Read dhopadhola Menyirok ri Yohana 20 Bible Online

Menyirok ri Yohana 20 - dhopadhola bible

Menyirok ri Yohana 20

¹Gikenyo aneno malaika moro munyo loro piny wok i polo kareno otiŋo rayaw ma bur mwombe ma bu gike kodi lijegere m'ombo i cinge.

²Go omako bulir, thwol macon ma nyinge ilwoŋo ni jwogi kosa Sitan, to tweyo go oro gana acel,

³aka obolo go i mwombe, to cego to mwono dhoke matek, ŋey wobedi kenyo m'odoko kinyal wok wondo ji ma piny cuka oro gana acel orum. To rumacen ibino gonyo go kendo ma hongo macek.

⁴Rumacen aneno kombere ma dhum, aka jom'obedo kwoŋ jo obedo joma omiy jo thumo banjin. Aka aneno bende joma ndir ca oŋadi woko ŋuti jo ro ridho yeyo pajo kwoŋ Yesu kodi wac pa Were, ma jok'oyeyo lamo ogwaŋ kosa cal pere, aka jok'oyeyo womwon ranyuth pere ruwaŋ jo kosa i cingi jo. Odwoki rijo kendo kwo pajo to jodhumo gi Kristo oro gana acel.

⁵Jom'otho man je jodoŋ cen ma jok'ocerino cuka oro gana acel orumo. Me a cerino marapena.

⁶Ji je ma jokwanere i cerino marapena me, meno josilwany odoko joleŋ! Ato tho mar'ario kilabedo gi meni kwoŋ jo, to jobino bedo jocway ri Were i wi migam ma jotiyo ri Were gi Kristo munyo jodhumo gine cowo oro gana acel.

⁷Aka ka oro gana acel orumo, ibino gonyo Sitan wok i twec,

⁸t'idhiro go i piny bino wondo nonin je ma jonitie i thenge aŋwen ma piny, meno Gog kodi Magog, gi coko jo ri lweny, kareno welo pajo thoth pa kwoyo ma thengi wakawaka.

⁹Jobino wotho munyo joswana ariwa piny to jothoko wema pa jomaleŋ kodi tindi m'omar, to mac bino tukere wok i polo to podho to regarega woko jo.

¹⁰Aka jwogi m'oyido wondo jo ibino bolo i wakawaka ma mac gi telin maliel kam'ogwaŋ ca kodi jotuci wac were pere ma twodo jobino candirok'iye hongo je wor g'odieceŋ cil gi cil.

¹¹Odoko aneno kom moro madwoŋ matar ma dhum kodi ŋat'obed'iye; polo gi piny joringo joeye woko ruwaŋe m'odoko jok'onenere kicutho.

¹²Aka aneno joma cango jotho, madongo kodi mathindho, munyo jocungo ruwaŋ kom no, t'iyawo kitawin. To odoko iyawo kitawo man m'obedo kitawo ma kwo. Aka joma cango jotho no othum rijo banjin cungo kwoŋ gima kisi dhano cango otimo i kwo pere, m'ondiki i kitawin no.

¹³Gikenyo wakawaka je jowodho joma cango jotho i jo. Tho kodi piny pa jom'otho bende jowodho jom'onwaŋo ni jo, aka joje othum rijo banjin cungo kwoŋ gima yado jotimo i kwo pajo.

¹⁴Gikenyo Tho kodi piny pa jom'otho je obol i wakawaka ma mac. Me a tho mar'ario, m'obedo wakawaka ma mac,

¹⁵aka nyatoro je ma k'onwaŋ nyinge i kitawo ma kwo, bende obol i wakawaka ma mac no.