Read dhopadhola Menyirok ri Yohana 4 Bible Online

Menyirok ri Yohana 4 - dhopadhola bible

Menyirok ri Yohana 4

¹I hongo me alimo menyirok man, aka aneno dhiot m'oyaw i polo. Aka dwondi jo m'oluwo gi derino paka gwara, m'onwaŋo atieko winjo con ka luwo kodan, owaco ni, “Biye ka, anyuthin gima bino timere rumacen.”

²Piyo piyo Cuny Maleŋ opoŋ kwoŋan, to kom pa Were ma dhum i polo bino ruwaŋan, kareno nitie ŋat'obed'iye.

³Ŋat'obedo no oyido liel pa tele manyarangi manyaboke pendi gi tele manyarangi m'obokere, aka thoko kom ma dhum oyido lifudo manyarangi manyaboke pendi.

⁴I thac m'othoko kom no onwaŋo nitie kombere piero ario g'aŋwen man, ma jodongo piero ario g'aŋwen i ruk matar jobed'iye, aka joruko sangaria ma zahabu i wiy jo.

⁵I kom ma dhum no oyido wok pilin, kodi derino kodi mwoc pa lithkoth. Aka onwaŋo nitie talin abirio maliel ruwaŋ kom no, m'obedo cuny m'omakere abirio mapa Were.

⁶Kendo ruwaŋ kom ma dhum no onwaŋo nitie gima cale pa jwom ma ndewiro, maler. Thoko kom no, thenge korin gi korin, onwaŋo nitie cwec makwo ma waŋ gin nitie atia kisi kamoro, ruwaŋ jo kodi yuŋey jo je.

⁷Gima kwo marapena ocale kodi simbwor; mar'ario ocale kodi thwon; aka mar'adek wiye gi waŋe ocale apa dhano; aka mar'aŋwen ocale ango m'oyaro bwombe pa winyo ma ringo i hongo.

⁸Kis'acel kwoŋ cwec makwo no oyido nitie gi bwombe aucel, aka omore gi waŋe kwoŋe gipi kiri i pendi bwombe. Cwec no jowero ma jokiliŋ wor g'odieceŋ ni: “Maleŋ, maleŋ, maleŋ, obedo Rwoth Were Majameni je, m'obedo con, ma pama nitie, aka labino.”

⁹Hongo je ma cwec makwo aŋwen no jomiy'iye ŋat'obedo wi kom ma dhum, makwo cil gi cil no dwoŋ, kodi wor, kodi foyo,

¹⁰jodongo piero ario g'aŋwen no jogore piny ruwaŋ ŋat'obedo wi kom ma dhum, to jolamo ŋata kwo cil gi cil no. Jobolo sangaria pajo ruwaŋ kom ma dhum, aka jowaco ni:

¹¹“Rwodhiwan kendo Were! Iripo limo dwoŋ, gi wor kodi meni, rupiri icweyo gigipiny je, aka gi mito perin am'omiyo jokwo.”