Read dhopadhola Menyirok ri Yohana 22 Bible Online

Menyirok ri Yohana 22 - dhopadhola bible

Menyirok ri Yohana 22

¹Malaika onyuthan bende jwom ma pi ma kelo kwo, maler pa ndewiro, ma mol kareno wok i kom ma dhum pa Were kodi apa Nyathi rombo,

²aka mol i dier royo ma tindi. I thengi jwom korin gi korin oyido nitie yath ma kwo, ma nyak gim'opokere apar g'ario i oro, dicel kisi dwe, aka boke mere obedo ma botho nonin.

³Ongoye gima Were okwoŋo ma bino nwaŋere i tindi no. Kom ma dhum pa Were kodi apa Nyathi rombo ama bino bed'iye, aka jotic pere jobino lamo go.

⁴Jobino neno waŋe, aka ibino ndiko nyinge i nyim jo.

⁵Colo ma wor odoko kilabedo, aka jokibino yenyo lero ma tala kosa lero ma waŋceŋ, Rwoth Were won ama bino bedo lero pajo, aka jobino dhumo cil gi cil.

⁶Gikenyo malaika owaco ran ni, “Wac me obedo mar'adieri aka genere. Aka Rwoth Were ma miyo jotuci wac Were Cuny Maleŋ pere, ooro malaika pere nyutho jotic pere gima kidho timere mayot.”

⁷Yesu owaco ni, “Winji, abino mayot! Jasilwany a ŋata mako wac pa jotuci wac Were ma kitawo me!”

⁸An Yohana, aŋat'awinjo kendo aneno gigipiny me je. Aka munyo atieko winjo gi neno gime, agore piny dho tiendi malaika m'onyuthan gigipiny me ni alam go.

⁹To go owaco ran ni, “Ikir'itim ameno! Abedo jatic nyawotin, i dier wutmere kodi jotuci wac Were kodi ji je ma jomako wac ma kitawo me. Lami Were ayino!”

¹⁰Gikenyo owaco ran ni, “Ikir'ipan wac m'otuci i kitawo me rupiri ndir orikere.

¹¹Weyi jatim reco womedere gi timo reco, aka ŋata koc womedere gi koco pere, ŋataber womedere gi timo bero, ŋataleŋ womedere gi leŋo.”

¹²Yesu owaco ni, “Neni, abino mayot. Anigi kemba paran, m'abino miyo kisi nyatoro cungo kwoŋ gima go otimo.

¹³Abedo Alifa kodi Omega, marapena kodi macowe, cakirok kodi gike.”

¹⁴Josilwany a joma lwoko ruk pajo m'olony, aka ŋey jowobedi gi siem ma camo gima nyak kwoŋ yath ma kwo, gi donjo i tindi gi i waŋkac.

¹⁵To woko koro nitie gwokere kodi jothieth, jocot kodi jonek, joma lamo cal makicar, kodi jotwodo je, i wac kodi i kwo pajo

¹⁶“An, Yesu, aoro malaika paran rin gi mikwenda me ri kitipa pa jom'oyeyo. An anywola ma wok i ot pa Daudi, an a sulwe m'odikin maliel m'oasere.”

¹⁷Cuny kodi Mweha, jowaco ni, “Biye.” Aka weyi moro je ma winjo wowaci ni, “Biye.” Aka weyi moro je ma riyo neko wobin. Weyi nyatoro je ma mito, womadhi pi ma kwo ma nono.

¹⁸An Yohana, anyutho dhano je ma winjo wac m'otuci i kitawo me kicutho ni, ka moro omed'iye wac man, Were bino medo i gir'acula pere thoyamo ma sika ji m'oluw kwoŋe i kitawo me.

¹⁹Aka ka moro okwany woko wac moro je m'otuci i kitawo me, Were bino kwanyo woko adec pere ma gima nyak kwoŋ yath ma kelo kwo, kodi ma tindi maleŋ, m'otuci i kitawo me.

²⁰Jaridhi mikwenda me waco ni, “Adieri, abino mayot.” Ameno. Biye, Rwoth Yesu!

²¹Weyi nema pa Rwoth Yesu wobedi kodi ji maleŋ je. Ameno.