Read dhopadhola Menyirok ri Yohana 2 Bible Online

Menyirok ri Yohana 2 - dhopadhola bible

Menyirok ri Yohana 2

¹Ri malaika ma kitipa pa jom'oyeyo ma Efeso ndiki ama: Me a mikwenda m'owok bongi ŋat'otiŋo micalin abirio i cinge maracuc, aka wotho i dier raŋaw talin abirio.

²Aŋeyo tim perin, paka itiyo matek aka iciro teko ma bino rin. Aŋeyo nike ikijol ji mareco, aka itieko kikaŋasa joma ŋoyo nike jobedo jomoor kere to be, aka inwaŋo ni jobedo jotwodo.

³Aŋeyo ni itieko ciro teko i nyingan, ma cunyin k'oŋedhere.

⁴To kende me a gima anwaŋo kwoŋin ma k'otire: Itieko bolo woko mar m'oyido ndir no itelo bedo gine ran.

⁵Poyi paka ipodho wok kamabor! Ŋuti aka idok'itimi gima cango ipen timo. K'ikiŋuto kwoŋ reco perin, alabino bongin t'akwanyo woko raŋaw perin ma talin i kabedo mere.

⁶To me a gima thielin. Wikwero gima jopa Nikola jotimo, paka abende akwero.

⁷Am'omiyo, ŋata nigi ithe, wowinji gima Cuny waco ri kitipin pa jom'oyeyo! Ri joma joloyo karatem abino miyo jo meni ma camo yath ma kwo manitie i Ndelo pa Were.

⁸Ri malaika ma kitipa pa jom'oyeyo ma Simirina ndiki ama: Me mikwenda ma wok bongi ŋati marapena kendo macowe, m'otho aka doko onyo kwo.

⁹Aŋeyo candirok kodi candi perin; aŋeyo nike ijacandi, to iy'adieri iŋaŋ! Aŋeyo reco ma joma ŋoyo nike jobedo Joyuda ma to kere jok'obedo, jotimo rin; meno joma nitie iy'acel gi Sitan!

¹⁰Ikir'ilwor candirok macegin bino rin. Awaco rin ni, jwogi bino bolo megi kwoŋ win i jiera paka karatem; candirok mewin bino cowo ndelo apar. Bedi gi genirok tundo tho, aka abino miyin sangaria ma kwo.

¹¹Am'omiyo ŋata nigi ithe, wowinji gima Cuny waco ri kitipin pa jom'oyeyo! Joma joloy karatem jok'olim litho ma tho mar'ario.

¹²Ri malaika ma kitipa pa jom'oyeyo ma Perigamo ndiki ama: Me mikwenda ma wok bongi ŋata nitie g'abor mabith ma nyalewe ario.

¹³Aŋeyo ni kam'ibed'iye, a kama Sitan ojeng'iye kom pere ma dhum. T'icwire i nyingan, aka ikiweyo medirok gi yeyo perin kwoŋan kada i ndir ma Antipa, jakony paran m'ogenere onek'iye i tindi mewin kenyo kama Sitan bed'iye.

¹⁴To me a gigipiny manok m'anwaŋo kwoŋin ma k'otire: Winitie gi jomoro i dier win kenyo ma joluwo fonji pa Balam, m'ofonjo Balak nger ma ywayo cuny ji ma Isiraili jowotimi gimarac munyo jocamo riŋo m'ocow gine cal pa werin makicar, gi timo cot.

¹⁵Meno apaka wibende winitie gi joma joluwo fonji pa Nikola i dier win.

¹⁶Am'omiyo ŋuti win kwoŋ reco mewin! Kak'ameno alabino bongi win mayot t'alwenyo gi jono kodi abor ma wok i dhokan.

¹⁷Am'omiyo, ŋata nitie gi ithe, wowinji gima Cuny waco ri kitipin pa jom'oyeyo! Ŋata loyo karatem abino miyo go cemo m'opan m'ilwoŋo ni mana. Abino bende miyo go tele matar, m'ondik'iye nyingi jo Manyen, ma ŋat'omiy gino kende ama won ŋeyo.

¹⁸Ri malaika ma kitipa pa jom'oyeyo ma Thiatira ndiki ama: Me mikwenda ma wok bongi Wod Were, ma waŋe liel pa mac, ma tiende pilin pa nyweny ywel m'orudi.

¹⁹Aŋeyo tim perin, mar kodi yeyo perin, tic perin gi ciro candirok perin, odoko aŋeyo ni pama onyo imedo tic loyo kam'icak'iye.

²⁰To gim'anwaŋo kwoŋin marac a me: Ijolo dhako ma nyinge Yezebel, ma won lwoŋere ni jatuci wac pa Were aka fonjo odoko bano jotic paran i timo tim ma wickwot gi camo riŋo m'ocow gine cal pa werin makicar.

²¹Atieko miyo go hongo ma weyo woko reco pere, to go kimiti weyo tim pere ma wickwot.

²²Kuri ineni! Abino pielo go wi kitanda ma candirok, aka abino miyo jom'oyido jotimo gine cot bedo i candirok malith, kwanyo woko ka joŋuto gigipiny mareco ma jotimo gi go.

²³Abino kisika nyithindho pere bende, aka kitipin pa jom'oyeyo je jobino ŋeyo nike a jameny cuny ji gi ŋeyo paro pa ji. Abino culo kisi dhano kwoŋ win cungo kwoŋ gima go otimo.

²⁴To jom'odoŋ kwoŋ win i Thiatira, ma jokiluwi fonji pere no aka fodi jok'ofonjere rieko pa Sitan ma jolwoŋo ni, “Nyaliŋliŋ mathuth.” Onyo awaco riwin ni ak'okethi peko man kwoŋ win.

²⁵To maki win matek gima winigine cuka anobin.

²⁶Ri ŋata loyo karatem, ma medere gi timo gim'amito kiri i gike, abino miyo go meni ma dhumo piny;

²⁷go bino dhumo jo gi luth ma nyweny to ŋinyo jo woko pa degi ma lowo, paka awon atieko nwaŋo meni ma dhum bongi Baba.

²⁸Aka abino miyo go sulwe m'odikin.

²⁹Ŋata nigi ithe, wowinji gima Cuny waco ri kitipin pa jom'oyeyo.