Read dhopadhola Menyirok ri Yohana 5 Bible Online

Menyirok ri Yohana 5 - dhopadhola bible

Menyirok ri Yohana 5

¹Gikenyo aneno kitawo m'ondiki thenge ario je ma ŋat'obedo wi kom ma dhum otiŋo i cinge maracuc, aka omwon gi gimwono abirio m'othore.

²Aka aneno malaika ma jameni m'oluwo gi derino madwoŋ ni, “Ŋata ripo gi halo gimwono to yawo kitawo no?”

³To ongoye moro m'onwaŋere i polo, i piny, kosa i pendi lowo ma d'onyalo yawo kitawo no gi neno i iye.

⁴Aywak ma loŋo rupiri ongoye ŋat'onwaŋere ma oripo nyalo yawo kitawo no kosa neno giman'iye.

⁵Gikenyo acel kwoŋ jodongo no owaco ran ni, “Ikir'iywak. Panen! Simbwor ma nono pa Yuda, nyakwar Daudi otieko loyo lweny aka go nyalo halo woko gimwono abirio m'othore no je to yawo kitawo no.”

⁶Aka aneno Nyathi rombo moro ocungo i diere dho kom ma dhum, ma cwec makwo aŋwen kodi jodongo no jothoko. Nyathi rombo no ocale pa m'oneki ma cowirok. Rombo no onwaŋo nitie gi tunge abirio kodi waŋe abirio, ma jobedo cuny m'omakere abirio mapa Were m'odhir i piny gipi.

⁷Nyathi rombo no okidho to kwanyo kitawo ma ŋat'obedo wi kom ma dhum oyido otiŋo i cinge maracuc no.

⁸Munyo go okwanyo gino ameno, cwec makwo aŋwen no kodi jodongo piero ario g'aŋwen no jogore piny ruwaŋ Nyathi rombo no. Kisi dhano oyido otiŋo tongol, kodi atewe ma zahabu ma buban opoŋ'iye, m'obedo kwayo pa ji pa Were.

⁹Jowero wer manyen ni, “Iripo gi kwanyo kitawo gi halo woko gim'omwon gine. Kole onekin, aka gi remo perin, inyewo ri Were ji maleŋ, wok i nonin je, dhodhok je, piny je kodi ji ma piny gipi.

¹⁰Iloko jo ker pa jocway ri Were i wi migam; aka jobino dhumo piny.”

¹¹Odoko aneno, aka awinjo dwondi jomalaika gana gi gana! Jocungo jothoko kom ma dhum, kodi cwec aŋwen no, kodi jodongo no,

¹²to jowero gi dwondi jo ma malo ni, “Nyathi rombo m'oneki paka cowirok ripo limo meni ma dhum, lim, rieko kodi mwamba, Wor, dwoŋ, kodi pak!”

¹³Aka awinjo cwec je ma polo, ma piny, kodi ma pendi lowo, kodi cwec je ma nam, gi cwec je ma polo gi piny munyo jowero ni, “Ri ŋata bedo wi kom ma dhum, kodi ri Nyathi rombo, wobedi pak kodi wor, kodi dwoŋ kodi meni ma cil gi cil!”

¹⁴Aka cwec aŋwen no jodwoko ni, “Ameno!” To jodongo no jogore piny kareno jolamo Were.