Read dhopadhola Menyirok ri Yohana 3 Bible Online

Menyirok ri Yohana 3 - dhopadhola bible

Menyirok ri Yohana 3

¹Ri malaika ma kitipa pa jom'oyeyo ma Saridi ndiki ama: Me mikwenda ma wok bongi ŋata nitie gi Cuny m'omakere abirio mapa Were kodi micalin abirio. Aŋeyo tim perin; itere pa ŋata kwo ma to itieko tho!

²Am'omiyo cew, aka imedi tic kwoŋ nyaka gima fodi inigine, ma fodi k'otho je, rupiri fodi akinen i tim perin gim'otire ruwaŋ Were paran.

³Am'omiyo poyi gim'ofonjin aka odoko iwinjo; maki gino aka ŋuti kwoŋ reco perin. To ka ikicewi, alabino bongin pa jakwo, aka ik'oŋey kada hongo m'abino bino rin'iye.

⁴To nitie nyaka ji manok kwoŋ win i Saridi kenyo ma fodi jok'oduwo nangin pajo gi cilo. Jobino wotho kodan i ruk matar rupiri joripo gine.

⁵Ŋata loyo karatem bino rukere i ruk matar ameno, aka ak'orey woko nyinge i kitawo ma kwo aka abino tuco nyinge ruwaŋ Baba kodi jomalaika pere.

⁶Am'omiyo ŋata nigi ithe, wowinji gima Cuny waco ri kitipin pa jom'oyeyo.

⁷Ri malaika ma kitipa pa jom'oyeyo ma Filadelifia ndiki ama: Me mikwenda ma wok bongi Ŋataleŋ kendo ŋat'obedo Mar'adieri, ma tiŋo rayaw pa Daudi, ma k'oyawo gimoro nyatoro kinyal cego, kendo gima go ocego nyatoro kinyal yawo.

⁸Aŋeyo tim perin. Kole atieko yawo rin dhiot ma nyatoro kinyal cego; aŋeyo nike initie gi meni manok; to itieko luwo fonji paran aka ikikwedere kwoŋ nyingan. Atieko yawo rin thigo ma moro kinyal cego.

⁹Ere onyo akidho kelo kitipa ma ji pa Sitan, ma jotwodo aka joŋoyo nike jobedo Joyuda, ma to jok'obedo; abino kelo jo bongin to jogoyo congi gin piny ruwaŋin to joniaŋ ni kere amarin.

¹⁰Kwoŋbedo ikuro or paran ma diyo ici gi ciro candirok; abino kurin maber i ndir ma teko obin'iye ri piny gipi ma temo ji je.

¹¹Abino mayot; maki maber gim'inigine, aka moro wokiri womayin sangaria perin.

¹²Abino loko ŋat'oloy karatem siro ma Ot pa Were paran, aka go k'odoko owok i iye. Abino ndiko kwoŋe nyingi Were paran, kodi nyingi tindi pa Were paran, Yerusalem manyen, ma bino loro piny wok i polo bongi Were paran; kodi nyingan manyen won bende.

¹³Am'omiyo ŋata nigi ithe, wowinji gima Cuny waco ri kitipin pa jom'oyeyo.

¹⁴Ri malaika ma kitipa pa jom'oyeyo ma Lawodisia ndiki ama: Me mikwenda m'owok bongi ŋata lwoŋere ni Ameno, jakony ma genere odoko mar'adieri, m'obedo kacakirok ma cwec pa Were.

¹⁵Aŋeyo tim perin; aŋeyo nike icale pi ma murmur. Kabedi iŋic kicutho kosa ilieth ayino kicutho d'ober!

¹⁶To paka imurimur nyaka masisiri, aka ikiŋic odoko ikilieth, alaŋulin woko wok i dhokan!

¹⁷Ato iwaco ni, “Aŋaŋ kendo anitie maber.” Iwaco kendo ni, “Anitie gi gimoro je m'ayenyo.” T'ikuya paka icandere. Kole yenyere womaki kodin wor ayino, ijacandi, initie kinyoro, aka waŋin je otho.

¹⁸Am'omiyo, amiyin rieko ni nyew zahabu bongan, m'oyik gi mac, aka inoŋaŋ. Nyew nangin matar bende iruki aka ium gine kinyoro perin ma kelo rin wickwot no. Nyew yen ma waŋ jo bende ikethi i waŋin, aka ŋey inyal neno.

¹⁹Joma amaro, apusa jo odoko atwenyo jo. Am'omiyo bedi g'adieri kendo ŋuti kwoŋ reco perin.

²⁰Aka ee acungo dho thigo agudo; ka moro owinjo dwondan to yawo, abino donjo i ot pere t'acemo gine, to bende cemo kodan.

²¹Ŋat'oloy lweny abino miyo meni ma bedo bongan i kom paran ma dhum, paka abende atieko loyo lweny aka onyo abedo kabuti Baba i kom pere ma dhum.

²²Am'omiyo, ŋata nigi ithe, wowinji gima Cuny waco ri kitipin pa jom'oyeyo!