka go bino biyo vini i gibiyo vini ma keme mager mapa Were Majameni je.

¹⁶I nanga pere kodi i bat mere ondiki nyinge me: “Kere pa kerin, Rwoth pa rwodhe je.”

¹⁷Gikenyo aneno malaika moro ocungo wi waŋceŋ. Okoko gi dwonde ma malo ri winyin je m'onwaŋo jolakalaka wi hongo ni, “Biye win, aka cokere win kanyacel ri kalima pa Were madwoŋ!

¹⁸Biye win wicam delkwoŋ kerin, jotel ma lweny, kodi jomeni, riŋo kayina kodi joriemi mere, delkwoŋ ji je, ŋecin kodi joma ni siem, jomadongo kodi jomathindho!”

¹⁹Gikenyo aneno ogwaŋ ca kodi kerin ma piny kodi lwak jolweny pajo munyo jocokere ni jowolweny kodi ŋata wotho wi kayina matar kodi lwak jolweny pere.

²⁰To omako ogwaŋ no, kanyacel kodi jatuci wac Were ma twodo m'oyido jotimo gir'aura rigo. (Gir'aura no ama go owondo gine ji m'onwaŋo jonitie gi ranyuth p'ogwaŋ no to jolamo cal p'ogwaŋ no.) Ogwaŋ no kodi jotuci wac Were ma twodo je obol jo makwo i wakawaka ma mac kodi telin ma gamo mac mayot pa kibiriti.

²¹Oneki Lwak jolweny pajo m'odoŋ g'abor ma wok i dhok ŋat'oyido ringo wi kayina ca; aka winyin je jocamo delkwoŋ jo paka jonyalo.