Read dhopadhola Menyirok ri Yohana 21 Bible Online

Menyirok ri Yohana 21 - dhopadhola bible

Menyirok ri Yohana 21

¹Gikenyo aneno polo manyen kodi piny manyen. Ato polo kodi piny marapena oyido joleny woko, aka nam orere woko.

²Gikenyo aneno Tindi Maleŋ, Yerusalem manyen, munyo loro piny wok i polo bongi Were, m'oyik maŋon paka mweha m'orukere maŋon ka yikere romo gi rwoth pere.

³Awinjo dwondi nyatoro ma luwo malo munyo waco wi kom ma dhum ni, “Pama peco pa Were nitie gi ji! Go bino bedo gi jo, aka jobino bedo ji pere. Were won bino bedo gi jo, aka bino bedo Were pajo.

⁴Go bino yweyo pigi waŋ jo. Tho odoko k'obedi, kosa rembo, kosa ywak kosa litho, rupiri gigipiny macon jotieko leny woko.”

⁵Gikenyo ŋat'oyido obedo wi kom ma dhum owaco ni, “Onyo pama aloko gigipiny je manyen!” Go owaco ran kendo ni, “Ndiki gime, rupiri wac me obedo mar'adieri aka genere.”

⁶Aka owaco ran ni, “Otieko timere! An a Alifa kodi Omega, cakirok kodi gike. Ŋata riyo neko abino miyo pi amadha ma nono ma wok i waŋ pi ma kwo.

⁷Ŋat'oloy lweny bino limo gime je. Abino bedo Were pere, aka go bino bedo wodan.

⁸To joma lwor, joma jok'oyeyo, joreco, jonek, jocot, jothieth gi yido, joma lamo cal makicar, kodi jotwodo je, kabedo pajo bino bedo wakawaka mac ma waŋ gi telin ma wodho mac kibiriti, m'obedo tho mar'ario.”

⁹Acel kwoŋ jomalaika abirio m'onwaŋo jonitie kodi atewe abirio ma thoyamo opoŋ'iye obino bongan to waco ni, “Biye anyuthin Mweha, cipa Nyathi rombo.”

¹⁰Gikenyo malaika no otiŋan i cuny to teran wi got mabor tektek. Go onyuthan Yerusalem, Tindi Maleŋ, munyo loro piny wok i polo bongi Were,

¹¹maliel gi dwoŋ pa Were. Tindi no omeny pa ge ma welo, pa tele manyaboke pendi, maler pa ndewiro.

¹²Go obedo gi cel m'othoko ma kore pek aka oŋawere malo, kodi waŋkac apar g'ario, kodi jomalaika apar g'ario ma jokuro kisi waŋkac. Kwoŋ kisi waŋkac ondiki nyingi nonin apar g'ario ma Isiraili.

¹³Aka obedo gi waŋkac adek i kisi thenge. Adek yuwok ceŋ, adek yupiny, adek yumalo, adek yupodho ceŋ.

¹⁴Cel ma tindi no oger wi telin apar g'ario, m'ondik'iye nyingi jomoor pa Nyathi rombo apar g'ario.

¹⁵Malaika m'oluwo kodan oyido nitie gi luth rapor ma zahabu, ma kipima tindi, kodi waŋkac mere, kodi cel m'ogeti thoko go.

¹⁶Tindi no oyido nyathenge aŋwen marom; boro mere rom kodi laco mere. Malaika opima tindi no kodi luth rapor pere no. Boro mere onwaŋo romo mayiro gana acel gi miya aŋwen; aka laco mere, kodi ŋawirok mere, kodi boro mere je oyido jorom aroma.

¹⁷Malaika no opima kor cel, aka ŋawirok mere oyido romo tiendi jo miya acel gi piero aŋwen g'aŋwen, cungo kwoŋ rapor ma noknok m'oyido go oro (fut 200).

¹⁸Kor cel no otim gi tele manyaboke pendi, aka tindi won gipi otim gi zahabu, maler pa ndewiro.

¹⁹Tele ma tiendi cel ma tindi otim makicin kodi telin ma welo m'opokere opokere. Tele marapena ma tiendi cel obedo ma tele manyaboke pendi m'obokere obokere; mar'ario tele manyabululu; mar'adek tele matar m'oruwo rangi akwaro; mar'aŋwen tele manyarangi nam.

²⁰Mar'abic tele m'obokere, mar'aucel manyatongweno, mar'abirio tele manyarangi zahabu, mar'aboro tele manyarangi nam. Mar'abuŋwen tele manyatongweno, mar'apar tele manyarangi apo, mar'apar g'acel tele m'obokere nyamicungwa, aka mar'apar g'ario tele manyarangi orandi.

²¹Waŋkac apar g'ario no obedo ma tele ma welo, kisi thigo gi tele m'opokere. Royo ma tindi obedo ma zahabu, maler pa ndewiro.

²²Akineno Ot pa Were i tindi, rupiri Ot mere obedo Rwoth Were Majameni je, kodi Nyathi rombo.

²³Tindi no kiyeny ceŋ kosa dwe wokel'iye lero, rupiri dwoŋ pa Were am'obedo lero mere, aka Nyathi rombo a tala mere.

²⁴Ji ma piny jobino woth i lero pere, aka kerin ma piny jobino kelo ŋaŋo pajo i iye.

²⁵Waŋkac ma tindi kilacego odieceŋ, odoko kada colo ma wor k'obedi kenyo.

²⁶Dwoŋ kodi ŋaŋo pa nonin ibino kelo i tindi no.

²⁷To ongoye gimakoc ma bino donj'iye, kosa ŋata timo giwickwot kosa twodo, kende ji ma nyingi jo ondiki i kitawo ma kwo mapa Nyathi rombo kende ama jobino donjo i tindi no.